27 C
Phnom Penh

តុលា​កា​រផ្ត​ន្ទា​ទោស​ស្ត្រី​ម្នាក់​ដាក់​ពន្ធនា​គារ​ពាក់ព័ន្ធ​ករណីរំលោភ​សេចក្តីទុក​ចិត​្ត

ដោយ ឌឹ ខេមបូឌា ដេលី

បទវិភាគ

សាលា​ដំបូង​រាជ​ធានី​ភ្នំពេញ បាន​ផ្ដន្ទាទោស​ដាក់​ពន្ធនាគារ​ស្ត្រី​ពាណិជ្ជករ​ម្នាក់​ ដែល​មាន​សិទ្ធិ​ផ្ដាច់​មុខ​យក​ភាស៊ី​តាម​ផ្សារ​មួយ​ចំនួន​ក្នុង​រាជ​ធានី​ភ្នំពេញ ពីបទ​រំលោភ​សេចក្ដី​ទុក​ចិត្ត​ទាក់​ទង​នឹង​កិច្ច​សន្យា​ម៉ៅការ​បន្ត​ ដែល​ចុះ​ហត្ថលេខា​កាលពី​ឆ្នាំ​២០០៨​ អនុញ្ញាត​ឲ្យ​ដៃគូ​រក​ស៊ី​មួយ​យក​លុយ​​ថ្លៃ​ចូល​បន្ទប់​ទឹក​នៅ​ផ្សារ​ធំថ្មី​​ ក្នុង​រាជធានី​ភ្នំពេញ​។

ពាណិជ្ជករ​ឈ្មោះ ហម មុនី អះអាង​ថា អ្នកស្រី​ រ័ត្ន សុភាព អាយុ​៥២​ឆ្នាំ ដែល​ជា​ម្ចាស់​ក្រុម​ហ៊ុន​ រ័ត្ន សែន​ សុភាព គ្រប់គ្រង​ការ​យក​ភាស៊ី​នៅ​ផ្សារ​ធំថ្មី​ ផ្សារ​កណ្ដាល និង​ផ្សារ​ព្រែក​ព្នៅក្នុង​រាជ​ធានីភ្នំពេញ បាន​បោក​ប្រាស់​លោក​យក​ប្រាក់​អស់​១៤០.០០០​ដុល្លារ​។

លោក ហេង វីរៈ ក្រឡាបញ្ជី​សាលា​ដំបូង​រាជ​ធានី​បានបញ្ជាក់​ពី​ការ​ឃុំ​ខ្លួន​អ្នកស្រី​ សុភាព បណ្ដោះ​អាសន្ន​នៅក្នុង​ពន្ធនាគារ​ព្រៃ​ស​។

លោក​ ហម មុនី អាយុ​៧០​ឆ្នាំ​អះអាង​ថា លោក​បាន​ចុះ​ហត្ថលេខា​លើកិច្ច​សន្យា​បន្ត​រយៈ​ពេល​១៣​ឆ្នាំ​ជាមួយ​អ្នកស្រី​ សុភាព កាលពី​ឆ្នាំ​២០០៨ ដើម្បី​យក​លុយ​ពី​អ្នក​ដែល​ប្រើ​ប្រាស់​បន្ទប់​ទឹក​នៅ​ផ្សារធំថ្មី ​តម្លៃ​៥០០​រៀល​ក្នុង​ម្នាក់​ៗ។

លោក​ មុនី បាន​និយាយ​កាលពី​ម្សិលមិញ​ថា ” អ្នកស្រី សុភាព បាន​រំលោភ​កិច្ច​សន្យា​”។ លោក​ មុនី បាន​អះអាង​ថា លោក​បាន​បង់​ប្រាក់​ចំនួន​១២០.០០០​ដុល្លារ​ឲ្យ​អ្នកស្រី សុភាព ដើម្បី​ទទួល​បាន​​សិទ្ធិ​​នេះ​រយៈ​ពេល​ប្រាំមួយ​ឆ្នាំ​មក​ហើយ ប៉ុន្តែ​ត្រូវ​បាន​គេ​ប្រាប់​ឲ្យ​លោក​បញ្ឈប់​​ប្រតិបត្តិ​ការ​នៅ​ផ្សារ​នេះ​កាលពី​ឆ្នាំ​មុន គឺ​មិន​ទាន់បាន​ពាក់​កណ្ដាល​កិច្ច​សន្យា​ផង​។

លោក​ មុនី បាន​និយាយ​ថា លោក​បាន​ទៅ​រកអ្នកស្រី សុភាព ១០​ថ្ងៃ​បន្ទាប់ពី​លោក​ត្រូវ​បាន​ប្រាប់​ឲ្យឈប់​យក​ភាស៊ី​ ហើយ​ត្រូវ​បាន​គេ​ប្រាប់​ថា​ លោក​អាច​បន្ត​កិច្ច​សន្យាបាន ​ប្រសិន​បើ​លោក​បង់​ប្រាក់​​ដល់​អ្នកស្រី សុភាព ចំនួន​២០.០០០ដុល្លារ​បន្ថែមទៀត។

លោក​​បាន​​និយាយ​​ថា “ខ្ញុំ​បាន​យល់​ព្រម​ ហើយ​បាន​បង់​ប្រាក់​នោះ​ឲ្យ​អ្នកស្រី ប៉ុន្តែ​នៅ​ពេល​ខ្ញុំ​មក​ធ្វើ​ការ​អ្នក​ស្រី​បាន​និយាយ​ថា អ្នកស្រី​បាន​លក់​ការ​យក​ភាស៊ី​នេះ​ទៅ​ឲ្យ​អ្នក​ផ្សេង​ទៅហើយ​”។

លោក ខៀវ តុលា មេធាវី​តំណាង​អ្នក​ស្រី សុភាព បាន​បដិសេធ​មិន​ធ្វើ​អត្ថាធិប្បាយ​អំពី​ករណីនេះ​ទេ។ ប៉ុន្តែ​ កូនស្រី​របស់​​អ្នកស្រី​ សុភាព បាន​បដិសេធ​ការ​ចោទ​ប្រកាន់នេះ។

រ័ត្ន កន្និកា អាយុ​២២​ឆ្នាំ​ បាន​និយាយ​ថា ម្ដាយ​របស់​នាង​ត្រូវ​បាន​ចាប់​ខ្លួន​កាលពី​ថ្ងៃ​សុក្រ ហើយ​ទុក​ពេល​ឲ្យ​រហូត​មក​​ដល់​ថ្ងៃ​ម្សិលមិញ​នេះដើម្បី​បង់​ប្រាក់​ចំនួន​១៤០.០០០​ដុល្លារ​ទៅ​ឲ្យ​លោក មុនី។

កន្និកា បាន​និយាយ​ថា ” ម្ដាយ​របស់​ខ្ញុំ​បាន​យល់​ព្រម​បង់​ប្រាក់​ចំនួន​២០.០០០​ដុល្លារ​ទៅ​ឲ្យ​ដើម​ចោទ ហើយ​ដើមចោទ​​ក៏​បានទទួល​ផ​ងដែរ​។ ខ្ញុំ​មិន​យល់​ថា តើ​ហេតុអ្វី​បាន​ជា​តុលាការ​មិន​ទទួល​យកទៅវិញ​។ ពួកគេ​ចង់តែ​ចាប់​ម្ដាយ​របស់​ខ្ញុំ​ដាក់​គុក​”។ នាង​បាន​​និយាយ​ថា ” វា​មិន​យុត្តិធម៌​ចំពោះ​គ្រួសារ​របស់​យើង​ទេ ពីព្រោះ​ម្ដាយ​របស់​ខ្ញុំ​មិន​បាន​ឆបោក​ប្រាក់​ច្រើន​ដូច​ពួកគេ​ចោទ​ប្រកាន់​គាត់​ឡើយ​”៕ សារុន​​​​​​​

 

© 2023, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស