30 C
Phnom Penh

តុលាការ​​​សាក​​​សួរ​​​កូន​​​ប្រុស​​​ប្រធាន​​​មន្ទីរ​​​អភិវឌ្ឍ​​​ន៍​​​ជន​​​បទ​​​​​​ខេត្ត​​​ប៉ៃលិន​​​ជុំ​​​វិញ​​​​​​រូប​​​បរបាញ់​​​សត្វ​​​ខុស​​​ច្បាប់​​​

ដោយ ឌឹ ខេមបូឌា ដេលី

បទវិភាគ

​​​មន្ត្រី​​​និយាយ​​​ថា កាល​​​ពី​​​ម្សិលមិញ សាលា​​​ដំបូង​​​ខេត្ត​​​ប៉ៃលិន​​​បាន​​​កោះ​​​ហៅ​​​កូន​​​ប្រុស​​​វ័យ​​​២៣​​​ឆ្នាំ​​​ របស់​​​ប្រធាន​​​មន្ទីរ​​​អភិវឌ្ឍន៍​​​ខេត្ត​​​នេះ​​​ទៅ​​​សាក​​​សួរ​​​ជុំ​​​វិញ​​​រូប​​​ថត​​​បង្ហោះ​​​តាម​​​ហ្វេសប៊ុក​​​កាល​​​ពី​​​សកម្ម​​​ភាព​​​ខែ​​​មុន​​​ ដែល​​​បង្ហាញ​​​ពី​​យុវជន​​​រូប​​​នេះ​​​​​​កាន់​​​កាំភ្លើង​​​វែង​​​ និង​​​បង្ហាញ​​​ពី​​​សត្វព្រៃ​​​ការពារ​​​ដែល​​​ត្រូវ​​​បាន​​​គេ​​​សម្លាប់​​​។​​​

លោក ជុំ​​​ សែន​​​សុធា ព្រះ​​​រាជ​​​អាជ្ញា​​​អម​សាលា​​​ដំបូង​​​ខេត្ត​​​ប៉ៃលិន ​​​បាន​​​មាន​​​ប្រសាសន៍​​​ថា សាលា​​​ដំបូង​​​បាន​​​កោះ​​​ហៅ​​​យុវជន គឿន ណាំ​​​ឆូក កាល​​​ពី​​​ថ្ងៃ​​​ទី​​​២៨​​​ ខែ​​​កក្កដា បន្ទាប់​​​ពី​​​នគរ​​​បាល​​​សើុប​​​អង្កេត​​​លើ​​​រូប​​​ថត​​​ទាំង​​​នោះ​​​ ដែល​​​ជន​​​សង្ស័យ​​​បាន​​​បង្ហោះ​​​រូប​​​របស់​​​ខ្លួន​​​ជាមួយ​​​ខ្លា​​​ដំបង​​​ងាប់​​​​​​មួយក្បាល កំប្រុក ​​​មួយ​​​ចំនួន​​​ និង​​​ក្តាន់​​​ញ៉ែង​​​ពីរ​​​ក្បាល។

លោក​​​មាន​​​ប្រសាសន៍​​​ថា “យើង​​​នឹង​​​មិន​​​អនុញ្ញាត​​​ឲ្យ​​​នរណា​​​ម្នាក់​​​គេច​​​ផុត​​​ពី​​​ច្បាប់​​​ឡើយ​​​ ប្រសិន​​​បើ​​​យើង​​​រក​​​ឃើញ​​​ថា ពួក​​​គេ​​​មាន​​​ទោស​​​ពី​​​បទ​​​សម្លាប់​​​សត្វ​​​ជិត​​​ផុត​​​ពូជ”។ លោក​​​បាន​​​លើក​​​ឡើង​​​បន្ត​​​ថា អំឡុង​​​ពេល​​​សាក​​​សួរ​​​ ​​​យុវជន គឿន ណាំឆូក បាន​​​បដិសេធ​​​ថា ខ្លួន​​​មិន​​​បាន​​​បរបាញ់​​​សត្វ​​​ទេ​​​។

ព្រះ​​​រាជ​​​អាជ្ញា ជុំ សែន​​​សុធា បាន​​​មាន​​​ប្រសាសន៍​​​ថា តុលាការ​​​នឹង​​​​​​កោះ​​​ហៅ​​​​​​មន្ត្រី​​​រដ្ឋបាល​​​ព្រៃ​​​ឈើ​​​ខេត្ត​​​ និង​​​មន្ទីរ​​​កសិកម្ម​​​ខេត្ត​​​ដើម្បី​​​ប្រមូល​​​ព័ត៌​​​មាន​​​បន្ថែម​​​ទៀត​​ពាក់​​​ព័ន្ធ​​​នឹង​​​ករណី​​​នេះ។ មុន​​​ពេល​​​បដិសេធ​​​មិន​​​ធ្វើ​​​អត្ថាធិប្បាយ​​​បន្ថែម​​​ទៀត​​​ លោក​​​បាន​​​មាន​​​ប្រសាសន៍​​​ថា  “សំណុំ​​​រឿង​​​នេះ​​​​​​កំពុង​​​ដំណើរ​​​ការ​​​ទៅ​​​មុខ​​​ ប៉ុន្តែ ការ​​​សើុប​​​អង្កេត​​​កំពុង​​​បន្ត​​​នៅ​​​ឡើយ​​​”។

លោក​​​ គឹម សុខា ប្រធាន​​​មន្ទីរ​​​បរិស្ថាន​​​ខេត្ត​​​ប៉ៃលិន​​​បាន​​​មាន​​​ប្រសាសន៍​​​ថា លោក​​​បាន​​​លើក​​​ឡើ​​​ងថា លោក​​​​បាន​​​ស្គាល់​​​អត្ត​​​សញ្ញាណ​​​កសិករ​​​ប្រហែល​​​១០​​​នាក់​​​ នៅ​​​​​​ក្នុង​​​តំបន់​​​ដែល​​​កំពុង​​​ដាក់​​​អន្ទាក់​​​សត្វព្រៃ​​​ជិត​​​ផុត​​​ពូជ​​​ ហើយ​​​លក់​​​សាច់​​​ឲ្យទៅ​​​ភោជនីយ​​​ដ្ឋាន​​​ក្នុង​​​ក្រុង​​​ប៉ៃលិន​​​។

ប៉ុន្តែ លោក​​​បាន​​​មាន​​​ប្រសាសន៍​​​ថា ទាហាន​​​កង​​​យោធពល​​​ខេមរភូមិន្ទ​​​​​​ជា​​​អ្នក​​​បង្ក​​​ការ​​​គំរាម​​​កំហែង​​​ធំ​​​បំផុត​​​ចំពោះ​​​សត្វ​​​ព្រៃ​​​ការ​​​ពារ​​​ក្នុង​​​តំបន់​​​នោះ​​​។

លោក​​​មាន​​​ប្រសាសន៍​​​ទៀត​​​ថា “អ្នក​​​បរបាញ់​​​សត្វព្រៃ​​​ការពារ​​​ភាគ​​​ច្រើន​​​ជា​​​ទាហាន​​​​​​ឈរ​​​ជើង​​​នៅ​​​តាម​​​បណ្តោយ​​​ព្រំ​​​ដែន​​​ [កម្ពុជា​​​-ថៃ​​​]​​​ ហើយ​​​វា​​​ពិត​​​ជា​​​ពិបាក​​​បញ្ឈប់​​​ពួក​​​គេ​​​ណាស់​​​ ពី​​​ព្រោះ​​​ពួក​​​គេ​​​​​​មាន​​​អាវុធ ហើយ​​​ពេល​​​ខ្លះ​​​ពួក​​​គេ​​​តប​​​ត​​​នៅ​​​ពេល​​​មន្ត្រី​​​របស់​​​យើង​​​ព្យាយាម​​​បង្ក្រាប​​​”។

យុវជន គឿន ណាំឆូក  ដែល​​​បាន​​​សារភាព​​​ថា ខ្លួន​​​បាន​​​បង្ហោះ​​​រូប​​​ថត​​​ទាំង​​​នេះ​​​តាម​​​ហ្វេស​​​ប៊ុក​​​ដោយ​​​ខ្លួន​​​ឯង​​​ បដិសេធ​​​ថា រូប​​​គេ​​​​​​មិន​​​បាន​​​សម្លាប់​​​សត្វ​​​ទាំង​​​នេះ​​​ទេ។

យុវជន​​​រូប​​​នេះ​​​បាន​​​និយាយ​​​ទៀត​​​ថា “តុលាការ​​​បាន​​​សួរ​​​ខ្ញុំ​​​ថា រូប​​​ថត​​​ទាំង​​​នេះ​​​ថត​​​នៅ​​​កន្លែង​​​ណា ខ្ញុំ​​​បាន​​​ប្រាប់​​​ពួក​​​គាត់​​​ថា រូប​​​ថត​​​ទាំង​​​នោះ​​​ថត​​​នៅ​​​ចម្ការ​​​មួយ​​​កន្លែង​​​ក្នុង​​​សង្កាត់​​​បរយ៉ាខា ក្រុង​​​ប៉ៃលិន​​​។ តុលាការ​​​បាន​​​សួរ​​​ខ្ញុំ​​​ថា ‘តើ​​​ខ្ញុំ​​​បាន​​​សម្លាប់​​​សត្វព្រៃ​​​ដោយ​​​កាំភ្លើង​​​នេះ​​​ឬ?’​​​ ខ្ញុំ​​​បាន​​​ប្រាប់​​​ពួក​​​គាត់​​​ថា ខ្ញុំ​​​មិន​​​ដែល​​​សម្លាប់​​​សត្វ​​​ព្រៃ​​​ទេ។ តុលាការ​​​បាន​​​ប្រាប់​​​ខ្ញុំ​​​ថា ទោះ​​​បី​​​ជា​​​ខ្ញុំ​​​មិន​​​បាន​​​​​​សម្លាប់​​​សត្វ​​​ទាំង​​​នេះ​​​ក៏​​​ដោយ​​​ ក៏​​​ខ្ញុំ​​​នៅ​​​តែ​​​មាន​​​ទោស​​​ដដែល​​​ពី​​​បទ​​​ការ​​​ប្រើ​​​ប្រាស់​​​កាំភ្លើង​​​ខុស​​​ច្បាប់​​​”៕សុខុម​​​​​​​​​

​​​

 

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស