34 C
Phnom Penh

លោក​នាយក​រដ្ឋ​មន្ត្រី​បង្គាប់​ឲ្យរដ្ឋមន្ត្រី​ក្រសួងធម្មការ​និង​សាសនាតាម​ដាន ធាន វុទ្ធី​

ដោយ ឌឹ ខេមបូឌា ដេលី

បទវិភាគ

លោក​នាយក​រដ្ឋ​មន្ត្រី ហ៊ុន សែន បាន​លើក​ឡើង​ពី​ករណី​ដ៏​ចម្លែក​ទាក់​ទង​បុរស​ម្នាក់​ ដែល​អាង​ថា​ជា “ព្រះ” ដោយ​បង្គាប់​ឲ្យ​លោក​ មិន ឃិន រដ្ឋមន្ត្រី​ក្រសួង​ធម្មការ​ និង​សាសនា​តាម​ដាន​ឲ្យ​បាន​ដិត​ដល់អំពី​ស្ថានភាព​នេះ។

ធាន វុទ្ធី ដែល​ស្លៀក​ស​ពាក់​ស​ ហើយ​អង្គុយ​លើ​បល្ល័ង្ក​​ព្រះ​ពុទ្ធ ​ដែល​តាំង​ខ្លួន​ជា​ព្រះ​សិ​អារ្យ​មេត្រី​យ៍​ រូប​នេះ​យក​ចេញ​ពី​សង្គម​ហ្វេស​បុក​។
ធាន វុទ្ធី ដែល​ស្លៀក​ស​ពាក់​ស​ ហើយ​អង្គុយ​លើ​បល្ល័ង្ក​​ព្រះ​ពុទ្ធ ​ដែល​តាំង​ខ្លួន​ជា​ព្រះ​សិ​អារ្យ​មេត្រី​យ៍​ រូប​នេះ​យក​ចេញ​ពី​សង្គម​ហ្វេស​បុក​។

អាជ្ញាធរ​បាន​លើក​ឡើង​ថា ធាន វុទ្ធី ដែល​ស្លៀក​ស​ពាក់​ស​ ហើយ​អង្គុយ​លើ​បល្ល័ង្ក​​របស់​ព្រះ​ពុទ្ធ បាន​បោ​ក​ប្រាស់​អ្នក​គាំទ្រ​របស់​ខ្លួន​យកប្រាក់​អស់​ជាច្រើន​​ ដោយអះអាង​ថា ខ្លួន​ជា​ព្រះសិអារ្យ​មេត្រី​យ៍។

ធាន វុទ្ធី ដែល​ស្ថិត​នៅ​ស្រុក​កោះ​ធំ ខេត្ត​កណ្ដាល ប៉ុន្តែ​ទំនង​ជា​បាន​រត់គេច​ខ្លួន​​បន្ទាប់​ពី​ក្រសួង​ធម្មការ និង​សាសនា​បាន​ចេញ​សេចក្ដី​ជូន​ដំណឹង​កាលពី​សប្ដាហ៍​មុន​ថា ការ​អះអាង​របស់​ជននេះ​ធ្វើ​ឲ្យប៉ះពាល់​​ធ្ងន់​ធ្ងរ​ដល់​តម្លៃ​ព្រះពុទ្ធ​សាសនា ដែល​ជា​សាសនា​របស់​រដ្ឋ​។

ថ្លែងនៅពិធី​ប្រគល់​សញ្ញាបត្រ​​ដល់​និស្សិត​​សាកល​​វិទ្យា​ល័យ​នៅកោះពេជ្រ លោក​នាយក​រដ្ឋមន្ត្រី​បាន​សម្ដែង​ការ​ភ្ញាក់​ផ្អើល​ដែល​ថា ធាន វុទ្ធី អា​ច​បោក​ប្រាស់​ប្រជាពល​រដ្ឋ​ រួម​ទាំង​ព្រះ​សង្ឃ​កើត​​នៅ​ក្នុង​សម័យ​បច្ចេកវិទ្យា​បច្ចុប្បន្ននេះ​។

លោក​ ហ៊ុន សែន បាន​មាន​ប្រសាសន៍​ថា ” សូម្បី​ព្រះ​មហាក្សត្រ​ក៏ថ្វាយ​បង្គំ​ព្រះ​សង្ឃ​ដែរ ហេតុ​អ្វី​បាន​ជា​ព្រះ​សង្ឃ​ទាំង​នេះ​ថ្វាយ​បង្គំ​ជន​នោះ​ទៅ​វិញ?។ រឿង​ខ្លះ​ប្រជាពល​រដ្ឋ​គួរ​ជឿ​ ប៉ុន្តែ​​ពួកគាត់​មិន​​ជឿ​។ រឿង​នេះ​ប្រជា​ពល​រដ្ឋ​មិន​គួរ​ជឿ​ ប៉ុន្តែ​ពួកគាត់​បែរ​ជា​ជឿ​ទៅវិញ”។

លោក ហ៊ុន សែន ក៏​បាន​ប្រាប់​ឲ្យ​លោក មិន ឃិន រដ្ឋមន្ត្រីក្រសួង​ធម្មការ​​ និង​សាសនា​តាម​ដាន​ករណី​នេះ​ផងដែរ។

លោក សេង សុមុនី អ្នក​នាំពាក្យ​ក្រសួង​ធម្មការ​ និង​សាសនា​ បាន​មាន​ប្រសាសន៍​ថា ក្រសួង​​​មិន​មាន​ព័ត៌មាន​អំពី​កន្លែង​លាក់​ខ្លួន​របស់ ធាន វុទ្ធី ទេ។ លោក​បាន​មាន​​ប្រសា​សន៍​​ថា ” យើង​​បាន​​បង្កើត​គណៈ​កម្មការ​បី​ឲ្យ​ពិនិត្យ​បញ្ហា​ទាក់​ទង​នឹង​ ធាន វុទ្ធី រួម​ទាំង​ដីវត្ត​ផង​ដែរ​”។​​ លោក​បាន​បន្ថែម​ថា ” យើង​មិនទាន់ប្រាកដ​ថា តើ​គាត់​បាន​ធ្វើ​អ្វី​ខុស​ទាក់​ទង​ទៅ​​ច្បាប់​សាសនា​ និង​ច្បាប​់​រដ្ឋនៅ​ឡើយ​ទេ ដូច្នេះយើង​កំពុង​ស៊ើប​អង្កេត​ករណី​នេះ​”។

លោក អា៊វ ចំរើន ស្នង​ការ​នគរ​បាល​ខេត្ត​កណ្ដាល​បាន​មាន​ប្រសាសន៍​ថា ធាន វុទ្ធី ត្រូវ​បាន​កោះ​ហៅ​ឲ្យមក​កាន់​ក្រសួង​ធម្មការ និង​សាសនា​ ដើម្បី​បញ្ជាក់​អំពី​សកម្មភាព​របស់​គាត់ ប៉ុន្តែ​មិន​ដែល​មក​ទេ​។ លោក ចំរើន បាន​មាន​ប្រសាសន៍​ថា នគរ​បាល​កំពុង​ធ្វើការ​ស៊ើប​អង្កេត​ ប៉ុន្តែ​បាន​បដិសេធ​មិន​ផ្ដល់​ព័ត៌​មាន​លម្អិត​បន្ថែម​ឡើយ​។

វត្ត​ទួលរាជា​ត្រូវ​បាន​អាជ្ញា​ធរ​ចូល​ទៅ​ឆែក​ឆេរ​កាលពី​សប្ដាហ៍​មុន ហើយ​​ដកហូត​បាន​វត្ថុតាង ជាច្រើន​ពាក់​ព័ន្ធ​សាសនា​​ រួម​ទាំង​រូប​ថត និង​វីដេអូ​ជាដើម​។

យោងតាម​បណ្ដាញ​ព្រះ​សង្ឃ​ឯករាជ្យ​បាន​ឲ្យ​ដឹង​ថា ធាន វុទ្ធី បាន​សាង​សង់​វត្ត​នេះ​កាល​ពី​ឆ្នាំ​២០០៨​។ ក្រសួង​ធម្មការ និង​សាសនា​បាន​លើក​ឡើង​ថា ដំបូង​ ធាន វុទ្ធី បាន​បួស​ជា​តាបស​តាំង​ពី​ឆ្នាំ​១៩៩២​ ហើយ​ធ្លាប់​​ត្រូវ​បាន​ព្រមាន​អំពី​សកម្មភាព​របស់​ខ្លួន​ផងដែរ​៕ សារុន​​​​​​​​​

 

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស