ព្រះមហាក្សត្រ នរោត្តម សីហមុនី បានធ្វើជាអធិបតីក្នុងពិធីមួយនៅព្រះបរមរាជវាំងកាលពីរសៀលម្សិលមិញ ដើម្បីឲ្យតំណាងរាស្ត្រជាប់ឆ្នោត៥៥រូបរបស់គណបក្សសង្គ្រោះជាតិស្បថចូលកាន់តំណែង គឺមានរយៈពេលជាង១០ខែ បន្ទាប់ពីព្រះអង្គបានកោះប្រជុំរដ្ឋសភា ចំពេលមានការតវ៉ាដ៏ធំពីគណបក្សប្រឆាំង។
ដោយគ្មានបន្លាលួស និងកងរាជអាវុធហត្ថបិទផ្លូវនៅកណ្ដាលក្រុងភ្នំពេញដូចកាលពីខែកញ្ញា នៅពេលដែលលោកនាយករដ្ឋមន្ត្រី ហ៊ុន សែន ដឹកនាំតំណាងរាស្ត្រ៦៨រូបរបស់លោកស្បថចូលកាន់តំណែងនោះ តំណាងរាស្ត្រគណបក្សប្រឆាំង៥២រូបក្នុងចំណោមតំណាងរាស្ត្រគណបក្សប្រឆាំងទាំងអស់បានមកដល់រដ្ឋសភានៅម៉ោង៣រសៀលសម្រាប់ពិសាតែ និងអាហារសម្រន់ដែលត្រៀមទុករួច។
តំណាងរាស្ត្រដែលពាក់អាវធំពណ៌ស និងសំពត់ចងក្បិនពណ៌ខៀវនិងពណ៌ស្វាយ បានដើរចូលទៅក្នុងអាហារដ្ឋានរបស់រដ្ឋសភា ដើម្បីទៅយកកញ្ចប់ផ្លាកលេខរដ្ឋសភាសម្រាប់រថយន្តរបស់ពួកគាត់។
នៅខាងក្នុងអគាររដ្ឋសភា តំណាងរាស្ត្រទាំងនោះពិសានំតូចៗ និងជួយតម្រង់សំពត់ចងក្បិនគ្នាទៅវិញទៅមក ហើយយូរៗម្តងបានដើរចេញពីបន្ទប់យកកញ្ចប់របស់ខ្លួនទៅឲ្យសមាជិកគ្រួសារ។
លោក សុន ឆ័យ ប្រធានក្រុមតំណាងរាស្ត្រគណបក្សសង្គ្រោះជាតិបានប្រាប់អ្នកយកព័ត៌មានថា កិច្ចព្រមព្រៀងកាលពីខែមុនសម្រាប់ឲ្យគណបក្សប្រឆាំងបញ្ចប់ពហិការរបស់ខ្លួននោះ គឺជាកិច្ចព្រមព្រៀងល្អមួយសម្រាប់គណបក្សលោក ហើយលោកបានបដិសេធថា ការជាប់ពន្ធនាគាររបស់តំណាងរាស្ត្រជាប់ឆ្នោតប្រាំពីររូបរបស់គណបក្សនេះកាលពីខែមុននោះ មិនមានឥទ្ធិពលដល់ការសម្រេចចិត្តរបស់ខ្លួនទេ។
លោក សុន ឆ័យ បានមានប្រសាសន៍ថា ” យើងបាននិងកំពុងធ្វើការលើរឿងនេះជាច្រើនខែមកហើយ ហើយយើងបានរង់ចាំរហូតដល់យើងទទួលបានលក្ខខណ្ឌគ្រប់គ្រាន់ដើម្បីអនុញ្ញាតឲ្យយើងធ្វើការបាន ដូច្នេះហើយយើងបានចូលរួមតែម្ដង។ ដូច្នេះ មិនមានសម្ពាធណាមួយធ្វើឲ្យយើងសម្រេចចិត្តស្បថចូលកាន់តំណែងនៅថ្ងៃនេះទេ”។
លោក សុន ឆ័យ ដែលបានគាំទ្រជាច្រើនខែមកហើយឲ្យគណបក្សសង្គ្រោះជាតិបញ្ចប់ការធ្វើពហិការរបស់ខ្លួននោះ ក៏បានមានប្រសាសន៍ដែរថា រដ្ឋសភាគ្រោងបើកសម័យប្រជុំពិសេសមួយនៅថ្ងៃសុក្រ ដោយតំណាងរាស្ត្រ៥៥រូបរបស់គណបក្សសង្គ្រោះជាតិនឹងចូលរួមជាមួយតំណាងរាស្ត្រ៦៨រូបរបស់គណបក្សប្រជាជនកម្ពុជាជាលើកដំបូង។
ប្រហែលកន្លះម៉ោងក្រោយមក តំណាងរាស្ត្រទាំង៥២រូបបានចេញពីអាហារដ្ឋានឆ្ពោះទៅជណ្ដើរខាងមុខ។
នៅទីនោះតំណាងរាស្ត្រទាំង៥២រូបបានជួបលោក សម រង្ស៊ី ប្រធានគណបក្សសង្គ្រោះជាតិ លោកស្រី ជូឡុង សូ៊ម៉ូរ៉ា តំណាងរាស្ត្រជាប់ឆ្នោតមណ្ឌលភ្នំពេញ ដែលជាភរិយារបស់លោក សម រង្ស៊ី និងលោក កឹម សុខា អនុប្រធានគណបក្សសង្គ្រោះជាតិ។
បន្ទាប់ពីបានឈរថតរូបជាមួយគ្នា តំណាងរាស្ត្រទាំងនេះបានឡើងជិះរថយន្តទួរីសទៅកាន់ព្រះបរមរាជវាំង។ មានតែអ្នកយកព័ត៌មានមកពីទូរទស្សន៍ជាតិកម្ពុជាទេ ត្រូវបានអនុញ្ញាតឲ្យចូលខាងក្នុងព្រះបរមរាជវាំង។
តំណាងរាស្ត្រទាំងនេះបានស្បថនៅចំពោះព្រះភក្ដ្រ ព្រះមហាក្សត្រ សីហមុនី ដែលបានឡើងគ្រងរាជតាំងពីខែតុលា ឆ្នាំ២០០៤ បន្ទាប់ពីព្រះបរមរតនកោដ្ឋសម្ដេចឪ នរោត្តម សីហនុ បានដាក់រាជភ្លាមៗបន្ទាប់ពីមានការបញ្ចប់ភាពទាល់ច្រកក្រោយការបោះឆ្នោតស្រដៀងគ្នានេះ។
តំណាងរាស្ត្រគណបក្សសង្គ្រោះជាតិបានចាកចេញពីព្រះបរមរាជវាំងជាមួយគ្នា មុនម៉ោង៥ល្ងាចបន្តិច។
លោក សម រង្ស៊ី បានប្រាប់អ្នកយកព័ត៌មានពីកៅអីក្រោយនៃរថយន្តរបស់លោកនៅពេលចាកចេញពីក្លោងទ្វារព្រះបរមរាជវាំងថា ” យើងបានបំពេញកាតព្វកិច្ចរបស់យើងហើយ”។
លោក កឹម សុខា បានមានប្រសាសន៍ថា តំណាងរាស្ត្រគណបក្សនេះ ឥឡូវនេះមានលទ្ធភាពប្រសើរជាងមុនក្នុងការជួយអ្នកគាំទ្ររបស់ខ្លួន។ អ្នកគាំទ្រជាច្រើនមានការសង្ស័យលើការសម្រេចចិត្តបញ្ចប់ការធ្វើពហិការរបស់គណបក្សនេះ ដោយសារមានការឆ្លើយតបទៅនឹងការទាមទារដំបូងរបស់ខ្លួនតែមួយផ្នែកតូចប៉ុណ្ណោះ។
លោកបានមានប្រសាសន៍ថា “យើងបានបំពេញនូវអ្វីដែលយើងបានសន្យា។ យើងមានអភ័យឯកសិទ្ធិ និងអាចតវ៉ាដោយអហិង្សា។ គ្មានតុលាការណាអាចគំរាមកំហែងយើង ឬបំភិតបំភ័យយើងទៀតទេ ពីព្រោះយើងមានអភ័យឯកសិទ្ធិ”។
លោក សម រង្ស៊ី ក៏បានប្រាប់អ្នកយកព័ត៌មានដែរថា ពេលនេះលោកសង្ឃឹមថា នឹងមានការដោះលែងមេដឹកនាំយុវជនគណបក្សសង្គ្រោះជាតិបីនាក់ ដែលត្រូវបានចាប់ដាក់ពន្ធនាគារកាលពីថ្ងៃសៅរ៍ ពីបទចូលរួមចលនាកុបកម្មនៅក្នុងការវាយតប់គ្នាតាមផ្លូវកាលពីថ្ងៃទី១៥ ខែកក្កដា ដូចគ្នានេះជាមួយសន្តិសុខខណ្ឌ ហើយបាននាំឲ្យមានការឃុំខ្លួនតំណាងរាស្ត្រគណបក្សសង្គ្រោះជាតិប្រាំពីររូបមួយរយៈពេលខ្លីកាលពីខែមុន។
លោក សម សុគង់ មេធាវីរបស់សកម្មជនយុវជនទាំងបីនាក់ គឺ ឃិន ជំរឿន អាយុ៣២ឆ្នាំ នាង សុឃុន អាយុ២៨ឆ្នាំ និង សាន គឹមហេង អាយុ២៨ឆ្នាំ បាននិយាយថា លោកមិនទាន់បានឮដំណឹងមកវិញអំពីសំណើសុំនៅក្រៅឃុំទេ។ លោក កែវ មុនី ចៅក្រមសាលាដំបូងរាជធានីភ្នំពេញមិនអាចទាក់ទងបានទេ។
លោក ជាម យៀប អ្នកនាំពាក្យគណបក្សប្រជាជនកម្ពុជាបានមានប្រសាសន៍តាមទូរស័ព្ទថា លោកស្វាគមន៍សហការីថ្មីរបស់លោក។លោកបានមានប្រសាសន៍ថា ” តាងនាមឲ្យតំណាងរាស្ត្ររបស់គណបក្សប្រជាជនកម្ពុជា យើងស្វាគមន៍តំណាងរាស្ត្រទាំង៥៥រូបរបស់គណបក្សសង្គ្រោះជាតិដែលបានស្បថចូលកាន់តំណែងនៅរសៀលនេះនៅព្រះបរមរាជវាំង”។
លោកបានមានប្រសាសន៍ទៀតថា ” បន្ទាប់ពីស្បថចូលកាន់តំណែងរួចហើយ ពួកគាត់មានសិទ្ធិពេញលេញក្នុងការទទួលយកអភ័យឯកសិទ្ធិសភា និងអាសនៈរបស់ពួកគាត់នៅក្នុងរដ្ឋសភាចាប់ពីពេលនេះទៅ”៕ គឹមហឿន