31 C
Phnom Penh

តុលាការ​សាក​សួរ​មន្ត្រី​នគរបាលម្នាក់​បន្ទាប់​ពី​ត្រូវ​បាន​ចាប់​ខ្លួន​ចំពោះ​ការ​ដឹក​ឈើ​ខុស​ច្បាប់

ដោយ ឌឹ ខេមបូឌា ដេលី

បទវិភាគ

មន្ត្រី​នគរ​បាល​ខេត្ត​ម្នាក់​បាន​បង្ហាញ​ខ្លួន​សម្រាប់​ការ​សាក​សួរ​នៅ​តុលាការ​ខេត្ត​ប៉ៃលិន​ កាលពី​ម្សិលមិញ បន្ទាប់​ពី​កង​រាជ​អាវុធ​ហត្ថ​ដែល​ទទួល​បាន​ព័ត៌​មាន​ពី​​អង្គការ​ក្រៅ​រដ្ឋាភិបាល​ផ្នែក​សត្វព្រៃ​មួយ​ ដែល​តារាភាពយន្ត​អាមេរិក​ លោកស្រី អ៊ែនជេលីណា ជូលី បាន​បង្កើត​ឡើង​នោះ​ ចាប់​បាន​មន្ត្រី​នេះ​ពេល​កំពុង​ដឹកឈើ​គ្រញូង​ខុស​ច្បាប់​ជាង​១៧៧​គីឡូក្រាម​ កាលពី​ថ្ងៃ​​អាទិត្យ​។

លោក​ សោ ផល្លា ​ត្រូវ​បាន​ចាប់​ខ្លួន​កាលពី​វេលា​ម៉ោង​៤​ល្ងាច​ថ្ងៃ​អាទិត្យ​នៅ​ក្នុង​ក្រុង​ប៉ៃលិន ពេល​កំពុង​បើក​បរ​រថយន្ត​តូយ៉ូតាកាមរី​របស់​គាត់​ដឹក​ឈើ​មាន​តម្លៃ​។

លោក សៀង វណ្ណដន មេបញ្ជាការរង​កងរាជ​អាវុធ​ហត្ថ​ខេត្ត​បាន​និយាយ​ថា មន្ត្រី​របស់​លោក​ប្រាំមួយ​នាក់​ត្រូវ​បាន​ដាក់​ឲ្យ​ស្ទាក់​ចាប់​បន្ទាប់ពី​មាន​ការ​ផ្ដល់​ព័ត៌មាន​ពី​មន្ត្រី​នៅ​មូលនិធិ​ ម៉ាដុក ជូលី ភីត (MJP)នៅ​ស្រុក​សំឡូត ជា​អង្គការ​ដែល​ផ្ដល់​ការ​គាំទ្រ​ដល់​ការ​អនុវត្ត​ច្បាប់​ និង​ការ​ឃ្លាំ​មើល​សត្វ​ព្រៃ​។ មូលនិធិ​នេះ​បាន​ទូរស័ព្ទ​​ប្រាប់​មន្ត្រី​ដែល​ខ្លួន​ធ្វើការ​ជាមួយ​ឲ្យ​តាម​លោក ផល្លា។

លោក ចាន់ សុជាតិ​ អនុ​ប្រធាន​ផ្នែក​អនុវត្ត​ច្បាប់​នៅ​មូលនិធិ​ MJP បាន​និយាយ​ថា “បន្ទាប់​ពី​យើង​បានទទួល​ព័ត៌មាន​ពី​អ្នក​ភូមិ​ យើង​បាន​ទូរស័ព្ទ​ប្រាប់​មន្ត្រី​បរិស្ថាន​ កង​រាជ​អាវុធ​ហត្ថ និង​នគរ​បាល​ឲ្យ​តាម​រថយន្ត​នោះ”។

លោក សុជាតិ បាន​និយាយ​ថា រថយន្ត​នគរ​បាល​បី​គ្រឿង​បាន​បើក​ដេញ​តាម​លោក ផល្លា ទៅ​ដល់​ស្រុក​បវេល នៅ​ក្នុង​ខេត្ត​បាត់ដំបង ហើយ​បាន​បញ្ជា​ឲ្យ​គាត់​ឈប់ ប៉ុន្តែ​លោក​បាន​និយាយ​ថា ជន​សង្ស័យ​មិនព្រម​ឈប់​ទេ​។ លោក​ សុជាតិ បាន​ឲ្យ​ដឹង​ទៀត​ថា ” យើង​បាន​ប្រើ​រថយន្ត​បីគ្រឿង​បើក​ដេញ​តាម​រថយន្ត​ជន​នេះ​បញ្ជា​ឲ្យ​គាត់​ឈប់​ដើម្បី​ត្រួត​ពិនិត្យ​រថយន្ត​របស់​គាត់ ប៉ុន្តែ​គាត់​មិន​ព្រម​ឈប់ទេ។ នៅ​ពេល​គាត់​ឃើញ​កម្លាំង​របស់​យើង​ គាត់​បាន​បើក​រថយន្ត​យ៉ាង​លឿន​ចូល​តាម​ផ្លូវ​លំ​​នៅ​ក្នុង​ស្រុក​បវេល”។

ការ​បើក​រថយន្ត​ដេញ​តាម​ក្នុង​ល្បឿន​លឿន​នេះ ជន​សង្ស័យ​បាន​​បើក​កៀរ​ឲ្យ​រថយន្ត​នគរ​បាល​មួយ​គ្រឿង​ធ្លាក់​ផ្លូវ​ចូលទៅ​ក្នុង​បឹង​មួយ​ បណ្ដាល​ឲ្យ​មន្ត្រី​ជិះ​នៅ​ក្នុង​រថយន្ត​នោះ​រង​របួស​ស្រាល។ បន្ទាប់ពី​ប៉ុន​ប៉ង​បិទ​ផ្លូវ​មិន​បាន​សម្រេច​ កង​កម្លាំង​បាន​យ​ក​ដែក​គោល​ដាក់​នៅ​ចំ​កណ្ដាល​ផ្លូវ​ធ្វើ​ឲ្យ​បែក​កង់​រថយន្ត​របស់លោក ផល្លា។

លោក សុជាតិ បាននិយាយ​ថា ” ប្រហែល​១ម៉ោង​​បន្ទាប់ពី​យើង​មិន​អាច​បញ្ឈប់​រថយន្ត​របស់​ជន​សង្ស័យ​បាន​ យើង​បាន​បោះ​ដែក​គោល​នៅ​លើ​ក្ដារ​យក​ទៅ​ដាក់​នៅ​លើ​ផ្លូវ​ ដើម្បី​ទម្លុះ​កង់​រថយន្តនោះ​”។

លោក​ ចិត្រ វណ្ណនី ស្នង​ការ​រង​នគរ​បាល​ខេត្ត​បាន​និយាយ​ថា លោក​ ផល្លា មិន​សូវ​ឃើញ​ទៅ​ធ្វើការ​ទេ សូម្បី​តែ​នៅ​មុន​ពេល​គាត់​ត្រូវ​បានឃាត់​ខ្លួននៅ​សប្ដាហ៍​នេះ​។ លោក​បាននិយាយ​ថា “ពីមុន​គាត់​ធ្វើការ​នៅ​ស្នង​ការដ្ឋាន​​នគរ​បាល​ខេត្ត ប៉ុន្តែ​ឥឡូវ​នេះ​ខ្ញុំ​មិន​ដឹង​ទេ។ ចាំ​ខ្ញុំពិនិត្យ​មើល​ម្ដង​ទៀត​សិន​”៕ គឹមហឿន​​​​​​​​​​​​

 

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស