29 C
Phnom Penh

ជន​ជាប់ចោទ​លួច​ព្រះ​សារីរិកធាតុ​ពី​ភ្នំ​ឧដុង្គ​នឹង​ដឹង​វាសនា​របស់ខ្លួននៅ​ខែ​នេះ

ដោយ ឌឹ ខេមបូឌា ដេលី

បទវិភាគ

មន្ត្រី​តុលាការ​ម្នាក់​បាន​និយាយ​ថា បុរស​ប្រាំ​នាក់​ដែល​ជាប់​ពន្ធនាគារ​ដោយ​គ្មាន​ការ​ជំនុំ​ជម្រះ​ទោស​តាំងពី​ខែ​ធ្នូ ជុំវិញ​ការ​លួច​ព្រះ​សារីរិកធាតុ​ពី​ភ្នំ​ឧត្តុង្គ នឹង​ត្រូវ​ចោទ​ប្រកាន់ ឬ ត្រូវ​ដោះលែង​ឲ្យ​រួច​ខ្លួន​នៅ​ត្រឹម​ចុង​ខែ​នេះ។

បុរស​ប្រាំ​នាក់ មាន​ទាំង​សន្តិសុខ​បួន​នាក់​ដែល​គេ​ជួល​ឲ្យ​ការពារ​ព្រះ​សារីរិកធាតុ​ផង ត្រូវ​គេ​ចាប់ដាក់​ពន្ធនាគារ​នៅ​ខេត្ត​កណ្តាល បន្ទាប់ពី​ព្រះ​សារីរិកធាតុ​ត្រូវ​បាន​លួច​ពី​សក្យមុនីចេតី​នៅ​លើ​កំពូល​ភ្នំឧដុង្គ​​ដែលត្រូវសាងសង់អស់ទឹកប្រាក់៤,៥​លាន​ដុល្លារ។ ជន​សង្ស័យ​ទាំងអស់បាន​អះអាង​ម្តង​ហើយ​ម្តង​ទៀតថាខ្លួន​​គ្មាន​ទោស​កំហុស​ទេ។

លោក លឹម ​សុគន្ធា ​ចៅក្រម​​ស៊ើបអង្កេត​នៅ​តុលាការ​ខេត្ត​កណ្តាល មិន​បាន​ផ្តល់​សេចក្តី​លម្អិត​អំពី​ការ​ស៊ើប​អង្កេត​របស់​លោក​ទេ​កាលពី​ម្សិលមិញ ប៉ុន្តែលោក​បាន​មាន​ប្រ​សាសន៍ថា លោក​នឹង​សម្រេច ថាតើ​ត្រូវតុលាការ​កាត់ក្តីពួកគេ​នៅ​ត្រឹម​ចុង​ខែ​សីហា​នេះ​ឬ​យ៉ាងណា។

ចៅក្រម​រូប​នេះ​មាន​ប្រសាសន៍​ថា “ខ្ញុំ​រវល់​ណាស់​ជាមួយ​នឹង​សំណុំ​រឿង​ជាច្រើនទៀត នេះ​មិន​មែន​ជា​សំុណុំ​រឿង​តែ​មួយ​របស់​ខ្ញុំ​ទេ។ យើង​នឹង​ដឹងអំពី​រឿងក្តី​នេះ​នៅ​ចុង​ខែ​នេះ និងថាតើ​​ត្រូវ​បញ្ជូន​ពួកគេ​ទៅជំនុំជម្រះ ឬ​ត្រូវ​ដោះលែង”។

នៅ​ពេល​សុំ​ព័ត៌មាន​បន្ថែម លោក​បាន​មាន​ប្រសាសន៍​ថា “វា​ខុស​វិជ្ជាជីវៈ​ដែល​និយាយ​អំពី​ថាតើពួកគាត់​នឹងត្រូវ​ជំនុំ​ជម្រះ​ទោស ឬត្រូវ​ដោះលែង​នោះ”។

កាល​បរិច្ឆេទ​ជាច្រើន​លើកច្រើនសាកំណត់​ដោយ​ចៅក្រម សុគន្ធា បាន​កន្លង​ផុត​ទៅ​ចាប់តាំងពីបុរស​ទាំង​នោះ​ត្រូវ​បាន​ចាប់​ខ្លួន និង​ចោទ​ប្រកាន់​ពី​បទ​លួច​ព្រះ​សារីរិកធាតុ​​កាលពី​ពាក់​កណ្តាល​ខែ​ធ្នូ។ ឥឡូវនេះ ជន​សង្ស័យ​ទាំងនេះត្រូវ​ជាប់​ឃុំ​បណ្តោះ​អាសន្ន​អស់​រយៈ​ពេល​ជិត​ប្រាំបី​ខែ​មកហើយ។

អ្នក​ជាប់​ឃុំ​ទាំង​ប្រាំ​នាក់គឺ​សន្តិសុខ​ឈ្មោះ ចម ថៃ អាយុ​៥៧​ឆ្នាំ​ សៀង សារិន អាយុ​៥៨​ឆ្នាំ និង​ឈ្មោះ កា សាក់​ អាយុ​៤៦​ឆ្នាំ ហើយ​និង​ប្រធាន​សន្តិសុខ ឈ្មោះ ផា សុខែម អាយុ​៥៩​ឆ្នាំ រួម​ជាមួយ​នឹង​ឈ្មោះ កាន់​ សុភក្តិ​ អាយុ​៣៩​ឆ្នាំ ជា​អ្នក​រត់​ម៉ូតូ​ឌុប​។

ព្រះ​សារីរិកធាតុ​​ត្រូវ​បាន​គេ​រកឃើញនៅ​ផ្ទះ​កសិករឈ្មោះ កែវ រស្មី ក្នុង​ខេត្ត​តាកែវ កាលពី​ខែ​កុម្ភៈ ហើយ​ឥឡូវ​នេះ​ត្រូវ​តម្កល់​ទុក​នៅ​ព្រះ​បរម​រាជ​វាំង។

លោក រស្មី ដែល​នគរបាល​បាន​និយាយ​ថា ជា​ពិរុទ្ធជន​តែ​ម្នាក់​គត់​ក្នុង​ការ​លួច​នេះ នៅ​ជាប់​ក្នុង​ពន្ធនាគារនៅឡើយទេ។

លោក ទឹម តន់ ប្រធាន​សន្តិសុខ​នៅ​សក្យមុនីចេតី​លើ​កំពូល​ភ្នំឧដុង្គ​​​ បាន​មាន​ប្រសាសន៍​កាលពី​ម្សិល​មិញ​ថា ក្រសួង​វប្បធម៌​និង​វិចិត្រ​សិល្ប​បាន​ចាប់​ផ្តើម​​ជួសជុល​សក្យមុនីចេតី​​ដែល​ខូចខាត​ដោយសារ​អំពើ​ចោរ​កម្មនេះហើយ។ “ប្រហែល​នៅពេល​ពួកគេ​ជួសជុល​ហើយ គេ​នឹង​នាំ​យកព្រះ​សារីរិកធាតុ​មក​តម្កល់​ទុក​នៅ​សក្យមុនី​ចេតី​នេះ​វិញ”។ មានិត

 

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស