យោងតាមអ្នកដាំដំណាំម្រេចបានឲ្យដឹងថា អ្នកចម្ការនៅតាមបណ្តាខេត្តដែលដាំដំណាំម្រេចក្នុងប្រទេសកម្ពុជា កំពុងបង្កើនការដាំដំណាំដែលផ្តល់ប្រាក់ចំណេញច្រើននេះកាន់តែខ្លាំងឡើង ក្នុងពេលដែលតម្លៃកៅស៊ូនៅលើទីផ្សារពិភពលោកបានធ្លាក់ចុះក្នុងពេលជាង៦ខែនេះ ដោយដីដែលត្រូវដាំម្រេចបានកើនឡើងទ្វេដងក្នុងតំបន់មួយចំនួន។
យោងតាមលោក យិន សុផា នាយកប្រតិបត្តិក្រុមហ៊ុនអភិវឌ្ឍន៍ដំណាំម្រេចដា-មេមត់បានឲ្យដឹងថា នៅឃុំដា ក្នុងស្រុកមេមត់ ខេត្តត្បូងឃ្មុំ ជាតំបន់មួយក្នុងចំណោមតំបន់ដាំម្រេចច្រើនបំផុត ពោលគឺចំនួនប្រជាពលរដ្ឋដែលធ្វើចម្ការម្រេចបានកើនឡើងពី១.៧៣០គ្រួសារកាលពីឆ្នាំមុនដល់២.៣០០គ្រួសារនៅឆ្នាំនេះ រីឯដីចម្ការដាំដុះបានកើនឡើងទ្វេដងពី៦០០ហិកតាដល់១.២០០ហិកតាផងដែរ។
លោក សុផា បាននិយាយថា អ្នកចម្ការភាគច្រើនបំផុតបានប្តូរពីដំណាំកៅស៊ូមកដំណាំម្រេចវិញ ក្នុងពេលដែលប្រាក់ចំណូលពីកៅស៊ូបានធ្លាក់ចុះដោយសារតម្លៃនៅលើទីផ្សារសាកលលោកក៏ធ្លាក់ចុះដែរ។ ប្រាក់ចំណូលពីការនាំចេញកៅស៊ូក្នុងរយៈពេល៦ខែដើមឆ្នាំនេះបានធ្លាក់ចុះពីរភាគរយ គឺពី៧៦,៥លានដុល្លារមកនៅត្រឹម៧៥លានដុល្លារប៉ុណ្ណោះ។
លោក សុផា បាននិយាយថា “ម្រេចជាផលិតផលកសិកម្មដែលផ្តល់ប្រាក់ចំណូលខ្ពស់ ពីព្រោះតម្រូវការលើពិភពលោកចេះតែកើនឡើង ហើយគេអាចលក់ម្រេចក្នុងតម្លៃខ្ពស់ នៅគ្រាដែលមានប្រទេសមិនច្រើនទេដាំម្រេចនោះ”។
លោកបានមានប្រសាសន៍ថា ផលិតផលម្រេចត្រូវចំណាយប្រាក់ប្រហែល១២.០០០ដុល្លារក្នុងមួយហិកតា ហើយអាចផ្តល់ផលមកវិញរវាង៣៥.០០០និង៥០.០០០ដុល្លារ។បច្ចុប្បន្នផលិតផលម្រេចលក់ក្នុងមួយគីឡូក្រាមតម្លៃប្រហែល១០ដុល្លារ។
អំឡុងការប្រមូលផលឆ្នាំនេះ ពីខែមីនាដល់ខែឧសភា អ្នកចម្ការនៅឃុំដាបេះប្រមូលផលបានប្រហែល៥.000តោន ហើយនៅរដូវបន្ទាប់ គេរំពឹងថានឹងបានផលប្រហែល៦.៥០០តោន។
លោក ងួន ឡាយ ប្រធានសមាគមលើកកម្ពស់ម្រេចកំពតបានមានប្រសាសន៍ថា ខេត្តកែបនិងខេត្តកំពតដែលល្បីម្រេចល្អនោះ ក៏ឃើញមានការកើនឡើងស្រដៀងគ្នាក្នុងការដាំដុះម្រេចដែរ ចំពេលដែលមានការទទួលស្គាល់ជាអន្តរជាតិចំពោះដំណាំរបស់ខ្លួន។
លោក ឡាយ បានមានប្រសាសន៍ថា កាលពីឆ្នាំ២០១៣ មានប្រជាពលរដ្ឋ២៦៥គ្រួសារធ្វើចម្ការម្រេចលើផ្ទៃដី៩០ហិកតាក្នុងខេត្តទាំងពីរធៀបនឹង៣០០គ្រួសារដែលធ្វើចម្ការនៅលើផ្ទៃដី១៥៥ហិកតានៅឆ្នាំនេះ។
លោក ឡាយ បានឲ្យដឹងថា ការយល់ព្រមនិងការអនុម័តកាលពីខែវិច្ឆិកានូវច្បាប់ស្តីអំពីសន្ទស្សន៍សម្គាល់ភូមិសាស្ត្រ (ជាឋានៈត្រូវគេទទួលស្គាល់លើពិភពលោកដែលគេផ្តល់ឲ្យដើម្បីការពារទំនិញល្បីៗ មានប្រភពមកពីតំបន់ណាមួយជាក់លាក់) បានបង្កើនតម្រូវការម្រេចកំពតដែលមានគុណភាពខ្ពស់នេះ។
សមាគមម្រេចនៅពេលថ្មីៗនេះបានទទួលការបញ្ជាទិញចំនួន៦តោនក្នុងមួយឆ្នាំទៅប្រទេសជប៉ុន និងការបញ្ជាទិញពីក្រុមហ៊ុននានានៅអាមេរិក ក្នុងពេលដែលមានតម្រូវការពីអន្តរជាតិខ្លាំងកំពុងដាក់សម្ពាធលើអ្នកផលិត។
លោកឡាយមានប្រសាសន៍ថា “អ្នកបញ្ជាទិញនៅជុំវិញភិភពលោកកំពុងទទួលស្គាល់កាន់តែខ្លាំងឡើងនូវគុណភាពម្រេចរបស់យើង ជាពិសេស ម្រេចកំពត ព្រោះវាជាផលិតផលសម្គាល់ភូមិសាស្ត្រ។ ប៉ុន្តែការផលិតម្រេចមិនអាចបំពេញតាមតម្រូវការបានទេ”៕ មានិត