បុរស​​​ស្លៀក​​​ស​​​ពាក់​​​ស​​​ដែល​​​តាំ​​ង​​​ខ្លួន​​​ជា​​​ព្រះ​​​សិ​​​អារ្យ​​​មេត្រីយ៍ សូម​​​អភ័យ​​​ទោស​​​ចំពោះ​​​ព្រះ​​​សង្ឃ

កាល​​​ពី​​​ម្សិល​​​មិញ បុរស​​​ម្នាក់​​​ដែល​​​អះ​​​អាង​​​ថា ខ្លួន​​​ជា​​​ព្រះ​​​សិ​​​អារ្យ​​​មេត្រីយ៍ បាន​​​ចូល​​​ខ្លួន​​​នៅ​​​ចំពោះ​​​មុខ​​​​​​មន្ត្រី​​សង្ឃ​​​​​​ជាន់​​​ខ្ពស់​​​ និង​​​មន្ត្រី​​​ខេត្ត​​​កណ្តាល​​​ដើម្បី​​​សូម​​​អភ័យ​​​ទោស​​​ចំពោះ​​​ការ​​​ប្រព្រឹត្ត​​​ខុស​​​លើ​​​ប្រជា​​​ពល​​ខ្មែរ​​​។

ធាន វុទ្ធី ដែល​​​ស្លៀក​​​ស​​​ពាក់​​​ស និង​​​អង្គុយ​​​លើ​​​បល្ល័ង្ក​​​​​​ព្រះ​​​ដើម្បី​​​ទទួល​​​ភ្ញៀវ​​​នៅវ​​​ត្ត​​​ទួល​​​រាជា​​​ក្នុង​​​ស្រុក​​​កោះ​​​ធំ​​​​​​ ត្រូវ​​​បាន​​​មន្ត្រី​​​រិះ​​​គន់​​​ខ្លាំង​​​ៗ​​​ជា​​​សាធារណៈ​​​​​​ចំពោះ “ការ​​​ប្រព្រឹត្ត​​​ខុស​​​ធ្ងន់​​​ធ្ងរ​​​ធ្វើ​​​ឲ្យ​​​ប៉ះពាល់​​​ដល់​​​តម្លៃ​​​ព្រះ​​​ពុទ្ធ​​​សាសនា”។

លោក ផៃ ប៊ុន​​​ឈឿន អភិបាល​​​ខេត្ត​​​កណ្តាល​​​បាន​​​មាន​​​ប្រសាសន៍​​​ថា  ធាន វុទ្ធី បាន​​​​​​​​​ចូល​​​​​​ខ្លួន​​​ឆ្លើយ​​​បំភ្លឺ​​​​​​​​​នៅ​​​សាលាខេត្ត​​​កាល​​​ពី​​​ម្សិលមិញ​​​តាម​​​ការ​​​កោះ​​​ហៅ​​​។ លោក​​​មាន​​​ប្រសាសន៍​​​ថា “គាត់​​​បាន​​​សូម​​​ទោស​​​រឿង​​​គ្រប់​​​យ៉ាង​​​ដែល​​​គាត់​​​បាន​​​ប្រព្រឹត្ត​​​ខុស​​​ ធ្វើ​​​ឲ្យ​​​ប្រជា​​​ពល​​​រដ្ឋ​​​ខ្មែរ​​​មិន​​​សប្បាយ​​​ចិត្ត​​​ចំពោះ​​​គាត់​​​”។

លោក​​​បាន​​​​​​មាន​​​ប្រសាសន៍​​​ទៀត​​​ថា បុរស​​​ស្លៀក​​​ស​​​ពាក់​​​ស​​​រូប​​​នេះ​​​ត្រូវ​​​ចូល​​​ខ្លួន​​​ឆ្លើយ​​​បំភ្លឺ​​​នៅ​​​ក្រសួង​​​ធម្មការ​​​និង​​​សាសនា​​​នៅ​​​ថ្ងៃ​​​នេះ ដើម្បី​​​ជួប​​​ជា​​​មួយ​​​លោក មិន ឃិន រដ្ឋ​​​មន្ត្រី​​​ក្រសួង​​​ធម្មការ​​​ និង​​​សាសនា ដើម្បី​​​បក​​​ស្រាយ​​​បន្ថែម​​​​​​ទៀត​​​ចំពោះ​​​ទង្វើ​​​របស់​​​ខ្លួន​​​។

ធាន​​​ វុទ្ធី កំពុង​​​ស្ថិត​​​ក្រោម​​​ការ​​​សុើប​​​អង្កេត​​​ជុំ​​​វិញ​​​ការ​​​អះ​​​អាង​​​ថា បុរស​​​រូប​​​នេះ​​​បាន​​​បោក​​​លុយ​​​ពី​​​អ្នក​​​គោរព​​​បូជា​​​ចំពោះ​​​ខ្លួន​​​។

លោក​​​ ផៃ ​​​ប៊ុន​​​ឈឿន​​​ បាន​​​មាន​​​ប្រសាសន៍​​​ថា “ខ្ញុំ​​​មិន​​​ដឹង​​​ថា គាត់​​​នឹង​​​ត្រូវ​​​ទទួល​​​ការ​​​ផ្តន្ទា​​​ទោស​​​ ឬក៏​​​អត់​​​នោះ​​​ទេ ក្រសួង​​​នឹង​​​សម្រេច​​​រឿង​​​នេះ​​​”។

នៅ​​​ក្នុង​​​​​​វីដេអូ​​​មួយ​​​បង្ហោះ​​​តាម​​​ហ្វេស​​​ប៊ុក​​​ កាល​​​ពី​​​ម្សិល​​​មិញ​​​ ធាន វុទ្ធី បាន​​​សន្យា​​​កែ​​​ប្រែ​​​រចនា​​​បថ និង​​​ការ​​​តុប​​តែង​​​ខុស​​​ទំនង​​​នៅ​​​ក្នុង​​​វត្ត​​​របស់​​​ខ្លួន​​​ ដែល​​​រួម​​​មាន​​​​​​ពុទ្ធ​​ប្ប​​​ដិមា​​​ដ៏​​​ធំ​​​ពីរ​​​ព្រះ​​​អង្គ ដែល​​​ផុស​​​ត្រដែត​​​លើ​​​វា​​ល​​​ស្រែ​​​នៅ​​​ជុំ​​​វិញ​​​នោះ​​​ផង​​​ ប្រសិន​​​បើ​​​ក្រសួង​​​ធម្មការ និង​​​សាសនា​​​​​​បញ្ជា​​​ឲ្យ​​​ធ្វើ​​​ដូច្នោះ​​​។ ធាន​​​ វុទ្ធី និយាយ​​​ថា “សូម​​​អភ័យទោស​​​ឲ្យ​​​ខ្ញុំ​​​ផង នូវ​​​អ្វី​​​ដែល​​​ខ្ញុំ​​​បាន​​​ធ្វើ ខ្ញុំ​​​មិន​​​ដឹង​​​ច្បាស់​​​ថា ខ្ញុំ​​​បាន​​​ធ្វើ​​​ខុស​​​នោះ​​​ទេ ខ្ញុំ​​​ជា​​​មនុស្ស​​​អវិជ្ជា”។

ធាន​​​ វុទ្ធី និយាយ​​​​​​ទៀត​​​ថា មូល​​​ហេតុ​​​តែ​​​មួយ​​​គត់​​​ដែល​​​គាត់​​​​​​មិន​​​បាន​​​ចូល​​​ខ្លួន​​​បក​​​ស្រាយ​​​ចំពោះ​​​ទង្វើ​​​របស់​​​ខ្លួន​​​តាម​​​ការ​​​កោះ​​​ហៅ​​​លើក​​​មុន​​​ៗ​​​ គឺ​​​ដោយសារ​​​គាត់​​​មិន​​​ទទួល​​​បាន​​​ការ​​​ជូន​​​ដំណឹង​​​។ បុរស​​​រូប​​​នេះ​​​បាន​​​និយាយ​​​ទៀត​​​ថា “សូម​​​សម្តេច​​​ព្រះ​​​សង្ឃ​​​រាជ​​​និង​​​ព្រះសង្ឃ​​​នាយក​​​ទាំង​​​អស់​​​​​​អភ័យ​​​ទោស​​​ឲ្យ​​​ខ្ញុំ​​​ផង ហើយ​​​កុំ​​​គិត​​​ថា ខ្ញុំ​​​ព្យាយាម​​​គេច​​​ខ្លួន​​​”។

បុរស​​​ឈ្មោះ ម៉េង លាង ដែល​​​ជា​​​ជំនួយការ​​​របស់​​​លោក ធាន វុទ្ធី បាន​​​និយាយ​​​ថា គាត់​​​មាន​​​គម្រោង​​​ចូល​​​ខ្លួន​​​​​​ឆ្លើយ​​​បំភ្លឺ​​​នៅ​​​ក្រសួង​​​ធម្មការ និង​​​សាសនា​​​នៅ​​​ថ្ងៃ​​​នេះ​​​។ ជំនួយ​​​ការ​​​រូប​​​នេះ​​​និយាយ​​​ថា “គាត់​​​ចង់​​​ឲ្យ​​​ក្រសួង​​​​​​អប់​​​រំ​​​គាត់​​​ចំពោះ​​​អ្វី​​​ដែល​​​គាត់​​​បាន​​​ប្រព្រឹត្ត​​​ខុស​​​នៅ​​​វត្ត​​​នេះ ហើយ​​​គាត់​​​ចង់​​​បក​​​ស្រាយ​​​ប្រាប់​​​​​​ប្រជា​​​ពល​​​រដ្ឋ​​​ចំពោះ​​​អ្វី​​​ដែល​​​គាត់​​​បាន​​​ធ្វើ​​​។ ខ្ញុំ​​​គិត​​​ថា ប្រសិន​​​បើ​​​គាត់​​​មិន​​​សូម​​​អភ័យ​​​ទោស​​​នៅ​​​ពេល​​​នេះ​​​ទេ ក្រសួង​​​​​​នឹង​​​ចោទ​​​ប្រកាន់​​​គាត់​​​ចំពោះ​​​ការ​​​ប្រព្រឹត្ត​​​រឿង​​​ជា​​​ច្រើន​​​មិន​​​ខាន​​​”៕សុខុម​​​​​​​​​