តំណាងកម្មករ និងម្ចាស់រោងចក្រកាត់ដេរសម្លៀកបំពាក់មួយនៅក្នុងទីក្រុងភ្នំពេញ ដែលត្រូវបានភ្លើងឆេះកាលពីខែមុននឹងជួបគ្នានៅក្រសួងការងារនៅថ្ងៃនេះ ដើម្បីព្យាយាមរកដំណោះស្រាយបើកប្រាក់ឲ្យកម្មករ ប៉ុន្តែតំណាងរោងចក្រម្នាក់បាននិយាយថា ពួកគេនឹងមិនធ្វើសេចក្ដីសម្រេចណាមួយទេ រហូតដល់ម្ចាស់រោងចក្រវិលត្រឡប់មកពីក្រៅប្រទេសវិញ។
រោងចក្រ ចេង សេង របស់ចិនដែលផលិតសម្លៀកបំពាក់ឲ្យក្រុមហុ៊ន Kmart ជាក្រុមហ៊ុនលក់រាយរបស់អាមេរិក ត្រូវបានអគ្គិភ័យឆាបឆេះអស់កាលពីថ្ងៃទី២៨ ខែកក្កដា ហើយប្រធានក្រុមការងារជនជាតិចិនរបស់រោងចក្រនេះបានស្លាប់នៅក្នុងអគ្គិភ័យនោះ និងធ្វើឲ្យកម្មករប្រហែល៩០០នាក់បាត់បង់ការងារ។
លោក សៀង យ៉ុត ជាមន្ត្រីផ្នែកច្បាប់នៅសម្ព័ន្ធសហជីពប្រជាធិបតេយ្យកម្មករកាត់ដេរកម្ពុជា ដែលតំណាងឲ្យកម្មករទាំងនោះ បានបញ្ជាក់ពីផែនការរបស់សហជីពលោកក្នុងការចូលរួមប្រជុំនៅថ្ងៃនេះ និងដើម្បីជំរុញឲ្យបើកប្រាក់បំណាច់ការងារសម្រាប់កម្មករ ព្រមទាំងប្រាក់ខែចុងក្រោយរបស់ពួកគេ។
លោកបាននិយាយថា “យើងនឹងទៅក្រសួងការងារដើម្បីចរចារកដំណោះស្រាយសម្រាប់កម្មករ។ យើងចង់ឲ្យក្រសួងការងារប្រញាប់រកដំណោះស្រាយឲ្យកម្មករ ពីព្រោះពួកគេមិនអាចរង់ចាំយូរទៀតបានទេ។ ពួកគេត្រូវការលុយសម្រាប់ការចាយវាយ”។
ម្ចាស់មុនរបស់រោងចក្រនេះ ដែលជាមិត្តភក្ដិរបស់ម្ចាស់បច្ចុប្បន្នបានឲ្យកម្មករខ្ចីលុយប្រហែល៨៥.០០០ដុល្លារកាលពីថ្ងៃច័ន្ទ ដើម្បីជួយសម្រួលដល់ការលំបាករបស់ពួកគេ ប៉ុន្តែកម្មករនិយាយថា ពួកគេនៅតែចង់បានប្រាក់ខែចុងក្រោយ និងប្រាក់បំណាច់ការងារឲ្យបានឆាប់។
អ្នកស្រី ហេល ផល្លា ប្រធានរដ្ឋបាលរោងចក្រនេះបាននិយាយថា រោងចក្រក៏នឹងចូលរួមប្រជុំនេះដែរ ប៉ុន្តែរោងចក្រមិនអាចធ្វើការសម្រេចណាមួយបានទេ។ អ្នកស្រីបាននិយាយថា “យើងនឹងទៅស្ដាប់ ប៉ុន្តែយើងមិនអាចធ្វើការសម្រេចណាមួយបានទេ ពីព្រោះថៅកែរបស់យើងមិននៅទីនេះ”។
អ្នកស្រី ផល្លា បាននិយាយថា ថ្ងៃមានអគ្គិភ័យនោះម្ចាស់រោងចក្រស្ថិតនៅក្នុងប្រទេសចិន។ អ្នកស្រីបាននិយាយកាលពីម្សិលមិញថា អ្នកស្រីមិនបានដឹងថា តើគាត់ត្រឡប់មកវិញនៅពេលណាទេ ហើយគាត់មិនបានទទួលទូរស័ព្ទពីរបីថ្ងៃមកហើយ។
ឧត្តមសេនីយ៍ឯក ម៉ក់ ជីតូ ដែលជាប្រធាននាយកដ្ឋានកណ្ដាលយុត្តិធម៌នៃអគ្គស្នងការដ្ឋាននគរបាលជាតិ បានមានប្រសាសន៍ថា អាជ្ញាធរកំពុងស៊ើបអង្កេតពីអគ្គិភ័យនេះនៅឡើយ ហើយមិនទាន់បានកំណត់ពីមូលហេតុនៃអគ្គិភ័យនេះទេ។ គេមិនអាចទាក់ទងអ្នកនាំពាក្យក្រសួងការងារសុំអត្ថាធិប្បាយបានទេ៕ គឹមហឿន