38.1 C
Phnom Penh

តុលាការ​នឹង​សាកសួរ​សមាជិក​សភា​គណបក្ស​សង្គ្រោះ​ជាតិ​ជុំវិញ​ការ​ធ្វើ​កុបកម្ម​

ដោយ ឌឹ ខេមបូឌា ដេលី

បទវិភាគ

សាលា​ដំបូង​រាជ​ធានីភ្នំញ​​នឹង​សាកសួរ​សមាជិក​សភា​មកពី​គណបក្ស​សង្គ្រោះ​ជាតិ​ចំនួន​បី​រូប​នៅ​ព្រឹក​នេះ ជុំវិញ​ការ​ប៉ះទង្គិច​គ្នា​តាម​ផ្លូវ​នៅ​កន្លែង​តវ៉ា​កាលពី​ថ្ងៃទី​១៥ ខែ​កក្កដា ដែល​អាជ្ញាធរ​បាន​ចាត់​ទុក​ថា ជា​ ” ការ​ធ្វើ​កុបកម្ម​ប្រឆាំង​រដ្ឋាភិបាល​របស់​លោក​ ហ៊ុន សែន។ មេ​ដឹកនាំ​យុវជន​មក​ពី​គណបក្ស​សង្គ្រោះ​ជាតិ​ចំនួន​បីរូប​​នៅ​ជាប់ពន្ធនាគារ​នៅ​ឡើយ​ទាក់ទិន​នឹង​ការ​ប៉ះទង្គិច​គ្នា​។

យោង​តាម​ដីកាកោះ​​របស់​តុលាការ​ ដែល​ចេញ​កាលពី​សប្ដាហ៍​មុន​ និង​ចុង​ខែ​មុន​ លោក កឹម សុខា អនុ​ប្រធាន​គណបក្ស​សង្គ្រោះ​ជាតិ​ លោកស្រី មូរ សុខហួរ សមាជិក​សភា​​ជាន់​ខ្ពស់​គណបក្ស​សង្គ្រោះ​ជាតិ និង​លោក កែវ ភិរម្យ ដែល​ជា​សមាជិក​សភា​​មក​ពី​គណបក្ស​សង្គ្រោះ​ជាតិ​ដែរ​នោះ នឹង​បង្ហាញ​ខ្លួន​​ចំពោះ​មុខ​តុលាការ​នៅ​ថ្ងៃ​នេះ​សម្រាប់​ការ​សាក​សួរ​។

មន្ត្រី​របស់​គណបក្ស​សង្គ្រោះ​ជាតិ​ទាំង​បី​រូប​នេះ​បាន​ស្បថ​ចូល​កាន់​តំណែង​ជា​សមាជិក​សភា​កាលពី​ថ្ងៃ​អង្គារ ហើយ​ឥឡូវ​នេះ​ទទួល​បាន​អភ័យ​ឯកសិទ្ធិ​ពីការ​ផ្ដន្ទាទោស​តាម​ច្បាប់​។

ដីកាកោះ​មួយ​ពី​ចៅក្រម​ស៊ើប​សួរ កែវ មុនី មាន​ខ្លឹមសារ​ថា ” ចៅក្រម​ស៊ើប​សួរ​សាលា​ដំបូង​រាជ​ធានី​ភ្នំពេញ ​អញ្ជើញ​លោក កឹម សុខា ភេទ​ប្រុស អាយុ​៦១​ឆ្នាំ ជាតិ​ខ្មែរ​ ជា​អ្នក​ទទួល​ខុស​ត្រូវ​ក្នុង​នាម​ជា​មេដឹកនាំ​​គណបក្ស​សង្គ្រោះ​ជាតិ​ ឲ្យ​ចូល​ទៅ​កាន់​​សាលា​ដំបូង​រាជ​ធានី​ភ្នំពេញ​នៅ​ថ្ងៃ​ទី​១១ ខែ​សីហា វេលា​ម៉ោង​១០ព្រឹក”។

ដីកាកោះ​នេះមាន​ខ្លឹម​សារ​បន្ត​ថា “សាមីខ្លួន​ត្រូវ​អញ្ជើញ​តាម​ដីកាកោះ​នេះ​​ឲ្យ​បាន​ទាន់​ពេលវេលា​ និង​យក​លិខិត​ផ្សេង​ៗ​ដែល​ទាក់​ទង​នឹង​រឿង​ខាង​លើ​មក​ជាមួយ​ផង​ប្រសិន​បើ​​មាន​”។

នៅ​ថ្ងៃ​នៃ​ការ​ប៉ះទង្គិច​គ្នា​តាម​ផ្លូវ​កាលពី​ថ្ងៃ​ទី​១៥ ខែ​កក្កដា ដែល​អ្នក​តវ៉ា​គាំទ្រ​គណបក្ស​ប្រឆាំង​បាន​សង​សឹក​យ៉ាង​ហិង្សា​លើ​សន្តិសុខ​ខណ្ឌ​ លោក កឹម សុខា ​ប្រធាន​ស្ដីទី​គណបក្ស​សង្គ្រោះ​ជាតិ​​ និង​​លោក សម រង្ស៊ី ប្រធាន​គណបក្ស​បាន​​អះអាង​​នៅ​ពេលនោះ​ថា បាន​​នៅ​លើ​កោះ​ដាច់​ស្រយាល​មួយ​ក្នុង​ប្រទេស​បារាំង។

ការ​តវ៉ា​ដែល​ដឹកនាំ​ដោយលោកស្រី មូរ សុខហួរ បាន​ធ្វើ​ឲ្យ​សមាជិក​សភា​ជាប់​ឆ្នោត​រហូត​ដល់​ទៅ​​ប្រាំពីររូប និង​មន្ត្រី​របស់​គណបក្ស​សង្គ្រោះ​ជាតិ​មួយ​រូប​ត្រូវ​បាន​ចាប់​ដាក់​ពន្ធ​នាគារ​ ហើយ​ត្រូវ​បាន​ដោះ​លែង​វិញ​ក្រោយ​​ពី​មាន​​ដំណោះ​ស្រាយ​បញ្ចប់​ភាព​​ជាប់​គាំង​ផ្នែក​នយោបាយ​ជិត​មួយ​ឆ្នាំ​ កាលពី​​ថ្ងៃ​ទី​២២ ខែ​កក្កដា បន្ទាប់ពី​លោក​ សម រង្សី ត្រឡប់ពី​ប្រទេស​បារាំង​មក​។

សមាជិក​សភា​ទាំង​ប្រាំពីរ​រូប​ និង​មន្ត្រី​បក្ស​មួយ​រូប​ទៀត​​​របស់​គណបក្ស​សង្គ្រោះ​ជាតិ​ ត្រូវ​បាន​ដោះ​លែង​ឲ្យ​នៅ​ក្រៅ​ឃុំ​ជា​បណ្ដោះ​អាសន្ន​ភ្លាមៗ​ ដោយ​មាន​ការ​លើក​ឡើង​​ពី​មន្ត្រី​គណបក្ស​ប្រជា​ជន​កម្ពុជា​ថា បទ​ចោទ​ប្រកាន់​ពួកគេ​អាច​នឹង​លើក​លែង​នៅ​ពេល​ពួកគេ​ស្បថ​ចូល​កាន់​តំណែង​ជា​សមាជិក​សភា​ ដោយ​ទទួល​បាន​អភ័យ​ឯកសិទ្ធិ​ពីការ​​ផ្ដន្ទាទោស​។

សមាជិក​សភា​ជាប់​ឆ្នោត​ទាំង​៥៥​រូប​របស់​គណបក្ស​សង្គ្រោះ​ជាតិ​បាន​ស្បថ​ចូល​កាន់​តំណែង​កាលពី​ថ្ងៃ​អង្គារ ហើយ​បាន​ចូល​សភា​ជាលើក​ដំបូង​នៅ​កាលពី​ថ្ងៃ​សុក្រ។ ទោះ​ជា​យ៉ាង​ណា កាលពី​​ថ្ងៃ​ទី៣ ខែ​សីហា បីថ្ងៃ​មុន​ពេល​ពិធី​ស្បថ​ចូល​កាន់​តំណែង​អាជ្ញាធរ​រាជ​ធានី​ភ្នំពេញ​បាន​ចាប់​ខ្លួន​មេដឹកនាំ​យុវជន​របស់​គណបក្ស​សង្គ្រោះ​ជាតិ​ចំនួន​បីនាក់​ក្នុង​រាជ​ធានី​ភ្នំពេញ ហើយ​បាន​ចាប់​​ពួកគេ​ដាក់​​ពន្ធនាគារ​ពីបទ​តវ៉ា​ដោយ​ហិង្សា​។

លោក សម រង្ស៊ី​ បានទៅ​សុខ​ទុក្ខ​មេដឹកនាំ​យុវជន​ទាំង​បីនាក់​នេះ​នៅពន្ធនាគារ​ព្រៃ​ស​កាលពី​ថ្ងៃ​សៅរ៍ ហើយ​បាន​​និយាយ​ម្ដង​ទៀត​ពី​ការ​អះអាង​ដែល​លោក​បាន​ធ្វើ​ឡើង​កាលពី​មួយ​សប្ដាហ៍​កន្លង​មក​ថា រដ្ឋាភិបាល​នឹង​ដោះ​លែង​ពួកគេ​ក្នុង​ពេល​ឆាប់ៗ​។
លោក សម រង្ស៊ី បាន​ថ្លែង​ប្រាប់​អ្នក​យក​ព័ត៌មាន​ម្ដង​ទៀត​កាលពី​ថ្ងៃ​សៅរ៍​ថា លោក​សូម​​ធានា​ថា មេដឹកនាំ​ទាំង​បី​នេះ​នឹង​ត្រូ​វ​បាន​ដោះ​លែង​ក្នុង​ពេល​ឆាប់ៗ។

លោក សម រង្ស៊ី បាន​មានប្រសាសន៍​ថា ” យើង​មិន​ទាន់​ដឹង​អ្វី​នៅ​ឡើង​ទេ​។ យើង​សង្ឃឹម​ថា នឹង​[ដឹង] ​នៅ​ថ្ងៃច័ន្ទ​ វា​មិន​យូរ​ពេក​ទេ​”។

លោក សម សុគង់ មេធាវី​របស់​សមាជិក​សភា​មក​ពី​គណបក្ស​សង្គ្រោះ​ជាតិ​ ក៏ដូច​ជា​របស់​សកម្មជន​យុវជន​បាន​លើក​ឡើង​ថា សមាជិក​សភា​មក​ពី​គណបក្ស​សង្គ្រោះ​ជាតិ​មិន​ត្រូវ​បាន​តម្រូវ​ឲ្យ​ចូល​រួម​ការ​សាក​សួរ​ទេ​។

លោក សុគង់ បាន​មាន​​ប្រសាសន៍​ថា ” ចៅក្រម​មិន​អាច​សាក​សួរ​សមាជិក​សភា​បាន​ទេ ហើយ​ត្រូវ​ពន្យារ​ពេល​ការ​សាកសួរ​ ព្រោះ​ថា ពួកគេ​មាន​អភ័យ​ឯកសិទ្ធិ​។ ប្រសិន​បើ​ចៅក្រម​ចង់​សាក​សួរ​ពួកគេ​ គឺ​ត្រូវ​តែ​សរសេរ​លិខិត​ស្នើ​សុំ​ទៅ​រដ្ឋសភា​ដក​អភ័យឯកសិទ្ធិ​ពួក​គេ​ជាមុន​សិន​”។

ការ​ធ្វើ​ដូច្នេះ​នឹង​ត្រូវ​តម្រូវ​ឲ្យ​មាន​ការ​យល់​ព្រម​ពី​សមាជិក​សភា​ចំនួន​៨៣​រូប ឬ២ភាគ​៣​នៃ​សមាជិក​សភា​។ គណបក្ស​ប្រជាជន​កម្ពុជា​មាន​សមាជិក​សភា​ចំនួន​៦៨​រូប។

លោក​ យែ៉ម បុញ្ញឫទ្ធិ អ្នក​នាំពាក្យ​គណបក្ស​សង្គ្រោះ​ជាតិ​បាន​ឲ្យ​ដឹង​ថា ទោះ​បី​ជា​មាន​អភ័យ​ឯកសិទ្ធិ​ពី​ការ​ផ្ដន្ទាទោស​ក៏ដោយ ក៏​លោក​ កឹម សុខា លោកស្រី មូរ សុខហួរ និង​លោក កែវ ភិរម្យ នឹង​នៅ​តែ​បង្ហាញ​ខ្លួន​ក្នុង​តុលាការ​តាម​ការ​​កោះហៅ​ដដែល​៕ គឹមហឿន​​​​​​​​​​​​​

 

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស