34 C
Phnom Penh

សហជីព រោងចក្រ​​នៅតែខ្វែងគំនិត​គ្នា​ជុំវិញ​ប្រាក់ខែគោល​សម្រាប់​វិស័យ​កាត់​ដេរ

ដោយ ឌឹ ខេមបូឌា ដេលី

បទវិភាគ

សហជីព​និង​រោង​ចក្រ​នៅតែ​ខ្វែង​គំនិត​គ្នា​ជុំវិញ​ការ​កំណត​់​ប្រាក់ខែ​គោល​នៅ​​ឆ្នាំក្រោយសម្រាប់​វិស័យ​កា​ត់​ដេរបន្ទាប់ពី​កិច្ច​ប្រជុំ​រវាង​តំណាង​មក​ពី​ភាគី​ទាំង​ពីរ​កាលពី​ថ្ងៃសុក្រ​ ប៉ុន្តែ​ពួកគេ​បាន​យល់ព្រម​បន្ត​​​ការ​ចរចា​នៅ​ចុង​ខែ​នេះទៀត។

កាល​ពី​ដើម​ឆ្នាំនេះ គណៈកម្មាធិការ​ប្រឹក្សា​ការងារ​​ដែលមាន​​តំណាង​រដ្ឋាភិបាល រោង​ចក្រ​និង​សហជីព បាន​យល់ព្រម​រៀបចំឲ្យ​មាន​ការ​ចរចា​ជាច្រើន​លើក​ដែលនឹង​ឈាន​ទៅ​រក​ការ​ចាប់​ផ្តើម​កំណត់​ប្រាក់​ខែ​គោលថ្មី​សម្រាប់​កម្មករ​រោង​ចក្រ​កា​ត់​ដេរ​នៅ​ថ្ងៃទី​១ ខែ​មករា។

គណៈកម្មាធិការ​នេះមាន​គោល​បំណង​ដោះស្រាយ​ប្រាក់ខែគោល​ថ្មី​នៅ​ខែតុលា​ហើយ​ការ​ប្រជុំកាលពី​ថ្ងៃសុក្រគឺ​ជាលើក​ទី​១ហើយ​រវាង​សហជីពនិង​សមាគម​រោង​ចក្រ​កាត់​ដេរ​នៅ​កម្ពុ​ជា​ដើម្បី​ចាប់​​ផ្តើម​ដំណើរ​ការ​នេះ។

លោក គង់ អាទិត្យ​ អនុប្រធាន​សម្ព័ន្ធ​សហជីព​ប្រជា​ធិបតេយ្យ​កម្មករ​កាត់​ដេរ​កម្ពុជា​​បាន​មាន​ប្រសាសន៍​ថា សហជីព​ទាំង​អស់​ដែល​ចូលរួម​ប្រជុំ​​បាន​យល់ព្រម​ចំពោះ​ការ​ទាម​ទារ​ដំឡើង​ប្រាក់​ខែ​គោល​ពី​១០០ដុល្លា​រ​ដែលមាន​ក្នុង​ពេល​ឥឡូវ​នេះ ដល់១៧៧ដុល្លារ​។

លោក​បាន​មាន​ប្រសាសន៍​ថា “​យើង​ចង់​ឲ្យ​និយោជក​ដំឡើង​​ប្រាក់​ប្រាក់​ខែគោល​ពី​១៦០ដុល្លារ​ទៅ​១៧៧ដុល្លារ​ក្នុង​មួយ​ខែ។ បើ​ទោះ​ជា​មិន​បាន​ឈាន​ដល់​ការ​ព្រមព្រៀង​គ្នា​ក៏ដោយ ក៏​សមាគម​រោង​ចក្រ​កាត​់​ដេរ​នៅ​កម្ពុជា​និង​សហជីព​បាន​ពិភាក្សា​ ដោះ​ដូរ​យោបល់​គ្នាដែរ ហើយ​យើង​នឹង​បន្ត​ពិភាក្សា​គ្នាទៀត”។

សមាគម​រោងច​ក្រ​កាត​់​ដេរ​នៅ​កម្ពុជា​​បាន​លើក​ឡើង​ដដែលៗ​ថា រោងចក្រមិន​អាច​មាន​លទ្ធភាព​ធ្វើ​ការ​ដំឡើង​ប្រាក់​ខែ​ច្រើន​​ភ្លាម​ៗ​បាន​ឡើយ ហើយ​លោក អាទិត្យ​ បាន​មាន​ប្រសាសន៍ថា អ្វីៗនៅតែដដែល​ជាថ្មី​ម្តងទៀត​កាលពី​ថ្ងៃសុក្រ​។ ប៉ុន្តែ​​សហជីព​មាន​ការ​សង្ស័យ និង​ចង​់​ឃើញ​ភ័ស្តុតាង​ពី​ប្រាក់​ចំណូល​របស់​រោង​ចក្រ។

ការត​វ៉ានៅ​ទូទាំង​ប្រទេស​​ទាម​ទារ​ដំឡើង​ប្រាក់​ខែគោល​១៦០ដុល្លារ​​បានប៉ះពាល់​ដល់​ឧស្សាហកម្ម​នេះ​រយៈពេល​ខ្លី​កាល​ពី​ចុង​ខែ​ធ្នូ ហើយ​មានការ​បង្ក្រាប​ដ៏ហិង្សា​កាលពី​ថ្ងៃ​ទី​៣ ខែ​មករា នៅពេល​ដែល​កង​រាជ​អាវុធ​ហ​ត្ថ​​បាន​បាញ់​ទៅ​លើ​​ក្រុម​បា​តុករ ដោយ​បណ្តាល​ឲ្យ​កម្មករ​ប្រាំ​នាក់​ស្លាប់ និង​របួស​ជា​ច្រើន​នាក់​ទៀត​​។

ការ​សិក្សា​របស់​រដ្ឋាភិបាល​កាល​ពី​ឆ្នាំមុន​បាន​សន្និដ្ឋាន​ថា ប្រាក់​ខែគោល​ដែលអាច​រស់​បាន​សម្រាប់​​កម្មករ​រោង​ចក្រ​កាត​់​ដេរ​គឺ​ចន្លោះ​១៥៧ដុល្លារ​ដល់​១៧៧ដុល្លារ​។ រោង​ចក្រ លោក​ឡើង​ថា កម្មករ​ទទួលបាន​ប្រាក់​​បន្ថែម​ម៉ោង​ និង​ផល​ប្រយោជន​៍​ផ្សេង​ៗទៀត​ ប៉ុន្តែ​សហជីព​ អង្គការ​ពលកម្ម​អន្ត​រជាតិ​មិន​យល់​ស្រប។

លោក គង់​ អាទិត្យ​ បាន​​មាន​ប្រសាសន៍ថា សមាគម​រោង​ចក្រ​កាត់​ដេរ​នៅ​កម្ពុជា​បាន​ជំទាស់​នឹង​សំណើរ​បស់​សហជីពនៅ​កិច្ចប្រជុំ​កាលពី​ថ្ងៃសុក្រដោយ​ផ្តល់​ឲ្យ​តែ​១១៥ដុល្លារ​ប៉ុណ្ណោះ។

លោក កែន លូ អគ្គលេខាធិការ​សមាគម​រោង​ចក្រ​កាត់​ដេរ​នៅ​កម្ពុជា​​បាន​បដិសេធ​មិន​បញ្ជាក់​ ឬ​បដិសេធ​ថា ត​ើ​រោងចក្រ​បាន​ស្នើ​តួលេខ​នេះឬ​យ៉ាងណាឡើយ។

លោក កែន លូ ដែល​អះ​អាង​ថា កិច្ច​ប្រជុំ​នេះ​មិន​មែន​ជា​ការ​ចរចានោះ​បាន​មាន​ប្រសាសន៍ថា “វា​មិន​មែន​ជា​ដំណាក់កាល​ដែល​យើង​អាច​ពិភាក្សា​លម្អិត​​ឡើយ។ មិន​មាន​​ការ​ចរចា​​តែ​រឿង​​ទាមទារ​ដំឡើង​ប្រាក់​ខែ​នោះ​ទេ​ អំឡុង​​កិច្ច​ប្រជុំ​មាន​ការ​ពិភាក្សា​ដោះដូរ​យោបល់​បន្ថែម​ទៀត​”។

លោក អាទិត្យ​ និ​ងលោក កែន​ លូ បាន​លើក​ឡើង​ថា ភាគី​ទាំងពីរ​បាន​យល់ព្រម​ជួប​ប្រជំុគ្នា​ម្ត​ងទៀត​ស្តីពី​បញ្ហានេះ​ ប៉ុន្តែ​មិន​ទាន់​កំណត់​កាល​បរិច្ឆេទ​ជាក់​លាក់នៅ​ឡើយទេ។

ចំពោះបញ្ហានេះ រដ្ឋាភិបាល​បាន​ប្រកាស​ផែនការ​នៅខែធ្នូ​ដំឡើង​ប្រាក់​ខែគោល​ដល់​១៦០ដុល្លារ​ជា​ដំណាក់កាល​ៗ​ក្នុង​រយៈពេល​ប្រាំឆ្នាំ​ក្រោយ៕សារុន

 

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស