32 C
Phnom Penh

គ្រួសារ​រស់​នៅ​ក្បែរ​ផ្លូវ​រថភ្លើង​​នាំគ្នា​តវ៉ា​ទាម​ទារ​ឲ្យ​ធនាគារ​អភិវឌ្ឍន៍​អាស៊ី​ឆ្លើយតប​

ដោយ ឌឹ ខេមបូឌា ដេលី

បទវិភាគ

គ្រួសារ​រស់នៅ​ក្បែរ​ផ្លូវ​ដែក​​ក្នុង​រាជធានីភ្នំពេញ ដែល​ប្រឈម​នឹង​ការ​បាត់​បង់​ផ្នែក​ខ្លះ​នៃ​ដីធ្លី​របស់ខ្លួន​ ដោយ​សារ​គម្រោង​ស្ដារ​ផ្លូវ​ដែក​​ ដែល​ទទួល​បាន​មូលនិធិ​ជា​ចម្បង​ពី​ធនាគារ​អភិវឌ្ឍន៍​អាស៊ី (ADB) បាន​នាំគ្នា​តវ៉ា​នៅ​ខាង​មុខ​ទីស្នាក់​ការ​កណ្ដាល​របស់​ធនាគារ​នេះ​កាល​ពី​ម្សិលមិញ​ ទាក់​ទិននឹង​រឿង​​ដែល​ពួកគេ​បាន​លើក​ឡើង​ថា កង្វះ​តម្លា​ភាព​អំពី​វាសនា​របស់​ពួកគាត់​។

គ្រួសារ​ទាំង​នេះ​បាន​លើក​ឡើង​ថា ការ​ជួប​គ្នា​មួយ​ភ្លែត​ជាមួយ​លោក EricSidgwick ​នាយក​ប្រចាំ​ប្រទេស​របស់​ ADB នៅ​តែ​បន្សល់​ភាព​ស្រពេចស្រពិល​ដល់​ពួកគាត់​។

គម្រោង​ក្នុង​ទឹក​ប្រាក់​ចំនួន​១៤៣​លាន​ដុល្លារ​ ដែល​បាន​អស់​ប្រាក់​ដោយ​បន្សល់​នៅ​ការ​ងារ​ជាច្រើន​មិន​ទាន់​បញ្ចប់​រួច​រាល់​នៅ​ឡើយ​ បាន​បង្ខំ​ឲ្យ​អ្នក​ភូមិ​រាប់​រយ​គ្រួសារ​ចាក​ចេញ​ពី​ផ្ទះ​សំបែង​របស់​ពួកគាត់​ ដែល​នៅ​តាម​បណ្ដោយ​ផ្លូវ​ដែក​ក្នុង​ខេត្ត​មួយ​ចំនួន​រួច​ទៅហើយ​។ គ្រួសារ​ទាំង​នេះ​បាន​រើ​ទីលំនៅ​ទៅរស់​នៅ​កន្លែង​ដ៏ឆ្ងាយ និង​គ្មាន​ហេដ្ឋារចនា​សម្ព័ន្ធ​​ត្រឹម​ត្រូវ។

បុរស​ ស្ត្រី និង​ក្មេងៗ​ប្រហែល​១០០​នាក់​ ដែល​បាន​ចូល​រួម​ការ​តវ៉ា​កាលពីម្សិលមិញ គឺ​មក​ពី​គ្រួសារ​ចំនួន​១៦៥​ ដែល​រស់​នៅ​តាម​បណ្ដោយ​កំណាត់​​ផ្លូវ​ដែក​ក្នុង​ខណ្ឌ​ទួល​គោក ​រាជ​ធានី​ភ្នំពេញ និង​ដែល​​មិន​ត្រូវ​ប្ដូរ​ទីលំនៅ​របស់​ខ្លួន​ ប៉ុន្តែ​នឹង​ទំនង​ជា​លះ​បង់​មួយ​​ផ្នែក​នៃ​ដីធ្លី​របស់​ខ្លួន​។

គ្រួសារ​ទាំង​នេះ​បាន​លើកឡើង​ថា ពួកគាត់​ទទួល​បាន​សេចក្ដី​លម្អិត​ និង​ព័ត៌មាន​ផ្សេង​គ្នា​​តិច​តួច​ទាក់​ទិន​នឹង​រឿង​ថា តើ​ដី​ទំហំ​ប៉ុណ្ណា​​ដែល​ពួកគាត់​នឹង​ត្រូវ​លះ​​បង់​។ នៅ​​ក្នុង​​​សំណួរ​​ជា​ច្រើន​​ដែល​ពួកគាត់​បាន​ផ្ដល់​ទៅ​ឲ្យ​ធនាគារ​កាលពី​ថ្ងៃ​ទី​៤ ខែ​សីហា ពួកគាត់​ក៏ចង់​ដឹង​អំពី​កាល​វិភាគ​ពិត​ប្រាកដ​នៃ​​ការ​ងារ​ អត្តសញ្ញាណ​វិនិយោគិន​ទាំង​អស់​ និង​ការ​ទទួល​ខុស​ត្រូវ​របស់​ពួកគេ​ក្នុង​ចំណោម​សំណួរ​​ផ្សេង​ៗ​ទៀត​។

អ្នកស្រី នី សណ្ដោស ដែល​ជា​អ្នក​តវ៉ា​​ម្នាក់​បាន​និយាយ​ថា “ADB ត្រូវ​តែ​ទទួល​ខុស​ត្រូវ​ចំពោះ​គម្រោង​នេះ​។ ADB បាន​ជួយ​ប្រាក់​​​ដែល​ធ្វើ​ឲ្យ​​ប៉ះពាល់​ដល់​អ្នក​ភូមិ​”។

អ្នកស្រី សណ្ដោស ដែល​បាន​ចូល​រួម​នៅ​ក្នុង​ជំនួប​មួួយ​ភ្លែត​បាន​និយាយ​ថា តំណាង​ADB ដែល​បាន​ចេញ​មក​មួយ​ភ្លែត​ដើម្បី​ជួប​ជាមួយ​អ្នក​តវ៉ា​​បាន​ប្រាប់​ពួកគាត់​ថា លោក​ Sidgwick បាន​ចេញ​ពី​ប្រទេស​កម្ពុជា​ហើយ។ តែ​ទោះជាយ៉ាង​ណា​មិន​យូរ​ប៉ុន្មាន​តំណាង​ចំនួន​បួន​នាក់​ត្រូវ​បានគេនាំចូល​ទៅ​ក្នុង​បរិវេណ​ ADB ដើម្បី​ជួប​ជាមួយ​លោក​ Sidgwick ដោយ​ផ្ទាល់​មួយ​ភ្លែត​។

អ្នកស្រី​បាន​លើក​ឡើង​ថា នាយក​​ប្រចាំ​ប្រទេស​​មិន​បាន​ឆ្លើយ​សំណួរ​ណាមួយ​របស់​ពួកគាត់​ទេ ប៉ុន្តែ​បាន​សន្យា​ឆ្លើយ​តប​​ប្រសិន​បើ​គាត់​មាន​ចម្លើយ​ខ្លះ​។

អ្នកស្រី សណ្ដោស បាននិយាយ​ថា ” លោក​ Eric បាន​ប្រាប់​ពួក​យើង​ថា គាត់​នឹង​ទាក់​ទង​ពួកយើង​តាម​រយៈ​ទូរស័ព្ទ​នៅ​ថ្ងៃ​ស្អែក​ ប្រសិន​បើ​គាត់​ទទួល​បាន​ព័ត៌មាន​ជាក់​លាក់​សម្រាប់​អ្នក​តវ៉ា​។ ប្រសិន​បើ​លោក Eric មិន​គោរព​ពាក្យ​សន្យា​របស់​ខ្លួន​ទេ យើង​នឹង​បន្ត​ការ​តវ៉ា​ទៀត​”។

ទោះ​បី​ជា​គ្រួសារ​ទាំង​នេះ​គ្មាន​ប័ណ្ណ​កម្មសិទ្ធិ​ដីធ្លី​ក៏ដោយ​ ក៏ពួកគាត់​បាន​លើកឡើង​ថា ខ្លួន​បាន​រស់​នៅ​ក្បែរ​ផ្លូវ​ដែក​​អស់​ជា​ច្រើន​ឆ្នាំ​ឬ​ច្រើនទសវត្សរ៍​មក​ហើយ ហើយ​មាន​ឯកសារ​ដែល​បញ្ជាក់​ពីលំនៅ​ដ្ឋាន​របស់​ពួកគាត់​ ដែល​មាន​ការ​​ទទួល​ស្គាល់​ពី​អាជ្ញាធរមូលដ្ឋាន​។

នៅ​ក្នុង​លិខិត​មួយ​ផ្ញើ​ទៅគ្រួសារ​ទាំង​នេះ​កាលពី​ថ្ងៃ​សុក្រ លោក​ Sidgwick បាន​អះអាង​ថា នាយក​ដ្ឋាន​ផ្ដល់​ទីលំនៅ​ថ្មី​របស់​ក្រសួង​សេដ្ឋកិច្ច​ និង​ហិរញ្ញវត្ថុ​ នឹង​ឆ្លើយ​សំណួរ​របស់​ពូកគាត់​ ព្រោះ​វា​ពាក់​ព័ន្ធ​នឹង​កម្មវិធី​ផ្ដល់​ទីលំនៅ​ថ្មី​របស់​គម្រោង​ ទោះបី​ជា​ក្រុម​គ្រួសារ​ទាំង​នេះ​មិន​ប្រឈម​នឹង​ការ​ប្ដូរ​ទីលំនៅ​ថ្មី​ក៏ដោយ។

ចំពោះ​ការ​ជួប​គ្នា​មួយ​ភ្លែត​របស់​លោក Sidgwick ជាមួយ​គ្រួសារ​ទាំង​នេះ​កាលពី​ព្រឹក​ម្សិលមិញ​វិញ ធនាគារ​បាន​លើក​ឡើង​តាម​​រយៈ​អុីម៉េល​មួយ​ថា នាយក​ប្រចាំ​ប្រទេស​ ” ​​បាន​ជួប​ជាមួយ​តំណាង​គ្រួសារ​ទាំង​នេះ ​បាន​ផ្ដល់​ព័ត៌មាន​ ហើយ​សន្យា​ថា នឹង​ផ្ដល់ការ​បញ្ជាក់​បន្ថែម​តាម​ក្រោយ​ទៀត​ប្រសិន​បើ​មានការ​ស្នើ​សុំ​”៕ គឹមហឿន​​​​​​​​​​​

 

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស