ក្រុម​​​ហ៊ុន​​​ចម្ការកៅស៊ូ​​​​​​វៀត​​​ណាម​​​យល់​​​ព្រម​​​បញ្ឈប់​​​សកម្មភាព​​​បោះ​​​បង្គោល​​​ដី​​​មាន​​​វិវាទ​​​ជាមួយ​​​អ្នក​​​ភូមិ​​​

ក្រុមហ៊ុន​​​ចម្ការ​​​កៅស៊ូ​​​មួយ​​​របស់​​​វៀតណាម​​​ នៅ​​​ក្នុង​​​ខេត្ត​​​រតនគិរី​​​ ដែល​​​រង​​​ការ​​​ចោទ​​​ប្រកាន់​​​ម្តង​​​ហើយ​​​ម្តង​​​ទៀត​​​ថា បាន​​​ទន្ទ្រាន​​​ចូល​​​ដី​​​របស់​​​ប្រជា​​​ពល​​​រដ្ឋ​​​ក្នុង​​​មូល​​​​​​ដ្ឋាន​​​នោះ​​​ បាន​​​យល់​​​ព្រម​​​បញ្ឈប់​​​សកម្ម​​​ភាព​​​កំណត់​​​ព្រំ​​​ប្រទល់​​​ដី​​​បន្ថែម​​​ទៀត​​​កាល​​​ពី​​​ម្សិលមិញ បន្ទាប់​​​ពី​​​​​​​អ្នក​​​ភូមិ​​​មួយ​​​ក្រុម​​​បាន​​ចេញ​​​មុខ​​​តតាំង​​​​​​​​​នឹង​​​​​​​​​​​ក្រុម​​​ហ៊ុន​​​នេះ ដោយ​​​ចោទ​​​ប្រកាន់​​​​​​ថា ក្រុម​​​ហ៊ុន​​​នេះ​​​បាន​​​បំពាន​​​កិច្ច​​​ព្រម​​​ព្រៀង​​​មួយ​​​ ដែល​​​ភាគី​​​ទាំង​​​ពីរ​​​បាន​​​ព្រម​​​ព្រៀង​​​គ្នា​​​កាល​​​ពី​​ដើម​​​ឆ្នាំ​​​​​​នេះ​​​។

យោង​​​តាម​​​មន្ត្រី​​​មូល​​​ដ្ឋាន​​​ និង​​​អង្គការ​​​ក្រៅ​​​រដ្ឋា​​​ភិបា​​​ល​​​បាន​​​ឲ្យ​​​ដឹង​​​ថា នៅ​​​ក្នុង​​​ពេល​​​ថ្មី​​​ៗ​​​នេះ​​​ក្រុម​​​ហ៊ុនហ័ង​​​អាញ់ លំផាត់ ​​​បាន​​​យល់​​​ព្រម​​​បែង​​​ចែក​​​ដី​​​មាន​​​វិវាទ​​​​​​ទំហំ​​​១.៤០០ហិកតា​​​នៅ​​​ក្នុង​​​ដែន​​​ជម្រក​​​សត្វ​​​ព្រៃ​​​លំផាត់ ​​​ជា​​​ពីរ​​​ចំណែក ដោយ​​​រក្សា​​​ទុក​​​ចំណែក​​​ពាក់​​​កណ្ដាល​​​សម្រាប់​​​ខ្លួន​​​ឯង​​​ និង​​​ពាក់​​​កណ្ដាល​​​ទៀត​​​ទុក​​​​​​​​​ឲ្យ​​​​​​​​​អ្នក​​​ភូមិ​​​ក្នុង​​​មូល​​​ដ្ឋាន​​​ប្រើ​​​ប្រាស់​​​។

តែ​​​ទោះ​​​ជា​​​យ៉ាង​​​ណា អ្នក​​​ភូមិ​​​ម្នាក់​​​ឈ្មោះ​​​ កែវ សូឡឹង បាន​​​និយាយ​​​ថា គាត់​​​ និង​​​អ្នកភូមិ​​​ចំនួន​​​១៤​​​នាក់​​​ទៀត​​​បាន​​​តតាំង​​​​​​នឹង​​​កម្មករ​​​ចម្ការកៅស៊ូ​​​មួយ​​​ក្រុម​​​​​​មាន​​​គ្នា​​​ប្រហែល​​​១០​​​នាក់​​​ ដែល​​​គាត់​​​និយាយ​​​ថា កំពុង​​​​​​​​​ប្រើ​​​ប្រាស់​​​បង្គោល​​​ឈើ​​​ដើម្បី​​​កំណត់​​​​​​ព្រំប្រទល់​​​ដី​​​៣០ហិកតា​​​ទៀត នៅ​​​លើ​​​ដី​​​ដែល​​​ក្រុម​​​ហ៊ុន​​​​​​បាន​​​អនុញ្ញាត​​​ឲ្យ​​​អ្នក​​​ភូមិ​​​រក្សា​​​ទុក​​​ប្រើ​​​ប្រាស់​​​។

អ្នកភូមិ​​​រូប​​​នេះ​​​បាន​​​និយាយ​​​ទៀត​​​ថា “យើង​​​បាន​​​ប្រមូល​​​អ្នក​​​ភូមិ​​​មួយ​​​ចំនួន​​​ ដើម្បី​​​បញ្ឈប់​​​សកម្មភាព​​​​​​កម្មករ​​​កុំ​​​ឲ្យ​​​បោះ​​​បង្គោល​​​ព្រំ​​​ដី។ យើង​​​បាន​​​រាយការណ៍​​​ទៅ​​​មេឃុំ​​​​​ថា ក្រុមហ៊ុន​​​​​​នេះ​​​​​បាន​​​បំពាន​​​​​ចូល​​​​​​ដី​​​របស់​​​អ្នក​​​ភូមិ​​​ ប៉ុន្តែ ខ្ញុំ​​​មិន​​​ដែល​​​ទទួល​​​បាន​​​ការ​​​ឆ្លើយ​​​តប​​​ទេ”។

លោក គឹម ផាត មេឃុំ​​​ជ័យ​​​ឧត្តម​​​បាន​​​មាន​​​ប្រសាសន៍​​​ថា លោក​​​បាន​​​បញ្ជូន​​​លោក មីុ ចាយ ប្រធាន​​​ភូមិ​​​ស្រែ​​​ឈូក ​​​​​​ឲ្យ​​​ទៅ​​​សើុប​​​អង្កេត​​​ហើយ​​​ ប៉ុន្តែ មិន​​​ទាន់​​​ទទួល​​​បាន​​​ព័ត៌​​​មាន​​​មក​​​វិញ​​​ទេ​​​។

លោក​​​ មីុ​​​ ចាយ​​​ បាន​​​លើក​​​ឡើង​​​ថា លោក​​​បាន​​​ចូល​​​រួម​​​ជាមួយ​​​អ្នក​​​ភូមិ​​​ នៅ​​​ពេល​​​ពួក​​​គេ​​​ទៅ​​​ប្រឈម​​​តតាំង​​​​​នឹង​​​​​​កម្មករ​​​ចម្ការ​​​កៅស៊ូ​​​ ហើយ​​​និយាយ​​​ថា ក្រុម​​​ហ៊ុន​​​បាន​​​យល់​​​ព្រម​​​បញ្ឈប់​​​សកម្មភាព​​​កំណត់​​​ព្រំ​​​ប្រទល់​​​ដី​​​តំបន់​​​នោះ បន្ទាប់​​​ពី​​​អ្នក​​​គ្រប់​​​គ្រង​​​ក្រុមហ៊ុន​​​ម្នាក់​​​ដែល​​​និយាយ​​​តែ​​​ភាសា​​​វៀតណាម​​​ បាន​​​ទៅ​​​ដល់​​​ទី​​​នោះ​​​ ដើម្បី​​​ចរចា​​​​​​ជា​​​មួយ​​​អ្នក​​​ភូមិ​​​តាម​​​រយៈ​​​អ្នក​​​បក​​​ប្រែ​​​។

លោក​​​បាន​​​លើក​​​ឡើង​​​បន្ថែម​​​ទៀត​​​ថា “អ្នក​​​គ្រប់​​​គ្រង​​​រូប​​​នោះ​​​បាន​​​ប្រាប់​​​យើង​​​ថា គាត់​​​មិន​​​បាន​​​បញ្ជា​​​ឲ្យ​​​កម្ម​​​ករ​​​​​​បោះ​​​បង្គោល​​​ព្រំ​​​ដី​​​នៅ​​​ទី​​​នោះ​​​ទេ គឺ​​​កម្មករ​​​ទាំង​​​នោះ​​​ធ្វើ​​​ដោយ​​​ខ្លួន​​​ឯង”។

លោក គង់ ស៊្រុន អភិបាល​​​ស្រុក​​លំ​​​ផាត់ ដែល​​​​​​មានប្រសាសន៍​​​ថា លោក​​​ជា​​​អ្នក​​​ជួយ​​​ចរចា​​​ឲ្យ​​​មាន​​​ការ​​​បែង​​​ចែក​​​ដី​​​រវាង​​​អ្នក​​​ភូមិ​​​ និង​​​ក្រុមហ៊ុន​​​កាល​​​ពី​​​ខែ​​​មិថុនា បាន​​​មាន​​​ប្រសាសន៍​​​ថា លោក​​​ប្រាកដ​​​ជា​​អនុវត្ត​​​តាម​​​ការ​​​ព្រម​​​ព្រៀង​​​នោះ​​​។

លោក​​​មាន​​​ប្រសាសន៍​​​បន្ត​​​ថា “វា​​​នឹង​​​មិន​​ពិបាក​​​ [ ដោះ​​​ស្រាយ​​​ ]​​​​​​ ទេ​​​ ប្រសិន​​​បើ​​​ក្រុមហ៊ុន​​​បំពាន​ចូល​​​​​​ដី​​​របស់​​​អ្នក​​​ភូមិ​​​។ យើង​​​នឹង​​​ចុះ​​​ទៅ​​​ពិនិត្យ​​មើល​​​នៅ​​​ក្នុង​​​​​​តំបន់​​​នោះ​​​នៅ​​​ពីរ​​​បី​​​ថ្ងៃ​​​ក្រោយ​​​ រួច​​​ប្រគល់​​​ដី​​​នោះ​​​ឲ្យ​​​ទៅ​​​អ្នក​​​ភូមិ​​​វិញ ពីព្រោះ​​​យើង​​​បាន​​​ព្រម​​​ព្រៀង​​​គ្នា​​​រួច​​​ហើយ​​​ជាមួយ​​​ក្រុមហ៊ុន​​​នេះ​​​”៕ សុខុម