35 C
Phnom Penh

ជន​​សង្ស័យ​ក្នុង​សំណុំ​រឿង​០០៤ត្រូវបានកោះ​ហៅ​មក​សាកសួរ​នៅ​សាលាក្តី​ខ្មែរក្រហម

ដោយ ឌឹ ខេមបូឌា ដេលី

បទវិភាគ

យោង​តាម​អភិបាល​ស្រុក​ម្នាក់​ក្នុង​ខេត្ត​ឧត្តរ​មានជ័យ​បាន​ឲ្យ​ដឹង​ថា អ្នកស្រី អឹុម ចែម ជា​ជន​សង្ស័យម្នាក់ក្នុង​ចំណោមជ​ន​សង្ស័យ​បី​នាក់​ក្នុង​សំណុំរឿង​០០៤ ដែល​ជំទាស់ដោយ​រដ្ឋា​ភិបាល​នៅ​សាលា​ក្ដី​ខ្មែរ​ក្រហមនោះ ត្រូវ​បាន​កោះ​ហៅ​ឲ្យបង្ហាញ​ខ្លួន​ដើម្បី​ធ្វើការ​សាក​សួរ​។

អ្នកស្រី អុឹម ចែម អាយុ​៦៨​ឆ្នាំ​​ ត្រូវ​បាន​ចោទ​ប្រកាន់ពីបទ​​សម្រប​សម្រួល​ការ​ធ្វើ​វិសុទ្ធិ កម្ម​​ក្នុង​តំបន់ភាគ​ពាយព្យ​ក្នុង​នាម​ជា​កម្មាភិបាល​ខ្មែរ​ក្រហម​ក្នុងទសវត្សរ៍​ឆ្នាំ​១៩៧០​។

ការ​ស៊ើប​អង្កេត​លើ​អ្នកស្រី និង​ជន​សង្ស័យ​ឈ្មោះ តា ទិត្យ និង​ តា អាន កំពុង​​ត្រូវ​បាន​បន្ត​ដោយ​លោក ម៉ាក ហាម៉ុន សហចៅក្រម​ស៊ើប​អង្កេត​អន្តរជាតិ​នៅ​សាលា​ក្ដី​ខ្មែរ​ក្រហម។

លោក យឹម ផាន់ណា អភិបាល​ស្រុក​អន្លង់វែង បាន​មាន​ប្រសាសន៍​ថា ” មន្ត្រី​របស់​ខ្ញុំ​បាន​ប្រាប់​ខ្ញុំ​ថា តុលាការ​បាន​កោះ​ហៅ​អ្នកស្រី​ទៅ​សាក​សួរ​នៅថ្ងៃ​ច័ន្ទ ប៉ុន្តែ​ខ្ញុំ​មិន​ដឹង​​កាល​បរិច្ឆេទ​ជាក់លាក់ថា តើ​នៅ​ថ្ងៃ​នេះឬ​នៅ​ថ្ងៃ​ច័ន្ទ​សប្ដាហ៍​ក្រោយ​ឡើយ​ ពីព្រោះ​ខ្ញុំ​មិន​ទាន់​បាន​ឃើញ​ដីកា​របស់​តុលាការ​នៅ​ឡើយទេ”។

លោក​បាន​មាន​ប្រសាសន៍​ថា ” អ្នកស្រី​ស្ថិត​នៅ​ផ្ទះ​របស់​គាត់​នៅ​ឡើយ​នៅ​ថ្ងៃ​នេះ”។ អ្នកស្រី អុឹម ចែម រស់​នៅ​ក្នុង​ភូមិ​អូរ​អង្រែ ឃុំ​ត្រពាំង​តាវ។ លោក ប៊ិត សា៊ងលីម មេធាវី​ជន​ជា​តិ​ខ្មែររបស់​អ្នកស្រី​បាន​បដិសេធ​មិន​ធ្វើ​អត្ថាធិប្បាយ​ទេ​។

លោក សូ នៅ អធិការ​រង​នគរ​បាល​ស្រុក​បាន​មាន​ប្រសាសន៍​ថា លោក​មិនបាន​ឃើញ​​ដីកា​កោះ​ហៅទេ​។

លោក ឡុង បញ្ញាវុធ ​អ្នក​ឃ្លាំមើល​តុលាការនិង​ជា​មន្ត្រី​កម្មវិធី​នៅ​អង្គការ​គំនិត​ផ្ដួច​ផ្ដើម​យុត​្តិធម៌កម្ពុជា​ បាន​មាន​ប្រសាសន៍​ថា​ “​មែន​ហើយ​​ពួកគេ​បាន​កោះ​ហៅអ្នកស្រី​មែន ពួកគេ​បាន​កោះ​ហៅ​អ្នកស្រី​ពីរ​លើក​ហើយ ប៉ុន្តែ​អ្នក​ស្រី​មិន​បាន​បង្ហាញ​ខ្លួន​ទេ​…។ យើង​រង់ចាំ​មើល​ថា តើ​ដីកាបង្គាប់​ឲ្យ​នាំខ្លួន​នេះ​ត្រូវ​បាន​ចេញ​ឬយ៉ាង​ណា…យើង​ត្រូវ​ឃ្លាំ​មើល​ឲ្យ​បាន​ដិត​ដល់”។ ដីកា​បង្គាប់​ឲ្យ​នាំខ្លួន​ត្រូវ​បាន​េចញ​ដល់​មន្ត្រី​នគរ​បាល​យុត្តិធម៌​ ក្នុង​ករណី​ដែល​ដីកា​កោះ​ហៅ​ត្រូវ​បាន​ធ្វើ​មិន​ដឹង​មិន​ឮ៕ សារុន​​​​​​​

 

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស