ព្រះសង្ឃខ្មែរក្រោម និងអ្នកតវ៉ាជាតិនិយមបានដុតទង់ជាតិវៀតណាមនៅខាងមុខស្ថានទូតវៀតណាមកាលពីម្សិលមិញ ខណៈស្ថានទូតនេះនៅតែបន្តធ្វើព្រងើយកន្តើយចំពោះការអំពាវនាវឲ្យមានការសូមអភ័យទោសលើការលើកឡើងរបស់មន្ត្រីទូតវៀតណាមម្នាក់កាលពីខែកក្កដា។
អ្នកតវ៉ាប្រហែល៦០០នាក់បានប្រមូលផ្ដុំគ្នានៅស្ថានទូតវៀតណាមម្ដងទៀត ដើម្បីទាមទារឲ្យមានការដកចេញវិញនូវការលើកឡើងរបស់លោក ត្រាន វ៉ានថុង អ្នកនាំពាក្យស្ថានទូតវៀតណាម ដែលថា ខេត្តមួយចំនួននៅកម្ពុជាក្រោម ដែលស្ថិតនៅភាគខាងត្បូងប្រទេសវៀតណាមក្នុងពេលសព្វថ្ងៃ គឺស្ថិតក្រោមការគ្រប់គ្រងរបស់វៀតណាមតាំងពីយូរណាស់មកហើយ មុនពេលប្រទេសបារាំងបានកាត់ខេត្តទាំងនេះជាផ្លូវការឲ្យទៅប្រទេសវៀតណាមនៅក្នុងឆ្នាំ១៩៤៩។
ការតវ៉ាបានបន្តដោយអហិង្សារហូតដល់ម៉ោងប្រហែល២និង៣០នាទីរសៀល នៅពេលនោះទង់ជាតិត្រូវបានយកទៅមុខ ហើយព្រះតេជគុណ សឹង ហៃ ជាព្រះសង្ឃមួយអង្គនៅក្នុងរាជធានីភ្នំពេញ និងដែលជាបុគ្គលលេចធ្លោនៅក្នុងការតវ៉ាពីរថ្ងៃមកនេះបាននិមន្តមុខគេ។
ក្រោយពេលទង់ជាតិត្រូវបានដុតរួចបន្តិច អ្នកតវ៉ាចំនួនពីរនាក់ ដែលរួមមានព្រះសង្ឃមួយអង្គ និងបុរសម្នាក់បានដើរទៅមុខ ហើយបានជំរុញឲ្យអ្នកតវ៉ារក្សាការសន្យាដែលថា មិនបង្កអំពើហិង្សា។ ប៉ុន្តែព្រះតេជគុណ សឹង ហៃ នៅតែបន្តសកម្មភាពខ្លាំងឡើងៗ។
ព្រះតេជគុណអង្គនេះបានឆ្លើយតបចំពោះការសុំឲ្យរក្សាភាពស្ងៀមស្ងាត់ថា ” តើយើងអាចរក្សាការមិនបង្កអំពើហិង្សាបានយូរប៉ុណ្ណាទៀត។ នេះគឺជាបញ្ហារបស់វៀតណាម”។
ក្រោយពេលនិយាយដាក់គ្នាទៅវិញទៅមកបានពីរបីនាទីរួច ទីបំផុតទង់ជាតិត្រូវបានដុត ហើយត្រូវបានយកមកជាន់ និងស្ដោះទឹកមាត់ដាក់ដោយព្រះសង្ឃ និងអ្នកតវ៉ាផ្សេងទៀត។
លោក ថាច់ សេដ្ឋា នាយកប្រតិបត្តិសហគមន៍ខ្មែរកម្ពុជាក្រោម និងជាបុគ្គលនាំមុខគេនៅក្នុងការតវ៉ា ដែលបានប្រគល់ញត្តិដោយផ្ទាល់ជូនស្ថានទូតមួយចំនួន និងស្ថាប័នរដ្ឋ មិនអាចទាក់ទងសុំការបំភ្លឺបានទេកាលពីម្សិលមិញ។
លោក សេដ្ឋា បានគ្រោងទៅជួបជាមួយមន្ត្រីសាលារាជធានីកាលពីម្សិលមិញ ដើម្បីពិភាក្សាពីការតវ៉ា ដែលកាលពីថ្ងៃច័ន្ទបានបំពានសារាចរណែនាំរបស់សាលារាជធានី ដែលអនុញ្ញាតឲ្យតែមនុស្ស១០នាក់ប៉ុណ្ណោះដង្ហែក្បួនក្នុងរាជធានី ជាផ្នែកមួយនៃបាតុកម្មនោះ។
លោក ឡុង ឌីម៉ង់ អ្នកនាំពាក្យសាលារាជធានីបានឲ្យដឹងថា នៅកន្លែងជួបពិភាក្សាគ្នា លោក សេដ្ឋា បានបដិសេធថា មិនជាប់ពាក់ព័ន្ធនឹងអ្នកដុតទង់ជាតិទេ។ លោក ឡុង ឌីម៉ង់ បានមានប្រសាសន៍ថា ” គាត់បាននិយាយថា មនុស្សដែលនៅខាងមុខស្ថានទូតវៀតណាមមិនស្ថិតនៅក្នុងក្រុមរបស់គាត់ទេ”។
លោក ឌីម៉ង់ បានបន្ថែមថា លោក សេដ្ឋា បានស្នើសុំបន្តការតវ៉ា ប៉ុន្តែគាត់ត្រូវបានបដិសេធ ហើយថា អ្នកដែលដុតទង់ជាតិនឹងប្រឈមការដាក់ទោសទណ្ឌ។ លោកបានមានប្រសាសន៍ថា ” វាគឺជាក្រុមអនាធិបតេយ្យ យើងនៅមិនទាន់សម្រេចថា តើត្រូវដាក់ទោសទណ្ឌពួកគេតាមរបៀបណានៅឡើយទេ ប៉ុន្តែយើងនឹងរង់ចាំមើល”។
នៅកន្លែងកើតហេតុ លោក ជុំ ហួត អាយុ២៨ឆ្នាំ ជាអ្នករៀបចំការតវ៉ាម្នាក់មកពីយុវជនខ្មែរមហានគរ ដែលជាអង្គការមួយក្នុងចំណោមអង្គការយុវជនចំនួន១៣ដែលគាំទ្រខ្មែរក្រោម បានលើកឡើងថា គ្មាននរណាម្នាក់គាំទ្រចំពោះការដុតទង់ជាតិនេះទេ។ លោកបាននិយាយថា ” ខ្ញុំគិតថា មនុស្សភាគច្រើនមិនគាំទ្រទង្វើនេះទេ ប៉ុន្តែវាលំបាកណាស់ក្នុងការប្រាប់ឲ្យពួកគេឈប់ ពួកគេនឹងគិតថា យើងជាចារកម្ម”។
លោក ញ៉យ ចំរើន សមាជិកសភាមកពីគណបក្សសង្គ្រោះជាតិ ដែលក៏បានចូលរួមក្នុងការតវ៉ានេះដែរនោះ បានលើកឡើងថា ការដុតទង់ជាតិគឺជារឿងគួរឲ្យព្រួយបារម្ភ។ លោកបានមានប្រសាសន៍ថា ខ្ញុំមិនច្បាស់ទេអំពីសកម្មភាពនេះ។ យើងត្រូវរក្សាការមិនបង្កអំពើហិង្សា ហើយឥឡូវនេះខ្ញុំព្រួយបារម្ភអំពីបញ្ហានេះ”។
ទោះជាយ៉ាងណា ព្រះតេជគុណ សឹង ហៃ ដែលដឹកនាំការដុតទង់ជាតិបានគំរាមចាត់វិធានការបន្ត។ ព្រះតេជគុណមានសង្ឃដីកាដោយសំដៅទៅលើស្ថានទូតថា ” យើងនៅមិនទាន់ដុត ឬកម្ទេចអគារនៅឡើយទេ”។ ព្រះតេជគុណបានបន្តថា ” ថ្ងៃស្អែកប្រសិនបើ ត្រាន វ៉ានថុង មិនមកសុំទោសនោះទេ អាត្មានឹងយកទង់ជាតិ៣០ទៀតមកដុត”។ គេមិនអាចទាក់ទងសុំការបំភ្លឺពីមន្ត្រីស្ថានទូតវៀតណាមបានទេ៕ គឹមហឿន