30 C
Phnom Penh

តំណាង​អង្គការ​សហប្រជាជាតិចុះ​ទៅ​ជួប​ជនជាតិដើម​ភាគតិច​ដើម្បី​ស្ដាប់​ការ​ត្អូញត្អែរ​របស់ពួកគាត់​

ដោយ ឌឹ ខេមបូឌា ដេលី

បទវិភាគ

តំណាង​របស់​អង្គការ​សហប្រជាជាតិ​​ទទួល​បន្ទុក​សិទ្ធិ​មនុស្ស​​នៅ​ក្នុង​ប្រទេស​កម្ពុជា បាន​ចុះទៅ​ជួប​ជាមួយ​អ្នក​ភូមិ​ជនជាតិ​ដើម​ភាគ​តិច​ព្នង​នៅ​ក្នុង​ខេត្ត​មណ្ឌល​គិរី​នៅ​ក្នុង​សប្ដាហ៍​នេះ​ប៉ុន្មាន​ថ្ងៃ​បន្ទាប់ពី​អាជ្ញាធរ​មូលដ្ឋាន​បាន​រារាំង​ពួកគាត​់​រាប់​រយ​នាក់​មិន​ឲ្យ​ហែក្បួន​ ដើម្បី​ប្រារព្ធ​ទិវា​អន្តរជាតិ​ជនជាតិ​ដើម​ភាគ​តិច​ពិភព​លោក​។

​អ្នក​ភូមិ​ម្នាក់​ឈ្មោះ ផ្លាង ស៊ីម បាន​ឲ្យ​ដឹង​ថា លោកស្រី Wan-Hea Lee បាន​ជួប​ជាមួយ​អ្នក​ភូមិ​ជនជាតិ​ដើម​ភាគ​តិច​នៅ​ក្នុង​ឃុំ​ប៊ូស្រា ស្រុក​ពេជ្រាដា កាលពី​ម្សិលមិញ ដើម្បី​ស្ដាប់​ការ​ត្អូញត្អែរ​របស់​ពួកគាត់​​ទាក់​ទិន​រឿង​កាប់​បំផ្លាញ​ព្រៃ​ឈើ​ និង​វិវាទ​​របស់​​ពួកគាត់​ជាមួយ​ក្រុម​ហ៊ុន​ចម្ការ​កៅស៊ូ​ឯកជន​ ដែល​ពួកគាត់​ចោទ​ប្រកាន់​ថា បាន​រំលោភ​យក​ដី​ដូន​តា​របស់​ពួកគាត់។

លោក ស៊ីម បាន​និយាយ​ដោយ​សំដៅ​ទៅ​លើ​ក្រុម​ហ៊ុន Socfin-KDC ជា​ក្រុម​ហ៊ុន​ចម្ការ​កៅស៊ូ​ដែល​អង្គការ​សិទ្ធិ​មនុស្ស​បាន​ចោទ​ប្រកាន់​​ពីបទ​បង្ខំ​អ្នក​ភូមិ​ឲ្យ​លក់​ដី​របស់​ខ្លួន​ថា ” លោកស្រី Lee បាន​សួរ​ខ្ញុំ​ថា តើ​ការ​លំបាក​អ្វី​ខ្លះ​ដែល​យើង​កំពុង​ជួប​ក្នុង​ពេល​បច្ចុប្បន្ន ហើយ​ខ្ញុំ​បាន​ប្រាប់​គាត់​ថា យើង​កំពុង​ប្រឈម​នឹង​ការ​បាត់​បង់​ដី​សហគមន៍​របស់​យើង​ និង​ការ​កាប់​បំផ្លាញ​ព្រៃ​ឈើ​ បន្ទាប់ពី​ក្រុម​ហ៊ុ​ចម្ការ​កៅស៊ូ Socfin ទទួល​បាន​ដី​សម្បទាន​សេដ្ឋកិច្ច​”។

អ្នក​ភូមិ​ម្នាក់​ទៀត​ឈ្មោះ ដួង ប៉ែន មក​ពី​សង្កាត់​សុខដុម ក្រុង​​សែនមនោរម្យ បាន​និយាយ​ថា គាត់​បាន​ជួប​ជាមួយ​លោកស្រី Lee កាលពី​ថ្ងៃ​ច័ន្ទ ហើយ​បាន​លើក​ឡើង​ពី​វិវាទ​​ដីធ្លី​ដែល​សហគមន៍​របស់​គាត់​​ជាមួយ​ក្រុម​ហ៊ុន​​ Villa Development។ លោក យឹម លុច​ អភិ​បាល​រង​ខេត្ត​បាន​បញ្ជាក់​ថា ​ប្រពន្ធ​របស់​គាត់​គឺ​ជា​អគ្គនាយក​ក្រុម​ហ៊ុន​នេះ។

លោក ប៉ែន បាន​និយាយ​ថា “ក្រុម​ហ៊ុន​ទទួល​បាន​ដី​សម្បទាន​សេដ្ឋកិច្ច​​សម្រាប់​ធ្វើ​​ចម្ការ​កៅស៊ូ​ក្នុង​ស្រុក​ពេជ្រាដា ហើយ​បាន​កាប់​ឈើ​ដែល​នៅ​​ម្ដុំ​​ដីសម្បទាន​នោះ​”។ លោកស្រី Lee បាន​ឲ្យ​ដឹង​ថា គាត់​បាន​ប្រាប់​អ្នក​ភូមិ​ថា អង្គការ​សហប្រជាជាតិ​នឹង​បន្ត​ឃ្លាំ​មើល​ស្ថាន​ភាព​នេះ​បន្តទៀត​។

លោកស្រី​បាន​មាន​ប្រសាសន៍​ថា “ប្រសិន​បើ​ និង​នៅ​ពេល​គ្រួសារ​អ្នក​ភូមិ​ជនជាតិ​ដើម​ភាគតិច​ព្នង​ដាក់​ពាក្យ​ប្ដឹង​ទៅ​តុលាការ [អង្គការ​សហប្រជាជាតិ​] នឹង​តាម​ដាន​ករណី​របស់​ពួកគាត់​ដោយ​យក​ចិត្ត​ទុក​ដាក់។ ស្រប​ពេល​នោះដែរ អង្គការ​នឹង​បន្ត​តស៊ូមតិ​សម្រាប់​អ្នក​ភូមិជន​ជាតិ​ដើម​ភាគ​តិច​ព្នង​ឲ្យ​អាច​ប្រើ​ប្រាស់​សេរីភាព​នៃ​ការ​បញ្ចេញ​មតិ​​ និង​ការ​ជួប​ជុំ​ដោយ​សន្តិវិធី​របស់ពួកគាត់”។

អាជ្ញាធរ​បាន​បញ្ឈប់​អ្នក​ភូមិ​ជន​ជាតិ​ដើម​ភាគតិច​ព្នង​មិន​ឲ្យ​ហែក្បួន​តាម​ក្រុង​សែន​មនោរម្យ ដើម្បី​ប្រារព្ធ​ទិវា​អន្តរជាតិ​ជនជាតិ​ដើម​ភាគ​តិច​ពិភព​លោក​កាលពី​ថ្ងៃ​សៅរ៍ ​ដោយ​​អះអាង​ថា វា​នឹងធ្វើ​ឲ្យ​ភ្ញៀវ​ទេសចរ​ “យល់​ច្រឡំ”។

លោកស្រី Lee បាន​ឲ្យ​ដឹង​បន្ត​ថា គាត់​សង្ស័យ​ចំពោះ​ហេតុផល​នេះ​។ លោកស្រី​បាន​មាន​ប្រសាសន៍​ថា “ជំហរ​របស់​​យើង​គឺ​ថា គួរ​តែ​មាន​សិទ្ធិ​ជួប​ជុំ​ដោយ​សន្តិ​វិធី​។ ខ្ញុំ​មិន​ទាន់​ឃើញ​ហេតុផ​ល​ផ្លូវ​ការ​ទេ ប៉ុន្តែ​ប្រសិន​បើ​មាន​ហេតុ​ផល​ដែល​សម​ហេតុ​ផល​ចំពោះ​ការ​ហាម​មិន​ឲ្យ​ហែក្បួន ខ្ញុំ​មិន​​ទាន់​ឃើញ​នៅ​ឡើយ​ទេ​”៕ គឹមហឿន​​​​​​​​​​​​​

 

© 2022, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស