កាលពីម្សិលមិញ សាលាដំបូងរាជធានីភ្នំពេញបានកោះហៅមន្ត្រីគណបក្សសង្គ្រោះជាតិម្នាក់ទៅសាកសួរជុំវិញការជាប់ពាក់ព័ន្ធរបស់គាត់នៅក្នុងហេតុការណ៍ប៉ះទង្គិចគ្នាមួយ ដែលបានផ្ទុះឡើងជិតទីលានប្រជាធិបតេយ្យកាលពីថ្ងៃទី១៥ខែកក្កដា ចំណែកឯសកម្មជនយុវជនបីរូបទៀតរបស់គណបក្សប្រឆាំងដែលកំពុងជាប់ឃុំនៅឡើយ ត្រូវបានកំណត់កាលបរិច្ឆេទឲ្យចូលខ្លួនទៅសាលាឧទ្ធរណ៍ នេះបើយោងតាមការលើកឡើងរបស់មេធាវីជនជាប់ចោទទាំងនេះ។
យោងតាមគណបក្សសង្គ្រោះជាតិបានឲ្យដឹងថា លោក មៀច សុវណ្ណារ៉ា សកម្មជនគណបក្សសង្គ្រោះជាតិ ដែលមានវត្តមានអំឡុងការតវ៉ានៅទីលានប្រជាធិបតេយ្យកាលពីខែមុនក៏ត្រូវបានតុលាការកោះហៅឲ្យចូលខ្លួនដែរ។
លោក អឿ ណារិទ្ធ ជំនួយការរបស់លោកស្រី មូរ សុខហួរ ប្រធានកិច្ចការសាធារណៈរបស់គណបក្សសង្គ្រោះជាតិ ត្រូវបានចៅក្រមសើុបសួរ កែវ មុនី សាកសួរកាលពីម្សិលមិញ ជុំវិញការជាប់ពាក់ព័ន្ធរបស់គាត់នៅក្នុងការតវ៉ាហិង្សា ដែលតុលាការបានប្រើប្រាស់ជាមូលដ្ឋាននៃការចោទប្រកាន់ពីបទដឹកនាំកុបកម្ម និងញុះញង់ឲ្យប្រព្រឹត្តបទឧក្រិដ្ឋ។
លោក អឿ ណារិទ្ធ បានមានប្រសាសន៍ថា “អំឡុងពេលសាកសួរ លោកដឹងច្បាស់ថា បទចោទប្រកាន់ទាំងនេះដែលត្រូវបានដាក់មកលើតំណាងរាស្ត្រគណបក្សសង្គ្រោះជាតិប្រាំពីររូប ដែលមានវត្តមានអំឡុងការតវ៉ានោះដែរនៅខ្វះភ័ស្តុតាងច្រើនណាស់។
លោកមានប្រសាសន៍ទៀតថា “ខ្ញុំអាចមើលឃើញថា វាជាបញ្ហានយោបាយ ដែលជាប់ពាក់ព័ន្ធនឹងការបំភិតបំភ័យយុវជនគណបក្សសង្គ្រោះជាតិ។ប្រសិនបើតុលាការរកយុត្តិធម៌ពិតប្រាកដឲ្យខ្ញុំ ខ្ញុំមិនខ្លាចទេ ពីព្រោះអ្វីដែលខ្ញុំបានធ្វើចាប់ពីរដើមហូតដល់ចប់ គឺផ្អែកលើច្បាប់ និងធ្វើឡើងដោយអហិង្សា”។
លោក សម សុគង់ មេធាវីរបស់គណបក្សសង្គ្រោះជាតិបានមានប្រសាសន៍ថា លោកបានទទួលបានសេចក្តីជូនដំណឹងកាលពីម្សិលមិញថា ប្រធានចលនាយុវជនទាំងបីរូបរបស់គណបក្សសង្គ្រោះជាតិ ដែលត្រូវបានចាប់ខ្លួនកាលពីថ្ងៃទី២ ខែសីហា និងត្រូវបានបញ្ជូនខ្លួនទៅពន្ធនាគារព្រៃសជុំវិញការពាក់ព័ន្ធរបស់ពួកគេនៅក្នុងអំពើហិង្សាកាលពីថ្ងៃទី១៥ ខែកក្កដាត្រូវបានកោះហៅឲ្យចូលខ្លួនទៅសាលាឧទ្ធរណ៍៍នៅថ្ងៃទី២២ ខែសីហា។
លោក ឃិន ជំរឿន អាយុ៣២ឆ្នាំ ជាប្រធានចលនាយុវជនគណបក្សសង្គ្រោះជាតិរាជធានីភ្នំពេញ លោក នាង សុឃុន អាយុ២៨ឆ្នាំ ជាប្រធានចលនាយុវជនរបស់គណបក្សសង្គ្រោះជាតិខណ្ឌទួលគោក និងលោក សាន គឹមហេង អាយុ២៨ឆ្នាំជាហេរញ្ញិករបស់ចលនាយុវជនគណបក្សសង្គ្រោះជាតិខណ្ឌមានជ័យ ត្រូវបានតុលាការច្រានចោលសំណើសុំដោះលែងនៅក្រៅឃុំកាលពីដើមខែនេះ ទោះបីជាលោក សម រង្ស៊ី ប្រធានគណបក្សសង្គ្រោះជាតិមានប្រសាសន៍ម្ដងហើយម្ដងទៀតថា គណបក្សប្រជាជនកម្ពុជាបានធានាអះអាងចំពោះលោកថា ពួកគេនឹងត្រូវបានដោះលែងក្នុងពេលឆាប់ៗនេះក្ដី។
លោក ម៉ៅ មុន្នីវណ្ណ មេធាវីរបស់គណបក្សសង្គ្រោះជាតិបានមានប្រសាសន៍កាលពីម្សិលមិញថា ចៅក្រម កែវ មុនី បានកោះហៅលោក មៀច សុវណ្ណារ៉ា ឲ្យចូលខ្លួនទៅតុលាការដើម្បីសាកសួរនៅពីថ្ងៃទី១ ខែកញ្ញា ។
លោកបានមានប្រសាសន៍ទៀតថា ” នេះគឺជាបញ្ហានយោបាយ។ យើងត្រូវតែគោរពតាមកិច្ចព្រមព្រៀងនយោបាយរវាងគណបក្សនយោបាយទាំងពីរដើម្បីបញ្ចប់បញ្ហាទាំងនេះ”៕សុខុម