ក្រុមអ្នកតវ៉ាជាតិនិយមដែលបានទាមទារឲ្យអ្នកការទូតវៀតណាមម្នាក់សូមទោសចំពោះលើកឡើងដ៏ចម្រូងចម្រាសទាក់ទងនឹងការកាន់កាប់កម្ពុជាក្រោមរយៈពេល៦៥ឆ្នាំមកហើយនោះ បានបញ្ឈប់ការតវ៉ារបស់ខ្លួននៅថ្ងៃទី៣កាលពីម្សិលមិញ ដោយសន្យាថានឹងត្រឡប់មកធ្វើការតវ៉ានៅតាមផ្លូវទៀត ប្រសិនបើស្ថានទូតវៀតណាមមិនអើពើនឹងការទាមទាររបស់ខ្លួននោះ។
ព្រះសង្ឃនិងអ្នកតវ៉ារាប់រយអង្គ-នាក់ ដែលភាគច្រើនកាន់ទង់ជាតិខ្មែរនិងទង់ជាតិកម្ពុជាក្រោមនោះ បានធ្វើការតវ៉ានៅស្ថានទូតវៀតណាមរយៈពេលបីថ្ងៃជំុវិញការលើកឡើងរបស់លោក ត្រាន វ៉ានថុង អ្នកនាំពាក្យស្ថានទូតនេះកាលពីខែមិថុនា។
កាលពីថ្ងៃអង្គារ ព្រះសង្ឃមួយអង្គនិងអ្នកតវ៉ាពីរបីនាក់បានដុតទង់ជាតិវៀតណាម ហើយបានសន្យាដុតចំនួន៥០ទៀត ប៉ុន្តែការតវ៉ាបានបញ្ចប់ដោយអហិង្សាកាលពីម្សិលមិញ ដោយលោក ថាច់ សេដ្ឋា នាយកប្រតិបត្តិសហគមន៍ខ្មែរកម្ពុជាក្រោម អំពាវនាវឲ្យរដ្ឋាភិបាលកម្ពុជា និងវៀតណាមធ្វើការរួមគ្នាដើម្បីដោះស្រាយជម្លោះនេះ។
ដោយប្រើប្រាស់ពាក្យបែបប្រមាថដល់ជនជាតិវៀតណាម លោក សេដ្ឋា បានមានប្រសាសន៍ថា “យើងនឹងអនុញ្ញាតឲ្យរដ្ឋាភិបាលរបស់យើងធ្វើការជាមួយរដ្ឋាភិបាលយួនរយៈពេលមួយទៅពីរសប្តាហ៍។ ប្រសិនបើមិនមានដំណោះស្រាយទេនោះ យើងនឹងធ្វើការតវ៉ាទៀត ហើយយើងនឹងមិនដកថយឡើយ”។
កាលពីខែកក្កដា លោក សេដ្ឋា ដែលជាសមាជិកគណៈកម្មាធិការអចិន្ត្រៃយ៍គណបក្សសង្គ្រោះជាតិ ក៏បានដឹកនាំការតវ៉ារយៈពេលបីថ្ងៃនៅស្ថានទូតវៀតណាម ហើយទុកពេលពីរសប្តាហ៍ឲ្យរដ្ឋាភិបាលស្វែងរកដំណោះស្រាយ។
ញត្តិដែលចុះហត្ថលេខាដោយអង្គការយុវជនចំនួន១៣ ដើម្បីជំរុញឲ្យរដ្ឋាភិបាលបរទេសដាក់សម្ពាធលើអ្នកការទូតវៀតណាមឲ្យសូមទោសនោះ ត្រូវបានទទួលយកដោយស្ថានទូតរបស់ប្រទេសមួយចំនួនជុំវិញការតវ៉ាពីរលើករយៈពេលបីថ្ងៃនេះ។ ទោះយ៉ាងណា កាលពីម្សិលមិញ លោក សេដ្ឋា មិនបានប្រគល់ញត្តិទៅតំណាងស្ថានទូតថៃឡើយ។
បន្ទាប់ពីរង់ចាំរយៈពេលជិតមួយម៉ោងចាំនរណាម្នាក់មកជួបជាមួយអ្នកតវ៉ាប្រហែល៤០០នាក់ បុរសម្នាក់បានចេញមកពីស្ថានទូតថៃ ប៉ុន្តែបដិសេធមិនប្រាប់ឈ្មោះ ឬតួនាទីដោយធ្វើឲ្យលោក សេដ្ឋា មិនប្រគល់ញត្តិឲ្យ។
លោកបានមានប្រសាសន៍ថា ” យើងបានដាក់ញត្តិរបស់យើងជូនប្រទេសនៅតំបន់អាស៊ីទាំងអស់លើកលែងតែស្ថានទូតថៃ ដែលមិនបានទទួលយក”។
ព្រះតេជគុណ សឹង ហៃ ដែលបានដឹកនាំការដុតទង់ជាតិកាលពីថ្ងៃអង្គារ បានមានសង្ឃដីកានៅស្ថានទូតកាលពីព្រឹកម្សិលមិញថា ព្រះអង្គនឹង ” ដុតទង់ជាតិ៥០ទៀតនៅម៉ោង៣សៀល”។ ទោះជាយ៉ាងណា នៅពេលឆាន់ចង្ហាន់ថ្ងៃត្រង់រួច ព្រះតេជគុណ សឹង ហៃ បានបាត់ខ្លួនពីកន្លែងតវ៉ា។
ព្រះតេជគុណ ថាច់ ហាសំអាង ព្រះចៅអធិការវត្តសាមគ្គីរង្សី ជាវត្តដែលស្ថិតក្នុងសង្កាត់ស្ទឹងមានជ័យ និងដែលមានព្រះសង្ឃខ្មែរក្រោមគង់នៅច្រើន បានមានសង្ឃដីកាថា ” ព្រះតេជគុ ណ សឹង ហៃ គង់នៅកន្លែងមានសុវត្ថិភាព បន្ទាប់ពីទទួលបានការបំភិតបំភ័យចំពោះការដុតទង់ជាតិ។ នៅពេលព្រះអង្គបានដុតទង់ជាតិនោះ ព្រះអង្គមិនខ្លាចទេ ប៉ុន្តែក្រោយមកព្រះអង្គទទួលបានព័ត៌មានថា គេនឹងចាប់ខ្លួនព្រះអង្គ ព្រះអង្គបានទៅគង់នៅកន្លែងដែលមានសុវត្ថិភាព”។
នៅម៉ោងប្រហែល៨ព្រឹក ការប៉ះទង្គិចគ្នាមួយបានកើតឡើងនៅកន្លែងតវ៉ា នៅពេលព្រះសង្ឃមួយចំនួនបានចង្អុលទៅបុរសម្នាក់ ហើយស្រែកថា “ចារកម្មយួន ចារកម្មយួន” ដោយឲ្យអ្នកតវ៉ាដែលមានកំហឹងមួយក្រុមដេញតាមបុរសនោះ។
បុរសដែលព្រះសង្ឃអះអាងថា បានតាមដានព្រះតេជគុណ សឹង ហៃ ពេញមួយយប់នោះ បានឡើងជិះម៉ូតូបើកចេញពីកន្លែងនោះបាត់ដោយគ្មានរងរបួសឡើយ។ នគរបាលមិនអាចទាក់ទងដើម្បីបញ្ជាក់ថា តើព្រះតេជគុណ សឹង ហៃ ត្រូវគេតាមចាប់ខ្លួនឬយ៉ាងណានោះទេ។
លោក ឡុង ឌីម៉ង់ អ្នកនាំពាក្យសាលារាជធានីបានមានប្រសាសន៍ថា លោកមិនអាចបញ្ជាក់ពីការអះអាងនេះបានទេ៕ សារុន