37.3 C
Phnom Penh

នគរបាល​ត្រូវ​បាន​ចោទ​ប្រកាន់​ពី​បទវាយ​អ្នក​បើក​បរ​ម៉ូតូ​ដែលគ្មាន​មួក​សុវត្ថិភាព

ដោយ ឌឹ ខេមបូឌា ដេលី

បទវិភាគ

បុរស​ពីរ​នាក់​បាន​ដាក់​ពាក្យ​បណ្ដឹង​ទៅ​អាជ្ញាធរ​ ដោយ​អះអាង​ថា នគរ​បាល​ជាង​១០​នាក់​បាន​វាយ​ពួកគេ​នៅពេល​ចាប់​បង្ខាំង​រយៈ​ពេល​ប្រាំ​ម៉ោង បន្ទាប់ពីពួកគេ​ត្រូវ​បាន​ឃាត់​ដោយ​សារ​បើក​បរ​មិន​ពាក់មួក​សុវត្ថិភាព​នៅ​ក្នុង​ខេត្ត​បាត់ដំបង​កាលពី​ថ្ងៃសៅរ៍។

ប្រាក់ តុលា អាយុ​២៤​ឆ្នាំ និង​ សុត រ៉ាវី អាយុ​២៣​ឆ្នាំ​បាន​និយាយ​ថា ពួកគេ​បានធ្វើ​ដំណើរ​​ទៅ​ចូល​រួម​​​ពិធី​ខួប​កំណើត​មិត្ត​ភក្ដិ​ក្នុង​ក្រុង​បាត់​ដំបង ដោយជិះម៉ូតូ​ជាមួយ ​រ៉ាវី នៅ​ពេល​នោះ​នគរ​បាល​ពីរ​នាក់​បាន​ឃាត់​ពួកគេ​​ ព្រោះ​មិន​បាន​ពាក់​មួក​សុវត្ថិភាព​ ហើយ​កញ្ចក់​សម្រាប់​មើលក្រោយ​បែក​ទៀត​​នៅ​ម៉ោង​​ប្រហែល​៧​និង​៣០​នាទីព្រឹក​ថ្ងៃ​សៅរ៍។

បុរស​ទាំងពីរ​នាក់​នេះ​អះអាង​ថា ​នគរ​បាល​បាន​​ទាមទារ​ប្រាក់​ពិន័យ​៧.០០០រៀល​ ប៉ុន្តែ​ពួកគេ​ទាំងពីរនាក់​មាន​ប្រាក់​តែ​២.០០០រៀល​ប៉ុណ្ណោះ​​ ធ្វើ​ឲ្យ​មន្ត្រី​នគរ​បាលនោះ​មាន​កំហឹង​។

តុលា បាន​និយាយ​កាលពី​ម្សិលមិញ​ថា “នគរ​បាល​បាន​ព្យាយាម​បើក​កែប​ម៉ូតូ ហើយ​យើង​បាន​ប្រាប់​ពួកគេ​កុំ​ឲ្យ​ដាក់​គ្រឿង​ញៀន​នៅ​ក្នុង​នោះ ហើយមក​​ចោទ​ពួកយើងឲ្យ​សោះ”។​​ តុលា បាន​និយាយ​ថា បន្ទាប់​មក​នគរ​បាល​ម្នាក់​បាន​ដាល់​មុខ​ខ្លួន​មួយដៃ​មុន​ពេលយក​ពួកគេទាំង​ពីរ​នាក់​ទៅ​ស្នង​ការ​ដ្ឋាន​នគរ​បាល​ខេត្ត​ ដែល​នៅទីនោះ​ពួកគេទាំងពីរ​​រង​ការ​វាយ​ដំ​ជា​ទ ម្ងន់​ពី​សំណាក់​មន្ត្រី​នគរបាល​មួយ​ក្រុម​​។

បុរស​រូប​នេះ​បាន​និយាយ​ថា “នគរ​បាល​បាន​ចង​ដៃ​របស់​យើង​នៅពេល​យើង​ទៅដល់​កន្លែង​ឃុំ​ខ្លួន​​របស់​នគរ​បាល បន្ទាប់​​មកបាន​​បិទ​ភ្លើង​ ហើយ​មន្ត្រី​នគរ​បាល​​ប្រហែល​១០​នាក់​បាន​វាយ​មក​លើ​ពួកយើង​”។ តុលា បាន​បន្ថែម​ថា ខ្លួន​សន្លប់​អំឡុង​ការ​វាយ​ដំនោះ មុន​ពេល​ត្រូវ​បាន​ដោះ​លែង​វិញ​។ តុលា បាន​និយាយ​ថា នគរ​បាល​អះអាង​ថា ខ្លួន​និង​ រ៉ាវី បាន​ប្រើអំពើ​ហិង្សា​នៅ​ពេល​នគរបាល​​ឃាត់នោះ​ ជា​អ្វី​ដែល​ពួកគេទាំងពីរនាក់​​​បដិសេធ​។

យោង​តាម​លោក យិន ម៉េងលី អ្នក​សម្រប​សម្រួល​អង្គការ​អាដហុក​ប្រចាំ​ខេត្ត​បាត​់​ដំបង បាន​ឲ្យ​ដឹង​ថា បុរសទាំង​ពីរនាក់​នេះ​បាន​ដាក់​ពាក្យ​បណ្តឹង​នៅ​សាលា​ដំបូង​ខេត្ត​កាលពី​ថ្ងៃ​អង្គារ​​បន្ទាប់ពី​ស្វែងរក​ជំនួយ​ពី​អង្គការ​សិទ្ធិមនុស្ស​ក្នុង​ស្រុក​អាដហុក។ លោក ម៉េង​លី បាន​មាន​ប្រសាសន៍ថា ” វា​ជាការ​រំលោភ​សិទ្ធិ​មនុស្ស​ធ្ងន់​ធ្ងរ​ រួម​ទាំង​ការ​ធ្វើ​ទារុណកម្មផង​​ នេះ​គឺ​ជាបទ​ឧក្រិដ្ឋ​ធ្ងន់ធ្ងរ​ដែល​មន្ត្រី​នគរ​បាលបាន​ប្រព្រឹត្ត”។

លោក សាត គឹមសាន នាយ​នគរ​បាល​ចរាចរ​ខេត្ត​បាន​មាន​ប្រសាសន៍ថា លោក​មិន​ដឹង​អំពីករណី​នេះ​ទេ ប៉ុន្តែ​លោក​នឹង​ស៊ើប​អង្កេត​ការអះអាង​នេះ​។

លោក គឹមសាន បាន​មាន​ប្រសាសន៍​ថា “​មិនទាន់​មាន​ការ​ដាក់​ពាក្យ​បណ្ដឹងប្ត​ឹងនគរ​​បាល​របស់​យើង​នៅ​ឡើយ​ទេ​ ប៉ុន្តែ​មន្ត្រី​នគរ​បាល​មាន​សិទ្ធិ​ចាប់​ខ្លួននិង​ឃុំ​ខ្លួន​មនុស្ស​ ប្រសិន​បើពួកគេ​តដៃ​ជាមួយ​ពួកយើង​”។ គេ​មិន​អាច​ទាក់ទង​មន្ត្រី​សាលាដំបូង​ខេត្ត​ដើម្បី​សុំ​អត្ថាធិប្បាយ​​បានទេ៕ សារុន​​​​​​​​​

 

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស