មន្ត្រីមួយរូបនៅក្រសួងរ៉ែ និងថាមពល បានលើកឡើងកាលពីម្សិលមិញថា ទំនប់វារីអគ្គិសនីទី៦របស់ចិន នៅក្នុងខេត្តកោះកុង បានចាប់ផ្ដើមដំណើរការម៉ាស៊ីនភ្លើងមួយគ្រឿងក្នុងចំណោមម៉ាស៊ីនភ្លើងបីគ្រឿងជាការសាកល្បងកាលពីថ្ងៃពុធ។
លោក អិុត ប្រាំង រដ្ឋលេខាធិការក្រសួងរ៉ែ និងថាមពល បានមានប្រសាសន៍ថា អាជ្ញាធរអគ្គិសនីកម្ពុជានឹងធ្វើការវាយតម្លៃលើទំនប់វារីអគ្គិសនីនេះ អំឡុងដំណាក់កាលសាកល្បងនេះ។ លោកបានលើកឡើងថា ប្រសិនបើអ្វីៗដំណើរការតាមការគ្រោងទុក គេរំពឹងថា ទំនប់វារីអគ្គិសនីនេះនឹងបំពេញការខ្វះខាតនៅក្នុងការផ្គត់ផ្គង់ថាមពលអគ្គិសនីក្នុងប្រទេសកម្ពុជា ហើយនឹងធ្វើឲ្យតម្លៃអគ្គិសនីធ្លាក់ចុះ។
លោកបានមានប្រសាសន៍បន្ថែមទៀតថា “ទំនប់វារីអគ្គិសនីនៅតាតៃកំពុងធ្វើតេស្តសាកល្បង។ ប្រសិនបើគ្មានបញ្ហាអ្វីទេនោះ វាជាការប្រសើរណាស់សម្រាប់ការផ្គត់ផ្គង់អគ្គិសនីនៅក្នុងប្រទេសកម្ពុជា ពីព្រោះយើងខ្វះអគ្គិសនីដោយសារតម្រូវការកើនឡើងរាល់ថ្ងៃ ដោយសារសកម្មភាពសាងសង់ និងនៅតាមលំនៅដ្ឋានប្រជាពលរដ្ឋ។ នៅពេលទំនប់នេះដំណើរការពេញលេញ យើងនឹងមានថាមពលដ៏ច្រើនសម្រាប់ផ្គត់ផ្គង់ ហើយតម្លៃនឹងចុះថោក”។
ក្រុមហ៊ុន China National Heavy Machinery Corporation បានចាប់ផ្ដើមសាងសង់ទំនប់វារីអគ្គិសនីកម្លាំង២៤៦មេហ្គាវ៉ាត់នេះនៅឆ្នាំ២០១០ ដោយចំណាយអស់ទឹកប្រាក់ប្រមាណ៥៤០លានដុល្លារ។ នៅទីបំផុត ម៉ាស៊ីនភ្លើងបីគ្រឿង ដែលក្នុងមួយគ្រឿងៗមានសមត្ថភាពផលិតអគ្គិសនីបាន៨២មេហ្គាវ៉ាត់ នឹងដាក់ឲ្យដំណើរការនៅទំនប់វារីអគ្គិសនីនេះ នេះបើយោងតាមសេចក្ដីរាយការណ៍ដោយទីភ្នាក់ងារសារព័ត៌មានស៊ីនហួ របស់ប្រទេសចិន។
យោងតាមទិន្នន័យទទួលបានពីទីភ្នាក់ងារសារព័ត៌មានស៊ីនហួ និងក្រសួងរ៉ែ និងថាមពល បង្ហាញថា ប្រទេសចិនគឺជាអ្នកវិនិយោគធំបំផុតលើទំនប់វារីអគ្គិសនីនៅក្នុងប្រទេសកម្ពុជា ដោយបានបោះទុនរហូតដល់ទៅ១,៦ពាន់លានដុល្លារ ដើម្បីផលិតអគ្គិសនី ដែលមានកម្លាំងសរុប៨២៨មេហ្គាវ៉ាត់។
ទំនប់វារីអគ្គិសនីរបស់ចិននៅក្នុងប្រទេសកម្ពុជាបានរងការរិះគន់យ៉ាងខ្លាំងម្ដងហើយម្ដងទៀតចំពោះការជម្លៀសប្រជាពលរដ្ឋចេញពីលំនៅដ្ឋាន និងការធ្វើឲ្យប៉ះពាល់ដល់បរិស្ថាន។ ទោះជាយ៉ាងណា លោក អាឡិច ហ្គនហ្សាឡេស ដេវីដសុន (Alex Gonzalez Davidson) ស្ថាបនិកអង្គការ Mother Nature ជាអង្គការមិនមែនរដ្ឋាភិបាលមួយដែលកំពុងតែធ្វើយុទ្ធនាការប្រឆាំងការសាងសង់ទំនប់វារីអគ្គិសនីដ៏ចម្រូងចម្រាសមួយនៅក្នុងខេត្តកោះកុង បានមានប្រសាសន៍ថា ទំនប់ថ្មីបំផុតនៅស្ទឹងតាតៃនេះស្ទើរតែគ្មានផលប៉ះពាល់អវិជ្ជមានលើបរិស្ថានទេ។
លោកបានមានប្រសាសន៍ថា “ផលប៉ះពាល់ផ្នែកបរិស្ថានមិនធ្ងន់ធ្ងរដល់ថ្នាក់នោះទេ ពីព្រោះអាងស្តុកទឹកមិនធំ ហើយ ដីដែលត្រូវបានឈូសឆាយក៏ជាផ្នែកមួយនៃស្ទឹងនោះដែរ”។
ប៉ុន្តែ លោកបានមានប្រសាសន៍ថា អ្នកដែលពាក់ព័ន្ធនឹងការសាងសង់ទំនប់នេះ បានឆ្លៀតឱកាសកាប់ឈើមានតម្លៃនៅតំបន់ជុំវិញនោះ ហើយលាងវាតាមរយៈអាងស្តុកទឹកនេះ៕សុខុម