ម្ចាស់ហាងអុីនធើណិតកាហ្វេចំនួនពីរនាក់ត្រូវបានដោះលែងពីកន្លែងឃុំខ្លួនរបស់នគរបាលកាលពីម្សិលមិញ បន្ទាប់ពីពួកគេយល់ព្រមបិទហាងរបស់ខ្លួនក្នុងក្រុងបាត់ដំបង ក្រោយពីនគរបាលបានឆ្មក់ចូលហាងទាំងនោះ បន្ទាប់ពីមានការត្អូញត្អែរពីអាណាព្យាបាលសិស្ស។
រដ្ឋាភិបាលបានហាមមិនឲ្យបើកហាងអុីនធើណិតកាហ្វេ កន្លែងដែលសិស្សជាច្រើនបានចំណាយពេលរាប់ម៉ោងលេងហ្គេមតាមប្រព័ន្ធអុីនធើណិតឥតឈប់ឈរនោះ ក្នុងចម្ងាយប្រហែល៥០០ម៉ែត្រពីសាលារៀន កាលពីខែវិច្ឆិកា ឆ្នាំ២០១៣។
សេចក្ដីប្រកាសដែលចុះហត្ថលេខាដោយលោក ប្រាក់ សុខុន រដ្ឋមន្ត្រីក្រសួងប្រៃសណីយ៍ និងទូរគមនាគមន៍ ក៏បានហាមសិស្សអាយុក្រោម១៨ឆ្នាំមិនឲ្យចូលទៅហាងអុីនធើណិតបែបនោះដែរ ជាការខិតខំប្រឹងប្រែងដើម្បីឲ្យពួកគេផ្ដោតលើការសិក្សាវិញ។
ផាន់ សុខចំរើន អាយុ២០ឆ្នាំ ជាម្ចាស់ហាងអុីនធើណិតក្នុងសង្កាត់ស្វាយប៉ោ និង ជុំ សុខៃ អាយុ២០ឆ្នាំ ជាម្ចាស់ហាងមួយទៀតនៅក្នុងសង្កាត់តែមួយនេះ ត្រូវបានចាប់ខ្លួនកាលពីថ្ងៃពុធ ហើយត្រូវបានដោះលែងវិញកាលពីថ្ងៃម្សិលមិញ។
លោក ជេត វណ្ណី ស្នងការរងនគរបាលខេត្តបានមានប្រសាសន៍ថា ” យើងបានបញ្ជាឲ្យមន្ត្រីចុះបង្ក្រាបទីតាំងទាំងនេះ ពីព្រោះទីតាំងទាំងនេះនៅជិតសាលារៀន ហើយសិស្សជាច្រើនបានគេចសាលាទៅលេងហ្គេមនៅហាងអុីនធើណិតនោះរាល់ថ្ងៃ។ យើងទទួលបានការត្អូញត្អែរពីអាណាព្យាបាលសិស្ស”។
លោក វណ្ណី បានមានប្រសាសន៍ថា ក្រុមមន្ត្រីដកហូតកុំព្យូទ័របានចំនួន១០០គ្រឿង ហើយ “អប់រំ” សិស្ស៣០នាក់ អាយុពី៨ឆ្នាំដល់១៨ឆ្នាំឲ្យយល់ដឹងអំពីសារៈសំខាន់នៃការសិក្សាជាជាងការលេងហ្គេម។
លោក ម៉េង លៀង នាយនគរបាលព្រហ្មទណ្ឌកម្រិតស្រាលខេត្ត បានមានប្រសាសន៍ថា នគរបាលបានស៊ើបអង្កេតហាងទាំងពីរនេះរយៈពេលបីខែមុនពេលចាត់វិធានការ។
លោកបានមានប្រសាសន៍ថា ” យើងក៏កំពុងស៊ើបអង្កេតដើម្បីបង្ក្រាបហាងមួយចំនួនទៀតផងដែរ។ ហាងទាំងពីរនេះត្រូវបានរឹបអូសយកសម្ភារទាំងអស់ ហើយយកទៅរក្សាទុកនៅស្នងការដ្ឋាននគរបាលខេត្ត។ នៅក្នុងរាជធានីភ្នំពេញ ម្ចាស់ហាងមួយចំនួនមិនបារម្ភអំពីការបង្ក្រាបរបស់នគរបាលនៅពេលណាមួយឆាប់ៗនេះឡើយ។
លោក ឈួន សុធា អ្នកគ្រប់គ្រងហាងអុីនធើណិត PS ក្នុងសង្កាត់ផ្សារថ្មី៣ ដែលស្ថិតនៅជិតសាលាបឋមសិក្សាភ្នំដូនពេញ និងវិទ្យាល័យព្រះស៊ីសុវត្ថិ បាននិយាយថា លោកមិនដែលមានបញ្ហាជាមួយនគរបាលឡើយ។
លោកបាននិយាយថា “ខ្ញុំបានបើកហាងនៅទីនេះជាងមួយឆ្នាំមកហើយ ហើយមិនដែលមានបញ្ហាទេ”។ លោក សុធា បាននិយាយថា លោកហាមសិស្សអាយុក្រោម១៨ឆ្នាំមិនឲ្យចូលប្រើប្រាស់អុីនធើណិតនៅហាងរបស់លោក។ លោកបានបន្ថែមថា ” មិនមានផលប៉ះពាល់ណាមួយដល់សិស្សទេ ពីព្រោះយើងហាមមិនឲ្យពួកគេចូលឡើយ”៕ សារុន