កាលពីម្សិលមិញ កងកម្លាំងសន្តិសុខក្រុងភ្នំពេញបានរារាំងសកម្មជនមិនឲ្យជិះកង់នៅក្នុងទីក្រុងធ្វើយុទ្ធនាការប្រឆាំងការសាងសង់ទំនប់វារីអគ្គិសនីនៅក្នុងខេត្តកោះកុង ដោយអះអាងថា អ្នករៀបចំមិនបានស្នើសុំការអនុញ្ញាតពីសាលារាជធានីទេ។
អង្គការ Mother Nature បានធ្វើយុទ្ធនាការតាងនាមឲ្យសហគមន៍ជនជាតិដើមភាគតិចជង នៅក្នុងខេត្តកោះកុង ដែលចង់ឲ្យរដ្ឋាភិបាលលុបចោលគម្រោងរបស់ខ្លួនសម្រាប់ទំនប់ស្ទឹងអារ៉ែងកម្លាំង១០៨មេហ្គាវ៉ាត់។ គម្រោងនេះនឹងធ្វើឲ្យប្រជាជនរាប់រយគ្រួសារផ្លាស់ទីលំនៅ និងធ្វើឲ្យជន់លិចដីលំនៅដ្ឋានដូនតារបស់ពួកគេនៅតាមព្រៃ ដែលជាកន្លែងរស់នៅរបស់សត្វជិតផុតពូជមួយចំនួនផងដែរ។
អង្គការនេះកំពុងរៀបចំផែនការផ្សព្វផ្សាយព័ត៌មានអំពីយុទ្ធនាការរបស់ខ្លួន ដោយដឹកនាំការជិះកង់កាលពីម្សិលមិញនៅក្នុងទីក្រុងភ្នំពេញ ដែលមានអ្នកគាំទ្រភាគច្រើនមកពីយុវជនខ្មែរមហានគរ ជាក្រុមយុវជនដែលបានតស៊ូមតិសម្រាប់បុព្វហេតុជាច្រើន។ ពួកគេប្រហែល៤០នាក់បានប្រមូលផ្ដុំគ្នានៅការិយាល័យអង្គការ Mother Nature នៅទីក្រុងភ្នំពេញ ក្នុងខណ្ឌមានជ័យ នៅពេលរសៀល។
លោក អាឡិច ហ្គន់ហ្សាឡេ ដាវីសុន សហស្ថាបនិកអង្គការ Mother Nature បាននិយាយថា អង្គការមានគម្រោងជិះកង់នៅក្នុងទីក្រុងប្រហែលបីម៉ោង ដោយមានចែកខិត្តប័ណ្ណ។ លោកបាននិយាយថា អង្គការបានជូនដំណឹងសាលារាជធានីកាលពីថ្ងៃទី១១ ខែសីហា អំពីផែនការរបស់ខ្លួនតាមច្បាប់ស្ដីពីការជួបជុំគ្នាដោយអហិង្សារួចហើយ។
ទោះជាយ៉ាងណា មុនពេលពួកគេចាប់ផ្ដើម សន្ដិខុសខណ្ឌ នគរបាល និងកងរាជអាវុធហត្ថប្រហែល៦០នាក់ បានទៅប្រាប់ពួកគេឲ្យឈប់ និងបិទផ្លូវមិនឲ្យពួកគេជិះកង់។
លឹម គឹមស៊ សកម្មជនយុវជនខ្មែរមហានគរ បាននិយាយថា អាជ្ញាធរគ្មានសិទ្ធិរារាំងពួកគេមិនឲ្យជិះកង់ទេ។ គាត់បាននិយាយថា “យើងគ្រាន់តែចង់ជិះកង់ផ្សព្វផ្សាយព័ត៌មានអំពីផលប៉ះពាល់ដោយសារទំនប់នេះមកលើបរិស្ថានប៉ុណ្ណោះ ហើយយើងបានជូនដំណឹងពួកគាត់រួចហើយ ប៉ុន្តែពួកគាត់មិនអនុញ្ញាតឲ្យយើងទេ។ យើងមិនសប្បាយចិត្តចំពោះរឿងនេះឡើយ”។
លោក ឡុង ឌីម៉ង់ អ្នកនាំពាក្យសាលារាជធានីបាននិយាយថា ការជិះកង់នេះត្រូវបានរារាំងដោយត្រឹមត្រូវ ពីព្រោះអង្គការគ្រាន់តែបានជូនដំណឹងទៅសាលារាជធានីតែប៉ុណ្ណោះ។ លោកបាននិយាយថា “ពួកគេត្រូវធ្វើលិខិតសុំការអនុញ្ញាត ប៉ុន្តែពួកគេគ្រាន់តែផ្ញើលិខិតមួយច្បាប់មកឲ្យយើងជូនដំណឹងយើងប៉ុណ្ណោះ ដូច្នេះយើងមិនអាចអនុញ្ញាតឲ្យពួកគេទេ”។
តាមពិតច្បាប់ស្ដីពីការជួបជុំគ្នាតម្រូវឲ្យមនុស្សមួយក្រុមជូនដំណឹងអាជ្ញាធរអំពីផែនការរបស់ខ្លួនឲ្យបានមុនប្រាំថ្ងៃ និងតម្រូវឲ្យអាជ្ញាធរដដែលនេះឆ្លើយតបដោយត្រឹមត្រូវ លើកលែងតែព្រឹត្តិការណ៍ដែលគ្រោងទុកនោះត្រូវចំថ្ងៃបុណ្យជាតិ ឬប្រសិនបើខ្លួនមានព័ត៌មានអាចធ្វើឲ្យប៉ះពាល់ធ្ងន់ធ្ងរដល់សន្តិសុខ សុវត្ថិភាព ឬសណ្ដាប់ធ្នាប់សាធារណៈ។ មិនតម្រូវឲ្យមានសំណើសុំការអនុញ្ញាតជាផ្លូវការទេ។
លោក ហ្គន់សាឡេ ដាវីសុន បាននិយាយថា ការសម្រេចរបស់អាជ្ញាធរដើម្បីរារាំងមិនឲ្យជិះកង់នេះអាចធ្វើឲ្យអង្គការនេះកាន់តែល្បី និងមានការចាប់អារម្មណ៍ពីប្រព័ន្ធផ្សព្វផ្សាយ លើសពីការជិះកង់នោះទៅទៀត។ លោកបាននិយាយថា “គំនិតនេះគឺដើម្បីផ្សព្វផ្សាយអំពីជ្រលងភ្នំអារ៉ែង ហើយនោះគឺជាអ្វីដែលយើងសម្រេចបានពិតប្រាកដ។ ចំពោះការផ្សព្វផ្សាយ យើងពិតជាសប្បាយចិត្តណាស់”៕ គឹមហឿន