26 C
Phnom Penh

ការបើក​​បវេសន​កាលនៅ​ឆ្នាំ​នេះ​ត្រូវ​បាន​ពន្យារពេល​ដោយ​សារ​ទឹក​ជំនន់

ដោយ ឌឹ ខេមបូឌា ដេលី

បទវិភាគ

ក្រសួង​អប់រំ​បាន​លើក​ឡើងកាលពី​ម្សិលមិញ​ថា ការ​បើក​បវេសនកាល​នៅ​ឆ្នាំ​នេះ​ត្រូវ​បាន​ពន្យារ​ពេល​មួយ​ខែ ដោយ​សារ​ទឹក​ជំនន់ដែល​បាន​ប៉ះពាល់​ដល់​សាលា​រៀន​ជាច្រើន​ទូទាំង​ប្រទេស​នៅ​ខែ​នេះ​។

លោក រស់ សាលីន អ្នក​នាំពាក្យនិង​ជា​ប្រធាន​ខុទ្ទកាល័យ​ក្រសួង​អប់រំ​បាន​មាន​ប្រសាសន៍​ថា បវេសន​កាល​នៅ​ឆ្នាំ​នេះ​នឹង​ចាប់​ផ្ដើម​នៅ​ថ្ងៃ​ទី១ ខែវិច្ឆិកា មិនមែន​ថ្ងៃ​ទី១ ខែ​តុលា ដូច​ការ​គ្រោង​ទុក​ពីដំបូង​​ឡើយ​។

លោក​ សាលីន បាន​មាន​ប្រសាសន៍​ថា “មូលហេតុ​ចម្បង​ចំពោះ​ការ​ពន្យារ​ពេល​នេះ គឺ​ដោយ​សារ​ទឹក​ជំនន់ ដែល​បានប៉ះពាល់​ដល់​សាលា​រៀន​​នៅ​តាម​បណ្ដា​ខេត្ត​ជាច្រើន”។ លោក​បាន​បន្ថែម​ថា វិស្សមកាល​​ប្រចាំ​ឆ្នាំ​នៅ​ឆ្នាំ​ក្រោយ​នឹង​ផ្លាស់​ពី​ខែ​កក្កដា ទៅ​ខែ​សីហាវិញ​ដើម្បីទូទាត់​សង។

លោក សាលីន បាន​មាន​ប្រសាសន៍​ថា ការ​បើក​បវេសនកាល​នៅ​ទូទាំង​ប្រទេស​​ត្រូវ​បាន​ពន្យារ​ពេល​ ដើម្បី​កុំឲ្យ​ប៉ះពាល់​ដល់​កម្មវិធី​សិក្សា​ និង​ធានា​ថា សិស្សា​នុសិស្ស​មក​រៀន​
ទាំង​អស់​គ្នា។

លោក សាលីន បាន​មាន​ប្រសាសន៍​ថា “វា​នឹង​មិន​​បង្ក​ឲ្យមាន​ផល​ប៉ះពាល់អវិជ្ជមាន​ណាមួយ​ទេ ពីព្រោះ​សាលា​រៀនទាំង​អស់​នឹង​ចាប់​ផ្ដើម​បើក​បវេសនកាល និងវិសម្សកាល​នៅ​ពេល​តែ​មួយ”។

យោង​តាម​លោក ញឹម វណ្ណដា អនុ​ប្រធាន​គណៈកម្មាធិការ​ជាតិ​​គ្រប់គ្រង​គ្រោះ​មហ​ន្ត​រាយ​បាន​ឲ្យ​ដឹង​ថា ទឹក​ជំនន់​នៅ​ឆ្នាំ​នេះ​បានឆក់​យក​ជីវិត​មនុស្ស​៣៥​នាក់​ហើយ​ ដែល​ប្រហែល​៦០​ភាគរយ​ជា​កុមារ​។

​បើទោះណា​ជា​លោក ញឹម វណ្ណដា បាន​មាន​ប្រសាសន៍​ថា ឥឡូវ​នេះ​កម្រិត​ទឹក​ថយ​ចុះ​ច្រើន​នៅទូទាំង​ប្រទេស​ក៏ដោយ ក៏គេ​រំពឹង​ថា នឹង​មាន​ទឹក​ជំនន់​​បន្ថែមទៀត​​​ប្រសិន​បើ​ភ្លៀងធ្លាក់​ខ្លាំង​នៅ​ខែ​កញ្ញា និង​ខែ​តុលា ជា​ខែ​ដែល​មានភ្លៀង​ធ្លាក់ជោកជំា​បំផុត​។

លោក​បាន​បន្ថែម​ថា ប្រជា​ពល​រដ្ឋ​ជាង​១២០.០០០​គ្រួសារ​ត្រូវ​បាន​ជម្លៀស​ពី​ផ្ទះ​សំបែង​របស់​ខ្លួន​ ហើយ​ដំណាំ​ស្រូវ​លើ​ផ្ទៃ​ដី​ប្រហែល​១០.០០០ហិកតា​ត្រូវ​បាន​ប៉ះ​ពាល់​ដោយទឹក​ជំនន់​នៅឆ្នាំ​នេះ​។

ប្រជា​ពល​រដ្ឋ​ជាង​១,៨​លាន​នាក់​ត្រូវ​បាន​ប៉ះពាល់​ដោយ​ទឹក​ជំនន់​កាលពី​ឆ្នាំ​មុន ដោយ​បណ្ដាល​ឲ្យ​មាន​មនុស្ស​ស្លាប់​ប្រហែល​១៦៨​នាក់​នៅ​ទូទាំង​ប្រទេស​៕ សារុន​​​​​​​​​​

 

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស