31 C
Phnom Penh

បន្ទាប់ពី​​​វៀតណាម​​​លើក​​​អំពី​​​កង្វល់ សហគមន៍​​​ខ្មែរ​​​ក្រោម​​​មានការ​​​ប្តេជ្ញា​​​ចិត្ត​​​កាន់​​​តែ​​​ខ្លាំង​​​

ដោយ ឌឹ ខេមបូឌា ដេលី

បទវិភាគ

មួយ​​ថ្ងៃ​​​បន្ទាប់​​​ពី​​​​​​រដ្ឋាភិបាល​​​ក្រុង​​​ហាណូយ​​​បាន​​​ចេញ​​​សេចក្ដី​​​ថ្លែង​​​ការណ៍​​​ប្រើ​​​ពាក្យ​​​ខ្លាំង​​​ៗ​​​អំពាវ​​​នាវ​​​ឲ្យ​​​រដ្ឋាភិបាល​​​ខ្មែរ​​​ចាត់​​​វិធាន​​​ការ​​​ទប់ស្កាត់​​​បាតុកម្ម​​​ប្រឆាំង​​​វៀតណាម​​​ កុំ​​​ឲ្យ​​​​​ទំនាក់​​​ទំនង​​​រវាង​​​ប្រទេស​​​ជិត​​​ខាង​​​ទាំង​​​ពីរ​​​ល្អក់​​​កករ​នោះ​​​ ក្រុម​​​ដែល​​​បាន​​​រៀប​​​ចំ​​​បាតុកម្ម​​​ជា​​​បន្ត​​​បន្ទាប់​​​​ក្នុង​​​ពេល​​​ថ្មី​​​ៗ​​​នេះ​​​ បាន​​​សន្យា​​​បន្ត​​​ការ​​​តវ៉ា​​​​​នៅ​​​ដើម​​​ខែ​​​កញ្ញា​​​ ប្រសិនបើ​​​​​​មិន​​​ធ្វើ​​​តាម​​​ការ​​​ទាម​​​ទារ​​​របស់​​​ពួក​​​គេ​​​​​​ទេ​​​នោះ។

សហគមន៍​​​ខ្មែរ​​​កម្ពុជាក្រោម​​​ ដែល​​​ដឹក​​​នាំ​​​ដោយ​​​លោក ថាច់​​​ សេដ្ឋា សមាជិក​​​គណៈកម្មាធិការ​អចិន្ត្រៃយ៍​​​របស់​​​គណបក្ស​​​សង្គ្រោះ​​​ជាតិ​​​ បាន​​​សន្យា​​​កាល​​​ពី​​​ម្សិល​​​មិញ​​​ថា នឹង​​​បន្ត​​​ធ្វើ​បាតុកម្ម​​​នៅ​​​ខាង​​​ក្រៅ​​​ស្ថាន​​​ទូត​​​វៀតណាម​​​ក្នុង​​​ពេល​​​ពីរ​​​សប្ដាហ៍​​​ទៀត ប្រសិនបើ​​​ស្ថានទូត​​​​នេះ​​​មិន​​​ព្រម​​​សូម​​​អភ័យទោស​​​ចំពោះ​​​ការ​​​អត្ថាធិប្បាយ​​​ដ៏​​​ចម្រូង​​​ចម្រាស​​​​​​​​​​​​របស់​​​អ្នក​​​ការទូត​​​វៀតណាម​​​ម្នាក់​​​ជុំ​​​វិញ​​​ការ​​​កាន់​​​កាប់​​​ទឹក​​​ដី​​​កម្ពុជា​​​ក្រោម​​​។

លោក​​​ សេដ្ឋា បាន​​​មាន​​​ប្រសាសន៍​​​ថា “ប្រសិនបើ​​មិន​​​មាន​​​ដំណោះ​​​ស្រាយ​​​ពី​​​ក្រសួង​​​ការ​​​បរទេស[ វៀតណាម ]​​​ ទេ​​​ យើង​​​នឹង​​​ធ្វើ​​​បាតុកម្ម​​​ដ៏​​​ធំ​​​នៅ​​​​​​ដើម​​​ខែ​​​កញ្ញា​​​ ប៉ុន្តែ ឥឡូវ​​​នេះ​​​យើង​​​កំពុង​​​រង់​​​ចាំ​​​លទ្ធផល​​​ពី​​​ក្រសួង​​​ការ​​​បរទេស​​​ខ្មែរ​​​”។

កាល​​​ពី​​​ថ្ងៃ​​​ពុធ លោក សេដ្ឋា បាន​​​ផ្អាក​​​​​​​​​ការ​​​ធ្វើ​​​បាតុកម្ម​​​រយៈ​​​ពេល​​​បី​​​ថ្ងៃ​​​ ដែល​​​ក្នុង​​​បាតុកម្ម​​​នោះ​​​អ្នក​​​តវ៉ា​​​មួយ​​​ក្រុម​​​តូច​​​បាន​​​ដុត​​​ទង់​​​ជាតិ​​​វៀតណាម​​​​​​ ហើយ​លោក​​​បាន​​​មាន​​​ប្រសាសន៍​​​ថា លោក​​​ផ្ដល់​​​ឱកាស​​​​​​ឲ្យ​​​អ្នក​​​ការទូត​​​កម្ពុជា​​​ និង​​​វៀតណាម​​​ ដើម្បី​​​ដោះ​​​ស្រាយ​​​ស្ថាន​​​ការ​​ណ៍​​​នេះ​​​ មុន​​​ពេល​​​បន្ត​​​ការ​​​តវ៉ា​​​។

ទី​​​ភ្នាក់ងារ​​​ព័ត៌​​​មាន​​​ស៊ីនហួរ​​​ របស់​​​ប្រទេស​​​ច​​​ិន​​​បាន​​​ធ្វើ​​​សេចក្ដី​​​រាយ​​​ការណ៍​​​កាល​​​ពី​​​ថ្ងៃ​​​ព្រហស្បតិ៍​​​ ថា លោក​​​ ឡេ ហៃ​​​​​​ ប៊ិញ​​​ អ្នក​​​នាំ​​​ពាក្យ​​​ក្រសួង​​​ការ​​​បរទេស​​​វៀតណាម​​​បាន​​​ចេញ​​​សេចក្ដី​​​ថ្លែង​​​ការណ៍​​​មួយ​​​ ដើម្បី​​​​​​​​​ថ្កោល​​​ទោស​​​បាតុកម្ម​​​នេះ​​​ ហើយ​​​​​​បាន​​​អំពាវ​​​នាវ​​​ឲ្យ​​​​​​រដ្ឋាភិបាល​​​ក្រុង​​​ភ្នំពេញ​​​​​​ចាត់​​​វិធាន​​​ការ​​​។

ទី​​​ភ្នាក់​​​ងារ​​​ព័ត៌​​​មាន​​​ស៊ីនហួរ បាន​​​ដក​​​ស្រង់​​​ខ្លឹម​​​សារ​​​សេចក្តី​​​ថ្លែង​​​ការណ៍​​​នោះ​​​ថា  ” វៀតណាម​សូម​ប្រឆាំង​ដាច់​ខាត​ចំពោះ​​សកម្មជន​ខ្មែរ​កម្ពុជា​ក្រោម​​​​ ដែល​បាន​ធ្វើ​ការ​តវ៉ា​ខុស​ច្បាប់ និង​ដុត​បំផ្លាញ​ទង់ជាតិ​វៀតណាម​នៅ​ក្នុង​រាជ​ធានី​​ភ្នំពេញ​ប្រទេស​កម្ពុជា​។​​​វៀតណាម​សូម​ជំរុញ​ឲ្យ​កម្ពុជា​ដោះ​ស្រាយ​សកម្មភាព​ទាំង​នេះ​ឲ្យ​​បាន​ម៉ឺង​ម៉ាត់ ដោយ​គោរព​ច្បាប់ និង​ចាត់វិធានការ​មាន​ប្រសិទ្ធភាព​ដើម្បី​ទប់​ស្កាត់​កុំ​ឲ្យ​ហេតុការណ៍​ស្រដៀង​គ្នា​នេះ​កើត​ឡើង​ម្ដង​ទៀត​”។

កាល​​​ពី​​​ថ្ងៃ​​​ទី​​​៦ខែ​​​មិថុនា  លោក​​​ ត្រាន វ៉ាន​​​ថុង លេខា​ទី​​​១​​​ស្ថាន​​​ទូត​​​វៀតណាម​​​ បាន​​​មាន​​​ប្រសាសន៍​​​ក្នុង​​​បទ​​​សម្ភាស​​​តាម​​​វិទ្យុ​​​ថា ប្រទេស​​​វៀតណាម​​​បាន​​ត្រួត​​​ត្រា​​​កម្ពុជា​​​ក្រោម​​​​​​យូរ​​​មក​​​ហើយ​​​ ពោល​​​គឺ​​​មុន​​​ពេល​​​អាណានិគម​​​បារាំង​​​​​​ប្រគល់​​​​​​ទឹក​​​ដី​​​នេះ​​​ឲ្យ​​​ទៅ​​​វៀតណាម​​​ជា​​​ផ្លូវ​​​ការ​​​​​​នៅ​​​ឆ្នាំ​​​១៩៤៩​​​ទៅ​​​ទៀត​​​។ លោក​​​បាន​​​មាន​​​ប្រសាសន៍​​​ថា អ្នក​​​ដែល​​​ជឿ​​​ផ្សេង​​​ពី​​​នេះ​​​គឺ​​​ខុស​​​ហើយ​​​​​​។ លោក​​​បាន​​​ឲ្យ​​​ដឹង​​​ទៀត​​​ថា “វៀតណាម​​​ខាង​​​ត្បូង​​​​​​ជា​​​របស់​​​វៀតណាម​​​​​​យូរ​​​លង់​​​ណាស់​​​មក​​​ហើយ”។

ក៏​ប៉ុន្តែ​ ​​​ក្រុម​​​និស្សិត​​​និង​​​ព្រះ​​​សង្ឃ​​​ជា​​​ច្រើន​​​រយ​​​អង្គ​​​​​​បាន​​​ប្រមូល​​​ផ្ដុំ​​​គ្នា​​​ទាម​​​ទារ​ឲ្យ​មាន​​​​ការ​សូម​​​​​​​អភ័យ​​​ទោស​​​ និង​​​ការ​​​កែ​តម្រូវ​​​ ដោយ​​​លើក​​​ឡើង​​​ថា តាម​​​​​​ប្រវត្តិសាស្ត្រ​​​ទឹក​​​ដី​​​នេះ​គឺ​​​ជា​​​​​​របស់​​​ប្រទេស​​​កម្ពុជា ហើយ​​​គ្មាន​​​ពេល​​​ណា​​មួយ​​​​​ដែល​​​មេ​​​ដឹក​​​នាំ​​​ប្រទេស​កម្ពុជា​​​​បាន​​​យល់​​​ព្រម​​​តាម​​​​​​ការ​​​ប្រគល់​​​ទៅ​​​ឲ្យ​​​ប្រទេស​​​វៀតណាម​​​ឡើយ​​​៕មានិត​​​​​​​​​

 

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស