ឥឡូវនេះសកម្មជនយុវជនគណបក្សសង្គ្រោះជាតិសរុបប្រាំបីនាក់បានជាប់ពន្ធនាគារ ឬកោះហៅមកសាកសួរនៅតុលាការជុំវិញការជាប់ចោទពីបទចូលរួមនៅក្នុងការតវ៉ាកាលពីថ្ងៃទី១៥ ខែកក្កដា ដែលគេឃើញក្រុមអ្នកតវ៉ាគណបក្សប្រឆាំងបានវាយដំយ៉ាងខ្លាំងទៅលើសន្តិសុខស្លៀកពាក់ឯកសណ្ឋានមួយក្រុម ដែលអាជ្ញាធរបានបញ្ជូនឲ្យទៅបង្ក្រាបបាតុកម្មទាមទារបើកទីលានប្រជាធិបតេយ្យក្នុងរាជធានីភ្នំពេញ។
កាលពីថ្ងៃសៅរ៍ អាន បឋម អាយុ៣៥ឆ្នាំជាសកម្មជនគណបក្សសង្គ្រោះជាតិក្នុងរាជធានីភ្នំពេញទទួលបានដីកាកោះហៅពីសាលាដំបូងរាជធានីភ្នំពេញ ” ពីបទចូលរួមក្នុងកុបកម្ម និងប្រឆាំងអាជ្ញាធរសាធារណៈ ព្រមទាំងប្រើអំពើហិង្សាដោយចេតនានៅទីលានប្រជាធិបតេយ្យ”។
សកម្មជនយុវជនគណបក្សសង្គ្រោះជាតិបីនាក់ គឺ ឃិន ជំរឿន ប្រធានក្រុមយុវជនរាជធានីភ្នំពេញរបស់គណបក្សសង្គ្រោះជាតិ នាង សុឃុន មេដឹកនាំយុវជនគណបក្ស
សង្គ្រោះជាតិខណ្ឌទួលគោក និង សាន គឹមហេង ហេរញ្ញិកក្រុមយុវជនគណបក្សសង្គ្រោះជាតិខណ្ឌមានជ័យ ត្រូវបានចាប់ខ្លួនកាលពីថ្ងៃទី២ ខែសីហា ដោយចោទប្រកាន់ពីបទដូចគ្នានេះ ហើយកំពុងត្រូវឃុំខ្លួនបណ្ដោះអាសន្នរង់ចាំការកាត់ក្ដីនៅពន្ធនាគារព្រៃស។
អាន បឋម បានចូលរួមជាមួយសកម្មជនគណបក្សសង្គ្រោះជាតិបួនរូបទៀត ដែលត្រូវបានកោះហៅឲ្យបង្ហាញខ្លួននៅតុលាការចាប់ពីថ្ងៃទី៥ ដល់ថ្ងៃទី៨ ខែសីហា ដើម្បីសាកសួរជុំវិញការចោទប្រកាន់ទាំងនេះ។ អ្នកដែលត្រូវបានកោះហៅឲ្យទៅបង្ហាញខ្លួននៅតុលាការផងដែរ គឺ មៀច សុវណ្ណារា ទេព ណារិន សម សីហៈ និង អ៊ូច ពេជ្រសំណាង។
សមាជិកសភាគណបក្សសង្គ្រោះជាតិប្រាំពីររូប និងសកម្មជនមួយរូបប្រឈមនឹងការចោទប្រកាន់ពីបទដឹកនាំកុបកម្ម និងប្រើអំពើហិង្សា ប៉ុន្តែត្រូវបានដោះលែងឲ្យនៅក្រៅឃុំបណ្ដោះអាសន្នបន្ទាប់ពីមានកិច្ចព្រមព្រៀងរវាងលោកនាយករដ្ឋមន្ត្រី ហ៊ុន សែន និងលោក សម រង្ស៊ី ប្រធានគណបក្សសង្គ្រោះជាតិកាលពីថ្ងៃទី២២ ខែកក្កដា ដើម្បីបញ្ចប់ភាពទាល់ច្រកនយោបាយនៅក្នុងប្រទេស។
មន្ត្រីគណបក្សកាន់អំណាចបានលើកឡើងថា អភ័យឯកសិទ្ធិរបស់ពួកគេក្នុងនាមជាសមា ជិកសភា នឹងជាប្រតិសកម្មបន្ទាប់ពីការទទួលយកអាសនៈរបស់ខ្លួននៅរដ្ឋសភា ដែលពួកគេបានទទួលយកកាលពីថ្ងៃទី៥ ខែសីហា។
សកម្មជន និងសមាជិកសភាបានអះអាងថា ការតវ៉ារបស់ខ្លួនធ្វើឡើងដោយសន្តិវិធី ហើយថា បុគ្គលដែលបានវាយដំដោយហិង្សាទៅលើសន្តិសុខខណ្ឌដោយដំបង ដែលតែងតែបានវាយដំលើអ្នកតវ៉ាចាប់តាំងពីមានបម្រាមរបស់ក្រសួងមហាផ្ទៃហាមមិនឲ្យមានការធ្វើបាតុកម្មកាលពីខែមករា។
សីហៈ អាយុ២៦ឆ្នាំជាសកម្មជនម្នាក់ក្នុងចំណោមសកម្មជនយុវជនគណបក្សសង្គ្រោះជាតិ ដែលត្រូវបានកោះហៅនោះ បានលើកឡើងថា មានយុវជនកាន់តែច្រើនឡើងៗត្រូវបានចោទប្រកាន់ទាក់ទងនឹងការធ្វើបាតុកម្មកាលពីខែកក្កដា ដើម្បីបំភិតបំភ័យគណបក្សប្រឆាំង។
យុវជនរូបនេះបាននិយាយថា ” ពួកគេកោះហៅយុវជនកាន់តែច្រើនឡើងៗ ដើម្បីដាក់សម្ពាធលើមេដឹកនាំរបស់យើង និងគំរាមកំហែងដល់យុវជនដទៃទៀត ប៉ុន្តែយើងមិនខ្លាចពួកគេឡើយ”៕ សារុន