37 C
Phnom Penh

កម្មករ​ដួល​សន្លប់​នៅ​រោងចក្រ​៦​កន្លែង​ក្នុង​សួន​ឧស្សាហកម្មវឌ្ឍនៈ

ដោយ ឌឹ ខេមបូឌា ដេលី

បទវិភាគ

ក្រុម​មន្ត្រី​បាន​និយាយ​ថា កម្មករ​ជិត​១៤០​នាក់​នៅ​រោងចក្រ​៦​កន្លែង​ក្នុង​សួន​ឧស្សាហកម្ម​វឌ្ឍនៈ​២​ក្នុង​រាជធានី​ភ្នំពេញ បាន​ដួល​សន្លប់​នៅ​កន្លែង​ធ្វើ​ការ​កាលពី​ថ្ងៃសុក្រ​និង​ថ្ងៃសៅរ៍ ជា​ហេតុ​នាំ​ឲ្យ​រោងចក្រ​ទាំង​នោះ​បិទ​ទ្វារ​នៅ​ចុង​សប្តាហ៍ ដើម្បី​ស្វែងរក​មូលហេតុ​នៃ​ការ​ដួល​សន្លប់​នេះ។

យោងតាម​លោក ទឹម ប៊ុនថេន មេប៉ុស្ត៍​សង្កាត់​ក្រាំង​ពង្រ​បាន​ឲ្យ​ដឹង​ថា ការ​ដួល​សន្លប់​​បាន​កើត​ឡើង​កាលពី​ព្រឹក​ថ្ងៃ​សុក្រ​នៅ​សួន​ឧស្សាហកម្ម​នេះ នៅ​ពេល​ដែល​​កម្មករ​រាប់​សិប​នាក់​នៅ​រោងចក្រ Newpex របស់​កូរ៉េ​ចូល​ធ្វើការ។

ការ​ជជែក​គ្នា​ក្នុង​ចំណោម​កម្មករ​និង​ការ​មើល​ឃើញ​កម្មករ​មួយ​ចំនួន​ដួល​សន្លប់​​ជំរុញ​ឲ្យមាន​ការ​ជ្រួលច្រាល​ក្នុង​រោងចក្រ ហើយ​បន្ទាប់​មក​ក៏​បង្ក​ឲ្យ​មាន​ការ​ភិតភ័យ និង​ឈាន​ទៅ​ដល់​ការ​ដួល​សន្លប់​តែ​ម្តង​នៅ​រោងចក្រ Accasette Garment រោងចក្រ Papillion Textile និង Moha Garment ជា​របស់​តៃវ៉ាន់ និង​រោងចក្រ​ Dongdu Textile និង​រោងចក្រ Bultext របស់​ចិន។

កម្មការិនី​ប្រហែល​១៣០​នាក់បាន​ដួល​សន្លប់​នៅ​កន្លែង​ធ្វើ​ការ​កាលពី​ថ្ងៃ​សុក្រ និង​កម្មការិនី​៨​នាក់​ផ្សេង​ទៀត​នៅ​រោងចក្រ Bultext បាន​ដួល​សន្លប់​ជា​ថ្មី​កាលពី​ព្រឹក​ថ្ងៃ​សៅរ៍។

លោក ប៊ុនថេន បាន​និយាយ​ថា “កម្មករ​បាន​ប្រាប់​យើង​ថា ពួក​គាត់​អស់​កម្លាំង​និង​ក្អួត បន្ទាប់ពី​បាន​ឃើញ​កម្មករ​ផ្សេង​ទៀត​ដួល​សន្លប់។ យើង​មិន​ទាន់​ប្រាកដ​អំពី​មូលហេតុ​ដែលធ្វើឲ្យ​កម្មករ​ជាង​១០០​នាក់​ដួល​សន្លប់​នៅ​ឡើយ​ទេ ប៉ុន្តែ​យើង​សន្និដ្ឋាន​ថា គឺ​ដោយសារ​ធំក្លិន​កាវ និង​សារធាតុ​គីមី​ផ្សេង​ទៀត​ក្នុង​រោងចក្រ​ទាំង​នោះ”។

លោក​ស្រី ឡុង សុខហ៊ីន ជំនួយការ​ប្រធាន​រដ្ឋ​បាល​រោងចក្រ Accasette​ Garment បាន​និយាយ​ថា កម្មករ​ប្រហែល​២០​នាក់​នៅ​រោងចក្រ​របស់​គាត់​បាន​ដួល​សន្លប់ ដោយ​បាន​អះអាង​ថា ពួក​គាត់ធំក្លិន​អាក្រក់​ពី​កាវ​ដែល​ភាយ​ចេញ​ពី​រោងចក្រ​មួយ​ក្បែរ​នោះ។

លោកស្រី​បាន​និយាយ​ថា “យើង​បាន​សម្រេច​បិទ​រោងចក្រ​ជា​បណ្តោះ​អាសន្ន​នៅ​ថ្ងៃ​សុក្រ​នឹង​ថ្ងៃ​សៅរ៍ ពីព្រោះ​យើង​ព្រួយ​បារម្ភ​ថា កម្មករ​ផ្សេង​ទៀតអាច​​នឹង​ដួល​សន្លប់​ទៀត​”។ លោក​ស្រី​បាន​និយាយថា កម្មករ​ដួល​សន្លប់​ទាំង​នោះ​ត្រូវ​បាន​ព្យាបាល​នៅ​គ្លីនីក​ឯកជន​មួយ​ក្បែរ​រោង​ចក្រ​នោះ។

លោក ម៉េង ហុង ជា​សមាជិក​នៃ​គណៈ​កម្មាធិការ​ទប់​ស្កាត់​​ការ​ដួល​ការ​ដួល​សន្លប់​និង​របួស​នៅ​កន្លែង​ធ្វើ​ការ បាន​និយាយ​ថា លោក​មិន​មាន​សេចក្តី​ពិស្តារ​អំពី​ហេតុការណ៍​នៅ​សួន​ឧស្សាហ​កម្មវឌ្ឍនៈ​២ទេ ប៉ុន្តែ​បាន​និយាយ​ថា មូលនិធិ​ជាតិ​សន្តិ​សុខ​សង្គម​ទទួល​ខុស​ត្រូវ​ចំពោះ​ការ​ចំណាយ​សម្រាប់​ការ​ព្យាបាល​កម្មករទាំនោះ​។ លោក បាន​បន្ថែម​ថា “ក្រុម​មន្ត្រី​មកពី​ក្រសួង​កំពុង​ពិនិត្យ​ករណី​នេះ​ហើយ”។

លោក ហុង មិន​អាច​ផ្តល់តួលេខនៃ​​ចំនួន​កម្មករ​ដែល​ដួល​​សន្លប់​នៅ​ឆ្នាំ​នេះ​នៅ​តាម​រោងចក្រ​ក្នុង​ប្រទេស​កម្ពុជា​បាន​ទេ។ កម្មករ​សរុប​ចំនួន​៨២៣​នាក់​បាន​ដួល​សន្លប់កាលពី​ឆ្នាំ​មុន គឺ​ថយ​ចុះ​ពី​ចំនួន​១៩៧៣នាក់ នៅ​ឆ្នាំ​២០១១។

ក្រុម​អ្នក​ជំនាញ​បាន​និយាយ​ថា ការ​ដួល​សន្លប់​​នេះ​ភាគ​ច្រើន​កើត​ឡើង​ដោយសារ​ជំងឺផ្លូវ​ចិត្ត ដែល​ធ្វើ​ឲ្យ​ប៉ះពាល់​ដល់​កម្មការិនី ជួនកាល​បង្ក​ឡើង​ដោយ​ក្លិន​អាក្រក់ ហើយ​អាច​កាន់​តែដុនដាប​ថែម​ទៀត​ដោយសារ​តែ​ជីវភាព​ក្រីក្រ​និង​លក្ខខណ្ឌ​ការងារ​មិន​ល្អ៕មានិត​

 

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស