លោកនាយករដ្ឋមន្ត្រី ហ៊ុន សែន បានប្រើប្រាស់សុន្ទរកថានៅសិក្ខាសាលាស្ដីពីសន្តិសុខស្បៀងកាលពីម្សិលមិញ ដោយបញ្ជាក់ជាថ្មីម្ដងទៀតអំពីតម្រូវការសម្រាប់ប្រទេសកម្ពុជាបង្កើតប្រព័ន្ធធារាសាស្ត្រទំនើប ដើម្បីប្រើប្រាស់ដីឲ្យបានល្អប្រសើរ និងដើម្បីឆ្លើយតបទៅនឹងតម្រូវការស្បៀងដែលកំពុងតែកើនឡើងនេះ។
ថ្លែងនៅអគារការិយាល័យរបស់លោកនៅក្នុងរាជធានីភ្នំពេញ លោក ហ៊ុន សែន បានសម្ដែងការសោកស្ដាយថា បណ្ដាខេត្តមួយចំនួនបច្ចុប្បន្ននេះគ្មានទឹកគ្រប់គ្រាន់ នៅពេលដែលជិតដល់រដូវវស្សាដែលជារដូវដកស្ទូង។
លោក ហ៊ុន សែន បានមានប្រសាសន៍ថា “ឥឡូវនេះយើងធ្វើស្រែនៅរដូវវស្សាលើផ្ទៃដី២,៤លានហិកតា ប៉ុន្តែមានផ្ទៃដីតែពាក់កណ្ដាលប៉ុណ្ណោះក្នុងចំណោមផ្ទៃដី២,៤លានហិកតានេះមានទឹក។ យើងមិនអាចស្វែងរកប្រភពទឹកក្នុងរយៈពេលពីរបីថ្ងៃមុននេះបានទេនៅក្នុងខេត្តកំពង់ស្ពឺ ឬតំបន់ខ្លះក្នុងខេត្តតាកែវ និងខេត្តកំពត”។ លោក ហ៊ុន សែន បានបន្តថា “ប្រជាពលរដ្ឋរបស់យើងប្រឈមបញ្ហាពីរ គឺបញ្ហាទី១គ្រោះទឹកជំនន់ និងបញ្ហាមួយទៀតគឺគ្រោះរាំងស្ងួត។ ដូច្នេះហើយការវិនិយោគខាងប្រព័ន្ធស្រោចស្រពនៅតែជាអាទិភាព”។
បច្ចុប្បន្ននេះប្រទេសកម្ពុជាកំពុងរងផលប៉ះពាល់ដោយគ្រោះរាំងស្ងួតនៅក្នុងតំបន់ជាច្រើននៅភាគនិរតី ខណៈដែលមានការជន់លិចនៅតំបន់ភាគឦសានតាមដងទន្លេមេគង្គ ដែលបានសម្លាប់មនុស្សអស់៣៥នាក់ និងជម្លៀសប្រជាពលរដ្ឋ១២០.០០០គ្រួសារនៅខែនេះ។
អង្គការស្បៀងអាហារ និងកសិកម្មរបស់អង្គការសហប្រជាជាតិបានប៉ាន់ប្រមាណកាលពីដើមឆ្នាំនេះថា ទឹកជំនន់រដូវវស្សានៅពេលនេះកាលពីឆ្នាំមុន ដែលបានសម្លាប់មនុស្សជាង១៥០នាក់ក៏បានធ្វើឲ្យខូចខាតដំណាំស្រូវអស់១២៨.៥០០ហិកតាផងដែរ។
ដោយមិនមានប្រព័ន្ធធារាសាស្ត្រទំនើប កសិករភាគច្រើននៅតែពឹងផ្អែកលើការធ្លាក់ភ្លៀងច្រើននៅក្នុងតំបន់ជិតខាងខ្លួន និងការដាំដំណាំរួមផ្សំនៅពេលមានអំណោយផល។
លោក ហ៊ុន សែន បានមានប្រសាសន៍ថា កសិករត្រូវតែកែប្រែដីរបស់ខ្លួនដើម្បីបង្កើនទិន្នផល ពីព្រោះប្រជាពលរដ្ឋមានការកើនឡើង។ លោកបានមានប្រសាសន៍ថា “ទម្លាប់របស់ប្រជាពលរដ្ឋខ្មែរតាំងពីបុរាណមក គឺមានដីតែមួយហិកតាប៉ុណ្ណោះសម្រាប់គ្រួសារដែលមានសមាជិកប្រាំនាក់។ ប្រសិនបើគ្រួសារនេះមានសមាជិកឡើងដល់១០នាក់ ពួកគេត្រូវតែមានដីពីរឬបីហិកតា។
លោកបានបន្ថែមថា “ប្រសិនបើើយើងបន្តតាមវិធីបែបនេះ ព្រៃឈើរបស់យើងនឹងត្រូវកាប់បំផ្លាញទាំងស្រុងនៅទូទាំងប្រទេស ហើយការធ្វើចំណាកស្រុកទៅស្វែងរកដីថ្មី និងការកាប់រានព្រៃដោយអនាធិបតេយ្យនឹងបន្តកើតមាន”៕ សារុន