ក្មេងស្រីអាយុ១៨ឆ្នាំ ដែលអះអាងថា នាងត្រូវបានគ្រួសារមានទ្រព្យសម្បត្តិស្ដុកស្ដម្ភមួយរំលោភបំពាន និងចាប់បង្ខាំងនៅក្នុងភូមិគ្រឹះរបស់ពួកគេស្ថិតក្នុងខណ្ឌទួលគោក រយៈពេលប្រាំបីឆ្នាំ បានបង្ហាញខ្លួននៅសាលាដំបូងរាជធានីភ្នំពេញកាលពីម្សិលមិញ ដើម្បីឆ្លើយសំណួរពាក់ព័ន្ធការចោទប្រកាន់របស់នាង ប៉ុន្តែគេនៅមិនទាន់ដឹងច្បាស់អំពីកន្លែងលាក់ខ្លួនរបស់គ្រួសារនេះនៅឡើយទេ។
លោក សឿង ហឿង ជាមេគ្រួសារ និងអ្នកស្រី តាំង ស៊ីមរ៉ុង ជាប្រពន្ធរបស់លោក ព្រមទាំងកូនប្រុសពីរនាក់ឈ្មោះ សឿង រដ្ឋា និង សឿង រតនា ត្រូវបានចោទប្រកាន់ពីបទរំលោភបំពានទាំងផ្លូវកាយ និងផ្លូវចិត្តលើក្មេងស្រីរូបនេះអំឡុងការបង្ខាំងរូបនាងរយៈពេលជាច្រើនឆ្នាំ។ ប្អូនប្រុសអាយុ១២ឆ្នាំរបស់នាង ដែលអះអាងថា វាក៏ត្រូវបានចាប់បង្ខាំងនិងរំលោភបំពានរយៈពេលពីរឆ្នាំដែរនោះ គ្រោងបង្ហាញខ្លួននៅតុលាការសម្រាប់ការសាកសួរដែរនៅថ្ងៃនេះ។
លោកស្រី សន សូដាឡែន មេធាវីរបស់បងប្អូនបង្កើតនេះបានមានប្រសាសន៍ថា លោកស្រីសង្ស័យថា ការចោទប្រកាន់លើសមាជិកគ្រួសារនេះត្រូវបានលើកលែងហើយ ហើយថា លោក យឹម ប៊ុនធឿន ជាអង្គរក្សរបស់ពួកគេដែលបច្ចុប្បន្នកំពុងស្ថិតក្នុងការឃុំខ្លួនបណ្ដោះអាសន្នរង់ចាំការកាត់ក្ដីក្នុងពន្ធនាគារព្រៃសនោះ គឺជាមនុស្សតែម្នាក់គត់ដែលទទួលខុសត្រូវចំពោះការរំលោភបំពានលើពួកគេ។
សន្តិសុខម្នាក់យាមផ្ទះគ្រួសារនេះបានប្រាប់អ្នកយកព័ត៌មានកាលពីសប្ដាហ៍មុនថា លោកជឿថា សមាជិកគ្រួសារជាប់ចោទនេះបានគេចខ្លួនពីប្រទេសបាត់ហើយ។
លោកស្រី សូដាឡែន បានមានប្រសាសន៍កាលពីម្សិលមិញថា ” ខ្ញុំបានឮថា ជនសង្ស័យម្នាក់ត្រូវបានចោទប្រកាន់ ប៉ុន្តែមនុស្សប្រាំនាក់ទៀតកំពុងរត់គេចខ្លួន ឬការចោទប្រកាន់លើពួកគេត្រូវបានលើកលែងហើយ”។
ក្មេងស្រីអាយុ១៨ឆ្នាំរូបនេះបានលើកឡើងពីការចោទប្រកាន់របស់នាងចំពោះសមាជិកគ្រួសារនេះនៅក្នុងតុលាការ។
នាងបាននិយាយបន្ទាប់ពីការបង្ហាញខ្លួននៅតុលាការថា ” ខ្ញុំបានប្រាប់តុលាការថា លោក សឿង រតនា បានរំលោភខ្ញុំ ហើយលោក សឿង ហឿង ដែលជាឪពុករបស់គាត់ និងអ្នកផ្សេងទៀតបានធ្វើទារុណកម្មខ្ញុំដោយទះកំផ្លៀង និងវាយដំលើរូបខ្ញុំ ខណៈដែលខ្ញុំត្រូវបានចាប់បង្ខាំងនៅក្នុងផ្ទះរបស់ពួកគេ”។ នាងបាននិយាយថា នាងបានស្វែងរកសំណងចំនួន២០.០០០ដុល្លារពីជនសង្ស័យទាំងនេះ ហើយសង្ឃឹមថា តុលាការនឹងផ្ដន្ទាទោសពួកគេតាមច្បាប់។
យោងតាមលោកស្រី សូដាឡែន បានឲ្យដឹងថា សមាជិកពីរនាក់ក្នុងចំណោមសមាជិកគ្រួសាររបស់បងប្អូនបង្កើតនេះក៏ត្រូវបានកោះហៅមកសាកសួរនៅសប្ដាហ៍នេះដែរ។
លោក មាស ច័ន្ទពិសិដ្ឋ ព្រះរាជអាជ្ញារងបានមានប្រសាសន៍នៅខាងក្រៅតុលាការថា លោកមិនអាចនិយាយថា តើសមាជិកគ្រួសារនេះត្រូវបានចោទប្រកាន់ឬក៏អត់ឡើយ ពីព្រោះរឿងក្ដីនេះស្ថិតក្នុងដៃលោក ស្វាយ តុញ ចៅក្រមស៊ើបសួរ។ គេមិនអាចទាក់ទងចៅក្រម ស្វាយ តុញ ដើម្បីសុំអត្ថាធិប្បាយបានទេ៕ សារុន