28 C
Phnom Penh

មន្ត្រី​សហជីព​ត្រូវ​បាន​ចាប់​ខ្លួន​ពី​បទ​ញុះញង់​កម្មករ​កាត់ដេរ​ឲ្យ​ធ្វើ​កូដកម្ម

ដោយ ឌឹ ខេមបូឌា ដេលី

បទវិភាគ

យោងតាម​អាជ្ញាធរ​និង​ប្រធាន​សហជីព​បាន​ឲ្យ​ដឹង​ថា សកម្មជន​សហជីព​ម្នាក់​ត្រូវ​បាន​ចាប់​ខ្លួន​កាលពី​ម្សិលមិញ និង​ត្រូវ​ចោទ​ពី​បទញុះញង់កម្មករ​រោងចក្រ​កាត់ដេរ​ឲ្យ​ធ្វើ​កូដកម្ម​បិទ​ផ្លូវ​ជាតិ​លេខ​១​ក្នុង​​​ខេត្ត​ស្វាយរៀង។ ការ​ចាប់​ខ្លួន​នេះ​ធ្វើ​ឡើង​បន្ទាប់ពី​មាន​ការ​ចាប់​ខ្លួន​​មេដឹកនាំ​សហជីព​យ៉ាង​ហោចណាស់៩​នាក់ក្នុង​ករណី​​ស្រដៀង​​គ្នា​នេះ តែ​អ្នក​ទាំង​អស់​នោះ​ត្រូវ​បាន​ដោះ​លែង​ហើយ​កាល​ពី​​ខែ​ឧសភា។

លោក ទួន សារ៉ែន តំណាង​កម្មករ​នៅ​រោងចក្រ​កាត់ដេរ You Li ក្នុង​ក្រុង​បាវិត ដែល​បាន​ដឹកនាំ​កម្មករ​៨០០​នាក់​តវ៉ា​​​កាលពីថ្ងៃ​ច័ន្ទសប្តាហ៍​មុន​ ត្រូវ​បាន​នគរបាល​ចាប់​ខ្លួន​កាលពី​ម្សិលមិញ​និងដោះលែង​វិញ​ដោយគ្មាន​ការ​ចោទ​ប្រកាន់​ឡើយ​។

លោក ប៉ាវ ស៊ីណា ប្រធាន​សម្ព័ន្ធ សហជីព ចលនា​កម្មករ បាន​មាន​ប្រសាសន៍​ថា លោក សារ៉ែន ត្រូវ​បាននគរបាល​ចាប់​ខ្លួនមួយ​រយៈ​ពេល​ខ្លី បន្ទាប់ពី​កម្មករ​បាន​បញ្ឈប់​​ការ​បិទ​ផ្លូវ​ជាតិ។

លោក ស៊ីណា​ មាន​ប្រសាសន៍​ថា “នោះ​ជាការ​រំលោភសិទ្ធិ​របស់​គាត់ ព្រោះ​គាត់​គ្រាន់តែ​ខិតខំ​ការពារ​កម្មករ​ប៉ុណ្ណោះ”។

កម្មករ​បាន​សុំ​ឲ្យ​មានគ្រូពេទ្យ​ព្យាបាល​នៅ​នឹង​កន្លែង​ធ្វើការ​ ស្នើសុំ​ប្រាក់​បន្ថែម​១០​ដុល្លារ​ក្នុង​មួយ​ខែ​សម្រាប់​​រយៈ​ពេល​១៨​ខែ​ឲ្យ​កម្មការិនី​ដែល​សម្រាល​កូន បំពាក់​កង្ហារ​បន្ថែម និង​ឲ្យ​មាន​បន្ទប់​បង្គន់​ល្អ​ប្រសើរ​ជាង​នេះ។

លោក ស៊ីណា មាន​ប្រសាសន៍​ថា រោងចក្រ​បាន​យល់​ព្រម​ទៅ​នឹង​ការទាមទារ​ទាំង​អស់​របស់​សហជីព លើកលែងតែ​ប្រាក់​រង្វាន់​សម្រាប់​កម្មករ ដែល​ផលិត​​លើស​គោលដៅ​ផលិត​កម្ម និង​ប្រាក់​បន្ថែម​៥​ដុល្លារ​ក្នុង​មួយ​ខែ​សម្រាប់​បុគ្គលិក​មាន​ជំនាញ​ពិសេស​ក្នុង​ការ​ប្រើ​ម៉ាស៊ីនដេរ​តែ​ប៉ុណ្ណោះ​។

លោក កែវ សុថា​ ប្រធាន​នគរបាល​ព្រហ្មទណ្ឌ​កម្រិត​ស្រាល​ខេត្ត បាន​មាន​ប្រសាសន៍​ថា សហជីព​ជា​អ្នក​ទទួល​ខុស​ត្រូវ​ចំពោះ​ការ​សម្រេច​ចិត្ត​របស់​កម្មករ​ក្នុង​ការ​បិទ​ផ្លូវ​នេះ។ លោក​បាន​បន្ថែម​ថា “យើង​បាន​ចាប់​ខ្លួន [លោក សារ៉ែន] ពីព្រោះគាត់​បាន​ញុះញង់​កម្មករ​ឲ្យ​បិទ​ផ្លូវ​ជាតិ​លេខ​១ ហើយ​ធ្វើ​ឲ្យ​ប៉ះពាល់​​ដល់​ការ​ប្រកប​របររក​ស៊ី​របស់​អ្នក​ដទៃ”។ លោក​សារ៉ែន ទទួល​បាន​ការ​ “​អប់រំ”​ ពី​នគរបាល ហើយ​ត្រូវ​បាន​ណែនាំ​ឲ្យ​បញ្ឈប់​ការ​តវ៉ា​បិទ​ផ្លូវ​តទៅ​ទៀត។

លោក សារ៉ែន មាន​ប្រសាសន៍​ថា កម្មករ​សម្រេច​ចិត្ត​​បិទ​ផ្លូវ​ដោយ​ខ្លួន​ឯង ពីព្រោះ​រោងចក្រ មិន​ព្រម​ទទួល​យក​ការ​ទាមទារ​ទាំង​អស់​របស់​ពួកគាត់ ហើយ​លោក​បាន​បន្ថែម​ថា កូដកម្ម​និង​ការ​តវ៉ា​នឹង​បន្ត​ធ្វើ​នៅ​ថ្ងៃ​នេះ​ទៀត។

ក្នុង​ពេល​ដំណាល​គ្នា​នេះ រោងចក្រ Yorkmars Garment កាលពី​ម្សិលមិញ​បាន​យល់​ព្រម​ទទួល​យក​សមាជិក​សហ​ព័ន្ធ​សហជីព​សាមគ្គី​ភាពកម្ពុជា​៦​​នាក់ ដែល​ត្រូវ​បាន​បណ្តេញ​កាលពី​ថ្ងៃ​សៅរ៍ ឲ្យ​ចូលធ្វើ​ការ​វិញបន្ទាប់ពី​កម្មករ​ធ្វើ​កូដ​កម្មរយៈ​ពេល​មួយ​ថ្ងៃ​នោះ​។

លោក ឡោ សុភក្ត្រ អនុប្រធាន​សហជីព បាន​មាន​ប្រសាសន៍​ថា សមាជិក​ទាំង​៦​នាក់​នោះ ត្រូវ​បាន​បណ្តេញ​ចេញពី​រោងចក្រ​ក្នុង​ខណ្ឌ​ពោធិ៍​សែនជ័យ រាជធានី​ភ្នំពេញ ពីព្រោះ​ភាគីរោងចក្រ​មិន​ចង់​បាន​សហជីព​ផ្សេងទៀត​នៅ​ក្នុង​រោងចក្រ​នេះ​ទេ។មានិត

 

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស