28 C
Phnom Penh

ពិធី​បុណ្យ​អំុទូក​នឹង​​វិល​ត្រឡប់​មក​ទី​ក្រុង​ភ្នំពេញ​វិញ

ដោយ ឌឹ ខេមបូឌា ដេលី

បទវិភាគ

ក្រុម​មន្ត្រី​បាន​និយាយ​កាលពី​ម្សិលមិញ​ថា ពិធី​បុណ្យ​អំុទូក​នឹង​ប្រារព្ធ​ធ្វើ​ក្នុង​ទីក្រុង​ភ្នំពេញ​ នៅ​ខែ​វិច្ឆិកា ជា​លើក​ដំបូង​ចាប់​តាំង​​ពី​មាន​មនុស្ស​៣៥៣​នាក់​បាន​ស្លាប់​ ឬ​ថប់​ដង្ហើម​ស្លាប់​នៅ​ក្នុង​ការ​ផ្អើល​រត់​ជាន់​គ្នា​នៅ​លើ​ស្ពាន​កោះ​ពេជ្រ​អំឡុង​ពិធី​បុណ្យ​អំុទូក​កាល​​ពី​ឆ្នាំ​២០១០។

ពិធី​បុណ្យ​អុំទូក​ដែល​ទាក់​ទាញ​មនុស្ស​ជាង​១លាន​នាក់​មក​ពី​តាម​ខេត្ត​ ​ត្រូវ​បាន​លុប​ចោល​បី​ឆ្នាំ​មក​ហើយ ដោយ​សារ​ទឹក​ជំនន់​ និង​ការ​សោយ​ទិវង្គត​របស់​សម្ដេច​ឪ​ នរោត្តម សីហនុ។

លោក ឈិន កេតនា អគ្គលេខាធិការ​គណៈកម្មាធិការ​រៀបចំ​បុណ្យ​ជាតិ និង​អន្តរជាតិ បាន​មាន​ប្រសាសន៍​ថា រដ្ឋាភិបាល​បាន​ផ្សព្វ​ផ្សាយ​សេចក្ដី​ជូន​ដំណឹង​មួយ​កាលពី​សប្ដាហ៍​មុន ណែនាំ​អាជ្ញាធរ​ឲ្យ​​ត្រៀម​រៀបចំ​ពិធី​បុណ្យ​អុំទូក​នៅ​ក្នុង​ទីក្រុង​ភ្នំពេញ​នៅ​ខែ​វិច្ឆិកា។

លោក​បាន​មាន​ប្រសាសន៍​ថា ” យើង​នឹង​ប្រារព្ធ​ពិធី​បុណ្យ​នេះ​នៅ​ថ្ងៃ​ទី​៥ ទី៦ និងទី​៧ ខែ​វិច្ឆិកា ពីព្រោះ​យើង​មិន​បាន​ធ្វើ​បី​ឆ្នាំ​មក​ហើយ​។ សម្ដេច​ [នាយក​រដ្ឋមន្ត្រី​ ហ៊ុន សែន] មិន​បាន​អនុញ្ញាត​ឲ្យ​យើង​រៀបចំ​ពិធី​នេះ ដោយ​សារ​គ្រោះ​មហន្តរាយ​ដែល​មិន​អាច​ដឹង​មុនបាន​។

លោក​ កេតនា ក៏​បាន​បដិសេធ​មិន​និយាយ​ថា តើ​គណៈកម្មាធិការ​របស់​លោក​នឹង​ធ្វើ​អ្វី​​ដើម្បី​ធានា​មិន​ឲ្យ​មាន​ការ​រត់ជាន់​គ្នា​នៅ​ឆ្នាំនេះ​ ដូច​នៅ​ខែ​វិច្ឆិកា​ ឆ្នាំ​២០១០​ទៀត​នោះ​ទេ​។​ លោក​បាន​មាន​ប្រសាសន៍អំពី​ការ​ផ្អើល​រត់​ជាន់​គ្នា​នេះ​ថា “កុំ​រំឭក​រឿង​នេះ​”។ លោក​ ហ៊ុន សែន បាន​ចាត់​ទុក​ការ​ផ្អើល​រត់​ជាន់​គ្នា​នេះ​ថា ជា​គ្រោះ​មហន្តរាយ​ដ៏អាក្រក់​បំផុត​នៅ​កម្ពុជា​ចាប់​តាំង​​ពី​ក្រោយ​របប​ខ្មែរ​ក្រហម​មក។

នៅ​សប្ដាហ៍​ក្រោយ​ពី​មាន​ការ​ផ្អើល​រត់​ជាន់​គ្នា​នៅ​ថ្ងៃ​ទី​២២ ខែ​វិច្ឆិកា ឆ្នាំ​២០១០ ក្រុម​មន្ត្រី​នគរ​បាល​​បាន​អះអាង​ថា ពួកគេ​មាន​ចំណុច​ខ្វះ​ខាត​នៅ​ក្នុង​ការ​គ្រប់​គ្រង​ក្រុម​មនុស្ស​ ដែល​​ទៅ​ប្រមូល​ផ្ដុំ​គ្នា​នៅ​កោះ​ពេជ្រ ប៉ុន្តែ​ក៏​បាន​បន្ទោស​ម្ចាស់​កោះ​ពេជ្រ​ដែរ​។

គណៈកម្ម​ការ​មួយ​ដែល​មាន​មន្ត្រី​រដ្ឋាភិបាល​ជាន់​ខ្ពស់​បាន​បញ្ចប់​ការ​ស៊ើប​អង្កេត​របស់​ខ្លួន​លើ​ហេតុការណ៍​នេះ​ក្នុង​រយៈ​ពេល​មួយ​សប្ដាហ៍ ហើយ​លោក​ ហ៊ុន សែន បាន​លើក​ឡើង​ថា គ្មាន​នរណា​ម្នាក់​​ត្រូវ​ទទួល​ខុស​ត្រូវ​ចំពោះ​រឿង​នេះទេ។ លោក​បាន​មាន​ប្រសាសន៍​ថា ” មិន​គួរ​បន្ទោស​​​នរណា​ម្នាក់​ចំពោះ​ការ​ផ្អើល​រត់​ជាន់​គ្នា ដែលគេ​នឹក​ស្មាន​មិន​ដល់​នេះ​ទេ”។

បន្ទាប់​មក​ពិធី​បុណ្យ​អុំទូក​ត្រូវ​បាន​លុប​ចោល​ដោយ​សារ​ទឹក​ជំនន់​នៅ​ក្នុង​ខែ​វិច្ឆិកា ឆ្នាំ​២០១១​ ដោយ​សារ​ការ​សោយ​ទិវង្គត​របស់​សម្ដេច​ឪ នរោត្តម សីហនុ កាលពី​ឆ្នាំ​២០១២​ និង​ដោយ​សារ​ទឹក​ជំនន់​ម្ដង​ទៀត​កាលពី​ឆ្នាំ​មុន​។

នៅ​ឆ្នាំ​នេះ​ការ​ជន់​លិច​តាម​ទន្លេ​មេគង្គ​នៅ​ខេត្ត​ភាគ​ខាង​ជើង​បាន​សម្លាប់​មនុស្ស​៣៥​នាក់​ហើយ ហើយ​ត្រូវ​ជម្លៀស​ប្រជា​ជន​ជាង​១២០.០០០​គ្រួសារ​​ចេញពី​លំនៅ​ដ្ឋាន​។

នៅពេល​ដូច​គ្នា​នេះ​កាលពី​ឆ្នាំ​មុន​ ការ​ជន់​លិច​មិន​​ទាន់​កើត​មាន​ទេ​ ប៉ុន្តែ​បាន​ចាប់​ផ្ដើម​ធ្វើ​ឲ្យប៉ះពាល់​ដល់​ខេត្ត​នៅ​ភាគខាង​ជើង​នៅពាក់​កណ្ដាល​ខែ​កញ្ញា និង​បាន​ឆក់​យក​ជីវិត​មនុស្ស​យ៉ាង​តិច​១៦៨​នាក់​។

លោក កឹម គុណវឌ្ឍន៍ អគ្គនាយក​ទូរទស្សន៍ជាតិ​កម្ពុជា​ ដែល​​មាន​ភារកិច្ច​ផ្សព្វ​ផ្សាយ​ព្រឹត្តិ​ការណ៍​​ជាតិ​បាន​មាន​ប្រសាសន៍​ថា ពិធី​បុណ្យ​អុំទូក​​នេះ​នឹង​មាន​ការ​បណ្ដែត​ប្រទីប​របស់​ក្រសួង​ចំនួន​ប្រាំ ប្រទីប​រដ្ឋសភា ព្រឹទ្ធសភា ព្រះ​បរម​រាជ​វាំង និង​ប្រទីប​របស់​រដ្ឋាភិបាល។ ខេត្ត​នីមួយ​ៗ​ក៏​នឹង​បញ្ជូន​ទូក​មក​ប្រកួត​ប្រជែង​​នៅ​ក្នុង​ការ​ប្រណាំង​នៅ​មុខ​ព្រះ​បរមរាជ​វាំង​ផង​ដែរ។

លោក កឹម គុណវឌ្ឍន៍ បាន​សរសេរ​នៅ​តាម​ហ្វេសប៊ុក​របស់​លោក​ថា “ខ្ញុំ​គិត​ថា ទូក​​មក​ពី​តាម​វត្ត​ ខេត្ត​ និងក្រុង ព្រម​ទាំង​ទូក​របស់​រដ្ឋាភិបាល​នឹង​ចាប់​ផ្ដើម​ត្រៀម​លក្ខណៈ​ពី​ពេល​នេះ​ទៅ”។

លោក ឡុង ឌីម៉ង់ អ្នក​នាំពាក្យ​សាលា​រាជ​ធានី​ភ្នំពេញ បាន​មាន​ប្រសាសន៍​ថា លោក​មិន​ទាន់​បាន​ឮអំពី​ការ​វិល​ត្រឡប់​មក​វិញ​នៃ​ពិធី​បុណ្យ​អុំទូក​នេះទេ ប៉ុន្តែ​អាជ្ញាធរ​ក្រុង​ត្រៀម​ខ្លួន​រៀបចំ​ពិធី​នេះ​​ប្រសិន​បើ​មិន​មាន​ការ​លុប​ចោល​ម្ដង​ទៀត​នោះ។ លោក​បាន​មាន​ប្រសាសន៍​ថា ” ប្រសិន​បើ​​គណៈកម្មាធិការ​រៀបចំ​បុណ្យជាតិ និងអន្តរជាតិ​ និយាយ​ដូច្នេះ វា​មិន​ខុស​ទេ​។ អាជ្ញាធរ​ក្រុង​នឹង​ត្រៀម​ខ្លួន​រៀប​ចំពិធី​នេះ​”។

លោក ចេវ ហាក់ នាយការិយាល័យ​នគរ​បាល​ចរាចរ​ក្រុង​ភ្នំពេញ​បាន​មាន​ប្រសាសន៍​ថា លោក​មិន​ទាន់​បាន​ដឹង​ព័ត៌មាន​នេះ​ទេ។ លោក​បាន​ឲ្យ​ដឹង​ថា ” ប៉ុន្តែ​ប្រសិន​បើ​វា​ជា​ការ​ពិត​មែន​នោះ យើង​​ត្រូវ​រៀបចំ​ផែន​ការ​ដើម្បី​ត្រៀម​លក្ខណៈ”។

នៅ​ជិត​ព្រះ​បរម​រាជ​វាំង​ជា​កន្លែង​រៀបចំពិធី​នេះ​ អាជីវករ​បាន​និយាយ​ថា ពួកគេ​រីក​រាយ​​ដោយ​បាន​ដឹង​ថា មានការ​រៀបចំ​ពិធី​បុណ្យ​អុំទូក​ឡើង​វិញ​សម្រាប់​ទាំង​ហេតុ​ផល​វប្បធម៌ និង​ហិរញ្ញវត្ថុ។

អ្នកស្រី មុំ ដានី អាយុ​៥០​ឆ្នាំ ជាអ្នក​លក់​វត្ថុ​អនុស្សាវរីយ៍​នៅ​តាម​មហាវិថី​ព្រះសីហនុ បាន​និយាយ​ថា ” ខ្ញុំ​រីក​រាយ​ណាស់​ដោយ​បាន​ដឹង​ថា មាន​ការ​រៀបចំ​ពិធី​បុណ្យ​នេះ ពីព្រោះ​ខ្ញុំ​មិន​ចង់​ឲ្យ​បាត់​បង់​ពិធី​នេះ​ទេ​។ ខ្ញុំ​សង្ឃឹម​ថា នឹង​លក់​ដាច់​ជាង​ថ្ងៃ​ធម្មតា​”។

អ្នកស្រី រស់​ ឡេង អាយុ​៦៤​ឆ្នាំ ជា​អ្នក​លក់​ភេសជ្ជៈ​ និង​អាហារ​សម្រន់​ជាយូរ​មក​ហើយ​នៅ​តាម​តីរវិថីព្រះ​ស៊ីសុវត្ថិ បាន​និយាយ​ថា មន្ត្រី​ព្រះ​បរម​រាជ​វាំង​ម្នាក់​បាន​ប្រាប់​អ្នកស្រី​រួច​ហើយ​អំពី​គម្រោង​សម្រាប់​ពិធី​បុណ្យ​អុំទូក​។

អ្នកស្រី ឡេង បាន​និយាយ​ថា ” ខ្ញុំ​សង្ឃឹម​ថា នឹង​លក់​ដាច់​នៅ​ឆ្នាំ​នេះ​។ ខ្ញុំ​អាច​រក​លុយ​បាន​យ៉ាង​តិច​៥0.០០០​រៀល​​ទៅ​១០០.០០០​រៀល​ក្នុង​មួយ​ថ្ងៃ​​អំឡុង​ពេល​បុណ្យ​អុំទូក​ ប៉ុន្តែ​ខ្ញុំរក​លុយ​បាន​ប្រហែល​តែ​២០.០០០​ទៅ​៣០.០០០​រៀល​ប៉ុណ្ណោ​ះ​នៅ​ថ្ងៃ​ធម្មតា៕ គឹមហឿន​​​​​​

 

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស