អ្នកភូមិជាង២០០នាក់មកពីក្រុងសៀមរាបបានរារាំងរថយន្តធុនធំពីរគ្រឿងមិនឲ្យបើកឆ្លងកាត់ភូមិរបស់ខ្លួនកាលពីថ្ងៃច័ន្ទ ដោយតវ៉ាថា រថយន្តទាំងនេះធ្វើឲ្យខូចផ្លូវនៅក្នុងសហគមន៍ និងអនុញ្ញាតឲ្យបើកឆ្លងកាត់វិញនៅពេលដែលក្រុមហ៊ុនសន្យាជួយថែរក្សាផ្លូវនេះតែប៉ុណ្ណោះ។
អ្នកភូមិមកពីភូមិទ្រៀកនិងភូមិក្រសាំងរលើង ក្នុងសង្កាត់សៀមរាប បានរារាំងរថយន្តដឹកដីរបស់ក្រុមហ៊ុន លី ហាំងសេង នៅពេលរថយន្តនេះបើកបរលើកំណាត់ផ្លូវប្រវែងបួនគីឡូម៉ែត្រពីផ្សារក្រោមទៅភ្នំក្រោម។
លោក ប៉ាវ ឆន ប្រធានភូមិទ្រៀកបានមានប្រសាសន៍ថា “អ្នកភូមិរបស់យើងបានរារាំងរថយន្តទាំងនេះមិនឲ្យបើកឆ្លងកាត់ ពីព្រោះវាធ្វើឲ្យខូចផ្លូវ និងធ្វើឲ្យធូលីហុយលើផ្ទះរបស់យើង និងលើប្រជាជន។ ធូលីហុយនេះប៉ះពាល់ដល់សុខភាពរបស់អ្នកភូមិ ជាពិសេសសុខភាពរបស់កុមារ”។
ទីបំផុត អ្នកភូមិបានយល់ព្រមអនុញ្ញាតឲ្យរថយន្តទាំងនេះបើកឆ្លងកាត់វិញនៅពេលក្រុមហ៊ុនសន្យាជួសជុលផ្លូវ ហើយបាញ់ទឹកជានិច្ចដើម្បីកុំឲ្យធូលីហុយ។
លោក ឆន បានមានប្រសាសន៍ថា ស្ថានភាពផ្លូវគឺជាក្តីកង្វល់នៅក្នុងសហគមន៍នេះអស់រយៈពេលប្រាំទៅប្រាំមួយឆ្នាំហើយ ហើយមានការតវ៉ាកាលពីឆ្នាំ២០១២ ២០១៣ និងដើមឆ្នាំនេះ។ ប៉ុន្តែរាល់លើក ក្រុមហ៊ុនមិនបានជួសជុលផ្លូវឲ្យបានត្រឹមត្រូវឡើយ។
លោក ព្រំ សារ៉ា តំណាងអ្នកភូមិបាននិយាយថា “បន្ទាប់ពីយើងធ្វើការតវ៉ា ក្រុមហ៊ុនបានចរចាជាមួយពួកយើង ហើយពួកគេបានសន្យាថា ពួកគេនឹងជួសជុលផ្លូវឲ្យបានល្អដូចពីមុន និងបាញ់ទឹកកុំឲ្យធូលីហុយខ្លាំងពេក”។
លោក សូ ប្លាតុង អភិបាលស្តីទីក្រុងសៀមរាបបានមានប្រសាសន៍ថា អាជ្ញាធរបានធ្វើការសម្របសម្រួលរវាងអ្នកភូមិនិងក្រុមហ៊ុន ហើយក្រុមហ៊ុននឹងអនុវត្តតាមការព្រមព្រៀងនេះ។
លោក ប្លាតុង បានមានប្រសាសន៍ថា”អាជ្ញាធររបស់យើងបានធ្វើការសម្របសម្រួលរវាងក្រុមហ៊ុន លី ហាំងសេង និងក្រុមអ្នកភូមិ ហើយក្រុមហ៊ុននេះបានអះអាងថា ពួកគេនឹងគោរតាមការសន្យា”។ លោកបានបន្ថែមថា ពួកគេ “នឹងចាត់វិធានការតាមច្បាប់” ប្រសិនបើក្រុមហ៊ុននេះមិនជួសជុលផ្លូវ។ គេមិនអាចទាក់ទងតំណាងក្រុមហ៊ុន លី ហាំងសេង ដើម្បីសុំអត្ថាធិប្បាយបានទេ៕សារុន