29 C
Phnom Penh

នគរបាល​រក​ឃើញ​សារធាតុ​ផលិត​គ្រឿង​ញៀន​អុិចស្តាស៊ី​នៅ​ខេត្ត​ពោធិ៍សាត់

ដោយ ឌឹ ខេមបូឌា ដេលី

បទវិភាគ

កាលពី​ម្សិលមិញ នគរ​បាល​ខេត្ត​ពោធិ៍សាត់​បាន​រក​ឃើញ​​ប្រេង​ម្រះព្រៅ​ប្រហែល​៩០០​លីត្រ​ ដែល​គេ​អាច​យក​ទៅ​ប្រើ​ប្រាស់​នៅ​ក្នុង​ការ​ផលិត​​ថ្នាំ​ញៀន​អិុចស្តាស៊ី កប់​នៅ​ក្នុង​ទីធ្លា​ខាង​ក្រោយ​ផ្ទះ​មួយ​នៅ​ក្នុង​ស្រុក​វាលវែង ចម្ងាយ​តែ​ប៉ុន្មានម៉ែត្រ​ប៉ុណ្ណោះ​ពី​កន្លែង​ដែល​គេ​បាន​ជីក​ឃើញ​ប្រេង​ម្រះព្រៅ​ជាង​២.០០០​លីត្រ​ទៀត​កាលពី​ថ្ងៃ​ច័ន្ទ។

ការ​ឆ្មក់​ចាប់​នេះ​គឺ​ជា​ការ​បន្ត​ការ​ស៊ើប​អង្កេត​រយៈ​ពេល​មួយ​ខែ​ ដើម្បី​ស្វែង​រក​ប្រេង​ម្រះព្រៅ​ ដែល​នគរ​បាល​គិត​ថា ត្រូវ​បាន​គេ​រក្សាទុក​ក្នុង​ប៊ីដុងនៅ​ទី​នោះ​ចាប់​តាំង​ពី​មាន​ការ​បង្ក្រាប​លើ​សារធាតុ​នេះ​កាល​ពី​ឆ្នាំ​២០១២​។

លោក ធាង ឡេង អធិការ​នគរ​បាល​ស្រុក​បាននិយាយ​ថា “យើង​ចាប់​បាន​៣១​ប៊ីដុង​ទៀត​នៅ​ផ្ទះ​ទី២​ ដែល​មាន​ចម្ងាយ​៣០​ម៉ែត្រ​ពី​រណ្ដៅ​ទី១​ ដែល​យើង​បាន​ជីក​កាលពី​ម្សិលមិញ​។ ឥឡូវ​នេះ​ខ្ញុំ​កំពុង​ថ្លឹង​ប្រេង​ម្រះព្រៅ​នោះ ហើយ​វា​មាន​ទម្ងន់​ពី​៣៩​ទៅ​៤២​គីឡូក្រាម​ក្នុង​មួយ​ប៊ីដុង”។

កាល​ពី​ថ្ងៃ​អាទិត្យ និង​ថ្ងៃ​ច័ន្ទ​ លោក ឡេង បាន​ដឹក​នាំ​សកម្មភាព​ជីក​រក​ប្រេង​ម្រះ​ព្រៅ​ពីរ​កន្លែង គឺ​មួយ​កន្លែង​នៅ​​កន្លែង​ដដែល និង​មួយ​កន្លែង​ទៀត​នៅ​ផ្ទះ​ផ្សេង​ចម្ងាយ​ប្រហែល​៦០០​ម៉ែត្រ​ពីគ្នា​ ដែល​មាន​ចំនួន​សរុប​ជាង​៣.០០០​លីត្រ​។

យោង​តាម​លោក ឡេង បាន​ឲ្យ​ដឹង​ថា មិន​មានការ​ចាប់​ខ្លួន​នរណា​ម្នាក់​ទេ ដោយ​មាន​លោក​​ មិន ចាន់ ដែល​ជា​ម្ចាស់​ផ្ទះ​ទី១​បាន​សហការ​ជាមួយ​នគរ​បាល​។ ទោះជា​យ៉ាង​ណា កាល​ពី​ម្សិលមិញ អធិការ​នគរ​បាល​ស្រុក​រូប​នេះបាន​និយាយ​ថា នគរ​បាល​កំពុង​ស្វែង​រក​ម្ចាស់​ផ្ទះ​ទី២​ ដែល​បាន​គេច​ខ្លួន​ ប៉ុន្តែ​លោក​មិន​ជឿ​ថា ម្ចាស់​ផ្ទះ​នោះ​គឺ​ជា​ម្ចាស់​ប្រេង​ម្រះព្រៅ​នេះ​ទេ។ លោក ឡេង បាន​និយាយ​ថា ” បុរស​អាយុ​២១​ឆ្នាំ​ម្នាក់​ឈ្មោះ រឿង សំណាង ហៅ ខ្មៅ បាន​រត់គេច​ខ្លួន​។ អ្នក​ដែល​រក្សា​ទុក​ប្រេង​ម្រះ​ព្រៅ​នេះ​មិន​មែន​ជា​​ម្ចាស់​ប្រេង​ម្រះព្រៅ​នេះ​ទេ”។

កាលពី​ឆ្នាំ​២០១២​នគរ​បាល​បាន​រារាំង​ការ​ផលិត​ និង​ការ​លក់​ប្រេង​ម្រះ​ព្រៅ​នៅ​ក្នុង​ខេត្ត​ពោធិ៍សាត់ ដែល​សម្បូរ​ទៅ​ដោយ​ដើម​ម្រះព្រៅ​ ដែល​ជា​ប្រភព​នៃ​ប្រេង​ម្រះព្រៅ​។

លោក អ៊ុំ សេង មេឃុំ​អន្លង់​រាប ​ជា​ឃុំ​ដែល​មាន​ការ​បង្ក្រាប​នៅ​សប្ដាហ៍​េនះ​បាន​និយាយ​ថា លោក ចាន់ ដែល​ជា​ម្ចាស់​ផ្ទះ​ទី១​បាន​ចែក​រំលែក​ព័ត៌មាន​អំពី​កន្លែង​កប់​ប៊ីដុង​ប្រេង​ម្រះ​ព្រៅ​ជាង​២០០​ប៊ីដុង។

លោក ធាង ឡេង បាន​និយាយ​ថា លោក​រក្សា​ទុក​​ប្រេង​ទាំង​អស់​នេះ​ដែល​មាន​តម្លៃ​រហូត​ដល់​១០ដុល្លារ​ក្នុង​មួយ​លីត្រ នៅ​​អធិការដ្ឋាន​នគរ​បាល​ស្រុក​នៅ​ពេល​ដែល​ការ​បង្ក្រាប​បន្ត​ទៀត។ លោក ឡេង បាន​និយាយ​ថា ” ខ្ញុំ​កំពុង​ស្វែង​រក និង​ប្រមូល​ព័ត៌មាន​បន្ថែម​ទៀត។​ វា​មិន​ទាន់​ចប់​នៅ​ឡើយ​ទេ​”៕ គឹមហឿន​​​​​​​​

 

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស