ក្រុមមន្ត្រីបាននិយាយថា មន្ត្រីរដ្ឋបាលព្រៃឈើពីរនាក់ដែលត្រូវបានចាប់ខ្លួននិងឃាត់ខ្លួននៅក្នុងខេត្តក្រចេះពីបទគំរាមទារប្រាក់ពីកសិករដាំម្រេចនោះ ត្រូវបានបញ្ជូនបន្តទៅរាជធានីភ្នំពេញកាលពីម្សិលមិញតាមសំណើរបស់អង្គភាពប្រឆាំងអំពើពុករលួយ។
លោក ស៊ាន សុភក្ត្រ អធិការនគរបាលក្រុងក្រចេះបានមានប្រសាសន៍ថា នគរបាលបានចាប់ខ្លួនមន្ត្រីទាំងពីរនាក់នេះឈ្មោះ មិញ ស៊ីថា និង សន ណារិន នៅភោជនីយដ្ឋានមួយក្នុងក្រុងក្រចេះកាលពីថ្ងៃអាទិត្យបន្ទាប់ពីទទួលបានពាក្យបណ្តឹងពីកសិករថា ពួកគេទាំងពីរនាក់នេះបានគំរាមទារប្រាក់ដើម្បីអនុញ្ញាតឲ្យពួកគាត់ដឹកម្រេចដែលប្រមូលផលពីចម្ការរបស់ខ្លួន។
លោកបានមានប្រសាសន៍ថា “យើងបានចាប់ខ្លួនមន្ត្រីរដ្ឋបាលព្រៃឈើទាំងពីរនាក់នេះដែលជាមន្ត្រីរដ្ឋបាលព្រៃឈើក្នុងស្រុកព្រែកប្រសព្វ កាលពីថ្ងៃទី១៧ ខែសីហា ពីព្រោះនគរបាលទទួលបានពាក្យបណ្តឹងពីជនរងគ្រោះ…ជុំវិញអំពើពុករលួយដោយសារពួកគេបានគំរាមទារប្រាក់ចំនួន១.៥០០ដុល្លារពីជនរងគ្រោះ”។
អធិការនគរបាលរូបនេះបានមានប្រសាសន៍ថា កសិករទាំងនេះបានទិញដីមួយក្បាលនៅក្នុងស្រុកព្រែកប្រសព្វកន្លែងដែលពួកគាត់ដាំនិងប្រមូលផលម្រេចចំនួន៧០០ដើម ហើយបម្រុងដឹកទៅលក់នៅទីផ្សារ។
លោក សុភក្ត្រ បានមានប្រសាសន៍ថា ពីដំបូងមន្ត្រីទាំងពីររូបនេះត្រូវបានហៅឲ្យទៅកាន់ភោជនីយដ្ឋានមួយក្នុងក្រុងក្រចេះដើម្បីសាកសួរ។ បន្ទាប់ពីរកឃើញថា ពួកគេបានប្រើប្រាស់តួនាទីរបស់ខ្លួនគំរាមទារប្រាក់ នគរបាលបានទូរស័ព្ទទៅអង្គភាពប្រឆាំងអំពើពុករលួយនៅរាជធានីភ្នំពេញ។ លោក សុភក្ត្រ បានមានប្រសាសន៍ថា “ដំបូង យើងបានអញ្ជើញមន្ត្រីរដ្ឋបាលព្រៃឈើទាំងពីរនាក់នេះមកសាកសួរ ប៉ុន្តែមិនបានចាប់ខ្លួនពួកគេទេ ប៉ុន្តែបន្ទាប់ពីពួកគេជាប់ពាក់ព័ន្ធនឹងអំពើពុករលួយ យើងក៏បានរាយការណ៍ទៅអង្គភាពប្រឆាំងអំពើពុករលួយតែម្តង”។
លោកបានមានប្រសាសន៍ថា អង្គភាពប្រឆាំងអំពើពុករលួយបានស្នើឲ្យនគរបាលផ្ទេរលោក ស៊ីថា និង លោក ណារិន ទៅរាជធានីភ្នំពេញ ហើយពួកគេបានមកដល់ទីស្នាក់ការកណ្តាលរបស់អង្គភាពប្រឆាំងអំពើពុករលួយដែលស្ថិតនៅតាមមហាវិថីព្រះនរោត្តមនៅម៉ោង៨ព្រឹកម្សិលមិញហើយ។
លោកបានមានប្រសាសន៍ថា “ឥឡូវនេះ ពួកគេនៅក្នុងការិយាល័យអង្គភាពប្រឆាំងអំពើពុករលួយដើម្បីបន្តដំណើរការករណីរបស់ខ្លួនទាក់ទងនឹងសកម្មភាពរបស់ពួកគេ”។
លោក ឆាយ សាវុធ អនុប្រធានអង្គភាពប្រឆាំងអំពើពុករលួយបានមានប្រសាសន៍តាមទូរស័ព្ទថា ករណីនេះកំពុងត្រូវបានដោះស្រាយដោយលោក ឱម យ៉ិនទៀង ប្រធានអង្គភាពប្រឆាំងអំពើពុករលួយ ហើយលោកបានបដិសេធមិនធ្វើអត្ថាធិប្បាយអំពីបញ្ហានេះទេ។គេមិនអាចទាក់ទងលោក ឱម យ៉ិនទៀង ដើម្បីសុំអត្ថាធិប្បាយបានទេ៕សារុន