ដោយប្រឈមនឹងការកើនឡើងការរងរបួសពាក់ព័ន្ធនឹងការងារ មន្ត្រីរដ្ឋាភិបាលបានជួបប្រជុំគ្នានៅក្នុងរាជធានីភ្នំពេញកាលពីម្សិលមិញ ដើម្បីចាប់ផ្ដើមការងារលើផែនការថ្មីមួយដើម្បីកាត់បន្ថយគ្រោះថ្នាក់នៅកន្លែងធ្វើការ និងដើម្បីឆ្លុះបញ្ចាំងពីសមិទ្ធផលសម្រេចបានក្នុងរយៈពេលប្រាំឆ្នាំមកនេះ។
យោងតាមបេឡាជាតិរបបសន្តិសុខសង្គមបានឲ្យដឹងថា មនុស្សជិត១៧.០០០នាក់បានរងរបួសនៅកន្លែងធ្វើការកាលពីឆ្នាំមុន ពោលគឺច្រើនជាងកាលពីឆ្នាំ២០១២ ប្រហែល២.៦០០នាក់។
ចំនួនដែលផ្អែកលើនិយោជករាយការណ៍អំពីគ្រោះថ្នាក់ ក៏បានកើនឡើងបួនដងដែរ ចាប់តាំងពីរដ្ឋាភិបាលបានចាប់ផ្ដើមផែនការមេស្ដីពីសុខភាព និងសុវត្ថិភាពការងារលើកទី១របស់ខ្លួននៅក្នុងឆ្នាំ២០០៩មក។ ទោះបីជាមានការកើនឡើងបែបនេះក្តី ក៏មន្ត្រីបានអះអាងថា គោលដៅផែនការនេះសម្រេចបាន៨០ភាគរយ។
លោក ឡេង តុង ប្រធាននាយកដ្ឋានពេទ្យការងារនៃក្រសួងការងារ និងបណ្តុះបណ្តាលវិជ្ជាជីវៈ បានមានប្រសាសន៍ថា សមិទ្ធផលសម្រេចបានរួមមាន ការអនុម័តច្បាប់ស្តីពីសុខភាព និងសុវត្ថិភាព ការចុះធ្វើអធិការកិច្ចនៅកន្លែងធ្វើការ ការគ្រប់គ្រងគ្លីនិកសម្រាប់កម្មករកាត់ដេរ និងការចែករំលែកព័ត៌មានជាមួយបណ្តាប្រទេសផ្សេងទៀតនៅក្នុងតំបន់។
លោកបានមានប្រសាសន៍ទៀតថា “នៅក្នុងពេលថ្មីនេះៗ យើងបានបង្កើតគណៈកម្មាធិការអន្តរក្រសួងមួយ ដើម្បីទប់ស្កាត់ការសន្លប់របស់កម្មករ និងគណៈកម្មាធិការអន្តរក្រសួងមួយទៀត ដើម្បីពិនិត្យមើលសុវត្ថិភាពនៅតាមរោងចក្រ។ ប្រសិនបើរោងចក្រមិនឈានដល់កម្រិតស្តង់ដារទេនោះ យើងនឹងកំណត់លក្ខខណ្ឌឲ្យរោងចក្រនោះកែលម្អ ហើយប្រសិនបើមិនព្រមកែលម្អទេ យើងនឹងពិន័យ ឬបិទវាចោលតែម្តង”។
នៅក្នុងការធ្វើបទបង្ហាញក្នុងកិច្ចប្រជុំ ដែលបញ្ចប់នៅថ្ងៃនេះ លោក ហាន់ នព្វគុណ ប្រធាននាយកដ្ឋានស្ថិតិ និងទំនាក់ទំនងខាងក្រៅនៃក្រសួងការងារ បានទទួលស្គាល់ថា មានឧបសគ្គមួយចំនួនដែលធ្វើឲ្យរាំងស្ទះការបង្កើនកម្រិតស្តង់ដារនៅកន្លែងធ្វើការ។
លោកបានមានប្រសាសន៍ទៀតថា ឧបសគ្គចម្បងៗនៅក្នុងចំណោមនោះ គឺធនធានមានកម្រិតសម្រាប់ការធ្វើអធិការកិច្ច និងកង្វះច្បាប់ និងបទដ្ឋាននៅក្នុងឧស្សាហកម្មសំណង់ជាដើម។
លោក ដេវ វែលស៍ (Dave Welsh) នាយកប្រចាំប្រទេសកម្ពុជា នៃមជ្ឈមណ្ឌលសាមគ្គីភាព (Solidarity Center) ជាអង្គការសិទ្ធិការងារមួយដែលមានមូលដ្ឋាននៅក្នុងសហរដ្ឋអាមេរិក បានមានប្រសាសន៍ថា ចាំបាច់ត្រូវតែធ្វើកំណែទម្រង់ គឺមិនត្រឹមតែនៅក្នុងវិស័យកាត់ដេរដែលជិត៦០ភាគរយនៃគ្រោះថ្នាក់ត្រូវបានកត់ត្រាកាលពីឆ្នាំមុនប៉ុណ្ណោះទេ ប៉ុន្តែថែមទាំង នៅក្នុងឧស្សាហកម្មសំណង់ដែលក្រុមហ៊ុនថ្មីៗត្រូវបានចុះបញ្ជីជាមួយបេឡាជាតិរបបសន្តិសុខសង្គម ក៏ត្រូវធ្វើកំណែទម្រង់ដែរ។ លោកបានមានប្រសាសន៍ទៀតថា “នឹងមានការជំរុញខ្លាំងពីខាងយើង ដើម្បីឲ្យខាងសំណង់គោរពតាមគោលការណ៍នេះ”៕សុខុម