33 C
Phnom Penh

សហជីព​ចោទ​ប្រកាន់​រដ្ឋាភិបាល​​ថា កំពុងព្យាយាម​រារាំង​ការ​ចុះបញ្ជី​សាខា​សហជីព​ថ្មីៗ​

ដោយ ឌឹ ខេមបូឌា ដេលី

បទវិភាគ

កាលពី​ខែ​មីនា ក្រសួង​​ការ​ងារ​បណ្ដុះ​បណ្ដាល​វិជ្ជាជីវៈ បាន​ចាប់​ផ្ដើម​​ដាក់លក្ខ​ខណ្ឌ​ជា​លើក​ដំបូង​​​តម្រូវ​ឲ្យ​មេដឹកនាំ​សហជីព​ដាក់​ភ័ស្តុ​តាង​បញ្ជាក់​ថា ខ្លួន​មិន​ធ្លាប់​មាន​ប្រវត្តិ​ប្រព្រឹត្ត​បទ​ល្មើស​ មុន​ពេល​ពួកគេ​ទទួល​បាន​ការ​អនុញ្ញាត​ឲ្យ​ចុះ​បញ្ជី​សហជីព​​ ឬ​សាខាថ្មី​។

ពេល​នេះ​បណ្ដា​សហជីព​លេច​ធ្លោ​នៅ​ក្នុង​ប្រទេស​កម្ពុជា​និយាយ​ថា តំណាង​កម្មករ​កំពុង​ជួប​ការ​លំបាក​ក្នុង​ការ​ទទួល​បាន​ឯកសារ​ស្មុគ​ស្មាញ​នេះ​ ដែល​ពួកគេ​​ត្រូវ​ការ​ដើម្បីបញ្ជាក់​​ថា ខ្លួន​មាន​ប្រវត្តិ​ស្អាត​ស្អំ​​មិន​ធ្លាប់​ប្រព្រឹត្ត​បទ​ល្មើស ហើយ​ថា វិធាន​ថ្មី​នេះ​គឺ​ស្មើ​នឹង​ការ​រារាំង​ការ​ចុះ​បញ្ជី​សហជីព​ថ្មីៗ​។

យោងតាម​លោក គង់ អាទិត្យ អនុ​ប្រធានសម្ព័ន្ធ​សហជីព​ប្រជា​ធិបតេយ្យ​កម្មករ​កាត់​ដេរ​កម្ពុជា ហៅកាត់​ថា ស៊ីខៅឌូ ​​បាន​ឲ្យ​ដឹង​ថា ​នៅ​ឆ្នាំ​នេះ ​សហ​ជីព​របស់​លោក​​មិន​អាច​ចុះ​បញ្ជី​សាខា​ថ្មី​​នៅ​ក្រសួង​ការ​ងារ​បាន​សូម្បី​តែ​មួយ ទោះ​បី​ជា​ខ្លួន​បាន​ព្យាយាម​ប្រហែល​១០លើក​រួម​មក​ហើយ​​ក្ដី​។

លោក អាត់ ធន់ ដែល​ជា​ប្រធាន​សហជីព​នេះ​បាន​មាន​ប្រសាសន៍​ថា ” ពេល​នេះ​ពួកគេ​ដាក់​លក្ខខណ្ឌ​បន្ថែម​ទៀត​មក​លើ​យើង​ ធ្វើ​ឲ្យ​យើង​កាន់​តែ​មាន​ការពិ​បាក​ ដូច្នេះ​វា​មាន​ការ​ពិបាក​ណាស់​ក្នុង​ការ​ចុះ​បញ្ជី​​។ ប្រសិន​បើ​គ្មាន​ឯកសារ​គ្រប់​គ្រាន់ទេ ពួកគេ​ពន្យារ​ពេល​រហូត​ដល់​យើង​មាន​គ្រប់​គ្រាន់​”។

លោក​បាន​មាន​ប្រសាសន៍​បន្ត​ថា លោកជឿ​ថា រដ្ឋាភិបាល​មាន​ចេតនា​រារាំង​សហជីព​ឯក​រាជ្យ​មិន​ឲ្យ​បង្កើត​សាខាថ្មីៗ​​តាម​រយៈ​​ដំណើរ​ការ​ចុះ​បញ្ជី​ ដែល​មាន​លក្ខណៈ​ការិយាធិបតេយ្យ​ហួស​ហេតុ​ ដើម្បី​ឆ្លើយ​តប​ទៅ​នឹង​កូដកម្ម​ទូទាំង​ប្រទេស​នៅ​ក្នុង​វិស័យ​កាត់​ដេរ​កាលពី​ខែ​មករា ដែល​បាន​ផ្ទុះអំពើ​ហិង្សា​ និង​ដែល​ត្រូវ​​បាន​បង្ក្រាប​​ដ៏បង្ហូរ​ឈាម​ពី​សំណាក់​កង​រាជ​អាវុធ​ហត្ថ។​ លោកបាន​មាន​ប្រសាសន៍ទៀត​ថា “មូលហេតុ​ដែល​ក្រសួង​ការ​ងារ​ផ្លាស់​ប្ដូរ [គោល​នយោបាយ​របស់​ខ្លួន​] គឺ​ដោយ​សារ​តែ​កូដកម្ម​​​ទូទាំង​ប្រទេស​កាលពី​ខែ​មករា”។

ទោះ​បី​ជា​ច្បាប់​ការ​ងារ​អនុម័ត​នៅ​ឆ្នាំ​១៩៩​៧​ចែង​ថា ជន​ធ្លាប់​មាន​​ទោស​មិន​អាច​ធ្វើ​ជា​មេដឹកនាំ​សហជីព​បាន​ក្ដី ​ក៏គ្មាន​លក្ខ​ខណ្ឌ​តម្រូវ​ឲ្យ​មាន​ឯកសារ​បញ្ជាក់​ភាព​ស្អាត​ស្អំ​​ដែរ​ រហូត​មក​ទល់​ខែ​មីនា។ ​ពេល​​នេះ ដើម្បី​ទទួល​បាន​លិខិត​ថ្កោល​ទោស តំណាង​កម្មករ​​ត្រូវ​ធ្វើ​ដំណើរ​មក​​រាជធានីភ្នំពេញ ដើម្បី​ប្រគល់​សំបុត្រ​កំណើត​ច្បាប់​ដើម សៀវភៅ​គ្រួសារ និង​អត្ត​សញ្ញាណ​ប័ណ្ណ​ឲ្យទៅ​ក្រសួង​យុត្តិធម៌។

បណ្ដា​មេដឹកនាំ​សហជីព​និយាយ​ថា លក្ខខណ្ឌ​តម្រូវ​នេះ​មាន​ការ​ពិបាក​សម្រាប់​កម្មករ​រោង​ចក្រ​កាត់​ដេរ ដែល​ជានិច្ចកាល​គ្មាន​ឯកសារ​ច្បាប់​ដើម​នៅ​ក្នុង​ដៃ​ និង​ដែល​ត្រូវ​សុំ​ការ​អនុញ្ញាត​ពី​គណៈគ្រប់​គ្រង​រោងចក្រ​ ដែល​មាន​ការ​ស្ទាក់​ស្ទើរ​ក្នុង​ការ​ផ្ដល់​ពេល​វេលា​​សម្រាប់​ពួកគេ​បង្កើត​សហជីព​ ដើម្បី​ធ្វើ​ដំណើរ​មក​កាន់​រាជ​ធានី។

លោក ប៉ាវ ស៊ីណា ប្រធានសម្ព័ន្ធ​សហជីព​ចលនាកម្ពុជា បាន​មាន​ប្រសាសន៍​ថា នីតិវិធី​ថ្មី​នេះ​កំពុង​បង្ក​ការ​ស្មុគ​ស្មាញ​ និង​រារាំង​សហជីព​មិន​ឲ្យ​ពង្រីក​ខ្លួន​។ លោក​មាន​ប្រសាសន៍​ថា  “យើង​បាន​ដាក់​ពាក្យ​ស្នើ​សុំ​ចុះ​បញ្ជី​ចំនួន​ប្រាំ​ច្បាប់​សម្រាប់​សហជីព​របស់​យើង​ ប៉ុន្តែ​អាជ្ញាធរ​និយាយ​ថា យើង​គ្មាន​ឯកសារ​គ្រប់​គ្រាន់​​ទេ ដូច​ជាអត្តសញ្ញាណ​ប័ណ្ណ សៀវភៅគ្រួសារ និង​សំបុត្រ​កំណើត​ជាដើម​”។

លោក រ៉ុង ឈុន ​ប្រធាន​​សហភាព​សហជីព​កម្ពុជា​ បាន​មាន​​ប្រសាសន៍​ថា ចាប់​តាំង​ពី​ខែ​មីនាមក សហជីព​ចំនួន​១៨​នៅ​ក្នុង​សហភាព​របស់​លោក​ បាន​ព្យាយាម​ចុះ​បញ្ជី​សាខា​ថ្មីៗ​ ប៉ុន្តែ​បាន​បរាជ័យ​រាល់​លើក​ដោយសារ​តែ​លក្ខខណ្ឌ​ថ្មី​ទាំង​នេះ​។

លោក​មាន​ប្រសាសន៍​ទៀត​ថា “វា​ពិបាក​សម្រាប់​កម្មករ​មួយ​ចំនួន​ ដែល​គ្មាន​ឯកសារ​ទាំង​អស់​នេះ​ និង​សម្រាប់​ពួកគាត់​​បង្ហាញ​មុខ​ [នៅ​ក្រសួង​យុត្តិធម៌] ពីព្រោះ​ពួកគាត់​ត្រូវ​សុំ​ការ​អនុញ្ញាត​ពី​រោងចក្រ​។ វា​ត្រូវ​ការ​ពេល​វេលា​ និងថ​វិកា​ច្រើន​​ក្នុង​ការ​​ដាក់ពាក្យ​ស្នើ​សុំ​ចុះ​បញ្ជី​សហជីព​ [សាខា]។ វា​​មាន​ការពិបាក​សម្រាប់​យើង​​ទទួល​​បានការ​ចុះ​បញ្ជី”។

លោក រ៉ុង ឈុន បាន​អំពាវ​នាវ​ឲ្យ​ក្រសួង​ការ​ងារ​វិល​ទៅ​អនុ​វត្ត​តាម​​លក្ខខណ្ឌ​ចាស់​វិញ​ ដែល​​តំណាង​សហជីព​ប្រកាស​ប្រវត្តិ​ប្រព្រឹត្ត​បទ​ល្មើស​ដោយ​ខ្លួន​ឯង និងដែល​ពាក្យ​ស្នើ​សុំ​មិន​​ត្រូវ​ការ​ហត្ថលេខី​របស់​តំណាង​រោងចក្រ​។

លោក​មាន​ប្រសាសន៍ទៀត​ថា “ក្រសួង​ការ​ងារ​កំពុង​រើស​អើង​​ចំពោះ​​សហជីព​​ ដែល​ប្រឆាំង​នឹង​ក្រសួង​ សហជីព​ដែល​ជួយ​ការ​ពារ​កម្មករ​។ ក្រសួង​បាន​និយាយ​ថា យើង​គ្មាន​ឯកសារ​គ្រប់​គ្រាន់ ឬ​ប្រើ​ប្រាស់​ព័ត៌មាន​មិន​ត្រឹម​ត្រូវ​ ហើយ​ត្រូវ​ការ​ពិនិត្យ​ផ្ទៀង​ផ្ទាត់​”។

មន្ត្រី​រដ្ឋាភិបាល​ដែល​ត្រូវ​​បាន​ទាក់​ទង​នៅ​សប្ដាហ៍នេះ​បាន​បដិសេធ​ថា ពួកគេ​គ្មាន​ចេតនា​រារាំង​សហជីព​ទេ ដោយ​និយាយ​ថា ពួកគេ​គ្រាន់​តែ​គ្រប់​គ្រង​​ច្បាប់​ប៉ុណ្ណោះ​។ សមាជិក​មួយ​រូប​នៅ​ខុទ្ទកាល័យ​​របស់​លោក អង្គ វង្សវឌ្ឍានា រដ្ឋមន្ត្រី​ក្រសួង​យុត្តិធម៌ ដែល​សុំ​មិន​បញ្ចេញ​ឈ្មោះ​ បាន​លើក​ឡើង​ថា ដំណើរ​ការ​នៃ​ការ​​ទទួល​បាន​លិខិត​ថ្កោល​ទោស​ ដែល​ត្រូវ​ការ​ពេល​វេលា​២០ថ្ងៃ​ក្នុង​ថ្ងៃ​ធ្វើការ​​នេះ គឺ​ជា​ស្តង់ដារ។

លោក អុិត សំហេង រដ្ឋមន្ត្រី​ក្រសួង​ការ​ងារ​ បាន​ចេញ​មុខ​​ការ​ពារ​លក្ខខណ្ឌ​តម្រូវ​​ឲ្យ​មាន​លិខិត​ថ្កោល​ទោស​នេះ​ ដោយ​មាន​ប្រសាសន៍​ថា ពេល​នេះ​តំណាង​សហជីព​អាចចៀស​​ផុត​ពី​ទោស​ធ្ងន់​ធ្ងរ​ចំពោះ​ការ​ផ្ដល់​ព័ត៌មាន​មិន​ត្រឹម​ត្រូវ​។ លោក​ថ្លែង​​ថា “ដើម្បី​ទទួល​បាន​លិខិត​ថ្កោល​ទោស​ពី​ក្រសួង​យុត្តិធម៌ ត្រូវ​ដាក់​ការ​ទទួល​ខុស​ត្រូវ​តិច​ជាង​មុន​លើ​ពួកគេ​ ហើយ​វា​ងាយ​ស្រួល​ជាង​មុន​ឆ្ងាយ​ណាស់​”។

លោក​បាន​បន្ត​ថា ក្រសួង​មាន​កាតព្វកិច្ច​ដើម្បី​ធានា​ថា បេក្ខជន​ដាក់​ពាក្យ​​ស្នើ​សុំ​​​ជា​កម្មករ​កាត់​ដេរពិត​ប្រាកដ​ ហើយ​មាន​ប្រវត្តិ​ស្អាត​ស្អំ​មិន​ធ្លាប់​ប្រព្រឹត្ត​បទ​ល្មើស ខណៈ​ដែល​​ការ​ចុះ​បញ្ជី​​កំពុង​​​មាន​ចំនួន​កើន​ឡើង​។

លោក​បាន​មាន​ប្រសាសន៍បន្ថែម​ទៀត​ថា “វា​គ្មាន​ប្រយោជន៍ទេ​ក្នុង​ការ​រារាំង​ពួកគេ​ [ចុះ​បញ្ជី​]។ ពេល​នេះ​មាន​សហជីព​ជិត​៤.០០០​ ហើយ​រោងចក្រ​មួយ​ចំនួន​មាន​សហជីព​ជាង​១០​ តើ​កន្លែង​ណា​ដែល​ថា យើង​រារាំង? ពេល​នេះ​កម្ពុជា​ គឺ​ជា​កន្លែង​ដ៏សុខសាន្ត​របស់​សហជីព”៕ សុខុម (រាយការណ៍​បន្ថែម​ដោយ Holly Robertson)​​​​​​​​​​​​

 

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស