28 C
Phnom Penh

​​ពន្ធនាគារ​ព្រៃសមិន​ទាន់​មាន​ទឹក​ផ្គត់​ផ្គង់វិញ​នៅឡើយទេ

ដោយ ឌឹ ខេមបូឌា ដេលី

បទវិភាគ

មន្ត្រី​ពន្ធនាគារ​ព្រៃ​ស​កំពុង​ដឹក​ទឹក​រាប់​ពាន់​លីត្រ​ទៅ​កាន់​ពន្ធនាគារ​នេះ​ក្នុង​មួយ​ថ្ងៃ​ៗ​ ពីព្រោះ​ក្រុម​ហ៊ុន​ជួស​ជុល​ផ្លូវ​មួយ​បាន​ធ្វើ​ឲ្យ​បែក​ទុយោ​ទឹក​ ហើយ​មិន​ទាន់​បាន​ជួស​ជុល​នៅ​ឡើយ​ទេ​។

យោង​តាម​មន្ត្រី​ពន្ធនាគារ​បាន​ឲ្យ​ដឹង​ថា អ្នក​ទោសម្នាក់ៗ​ទទួល​បាន​ទឹក​ស្អាត​៣លីត្រ​ក្នុង​មួយ​ថ្ងៃ ដែល​រថយន្តដឹកទឹក​បាន​ទៅ​ដឹក​នៅ​កន្លែង​ដែល​បែក​ទុយោនោះ​ស្ថិតនៅ​ចម្ងាយ​ប្រហែល​បីគីឡូម៉ែត្រ​ពីពន្ធនាគារ​ ហើយពួកគេ​​ត្រូវ​ការ​ទឹក​បន្ថែម​ទៀត​ពី​ស្រះ​ក្បែរ​នោះ​។

ពួក​គេ​បាន​និយាយ​ថា បណ្តាញ​​​ផ្គត់​ផ្គង់​ទឹក​ទៅកាន់​ពន្ធនាគារ​នេះ​ត្រូវ​បាន​កាត់​ផ្ដាច់​ច​ន្លោះ​១០​ថ្ងៃ​ ឬ​ពីរ​សប្ដាហ៍​មកហើយ​។

លោក​ តេង ប៊ុនធី អនុ​ប្រធាន​មណ្ឌល​អប់​រំ​កែប្រែ​ទី២​ នៅ​ពន្ធនាគារ​ព្រៃ​ស​បាន​មាន​ប្រសា​សន៍​ថា ” បន្ទាប់​ពី​ប្រព័ន្ធ​ទឹក​ត្រូវ​បាន​កាត់​ផ្ដាច់​ យើង​បាន​បញ្ជា​ឲ្យ​មន្ត្រី​ពន្ធនាគារ​ប្រើ​ប្រាស់​ឡាន​ដឹក​ទឹក​យ៉ាង​ហោច​ណាស់​ក៏​១០ជើង​ដែរ​​ក្នុង​មួយ​ថ្ងៃ​”។ លោក​បាន​បន្ថែម​ថា “មាន​ទឹក​គ្រប់​គ្រាន់​សម្រាប់​អ្នក​ទោស​ជិត​៥.០០០​នាក់​​ ប៉ុន្តែ​យើង​ក៏នៅឲ្យពួកគេ​ប្រើ​ប្រាស់​ទឹក​ស្រះ​ផង​ដែរ ខណៈ​​​ទុយោ​​​កំពុង​ត្រូវ​​​បាន​​​​ជួស​ជុល​”។

លោក ប៊ុនធី បាន​មាន​ប្រសាសន៍​ថា លោក​បាន​ស្នើ​សុំឲ្យ​សាលា​រាជ​ធានី​ដោះ​ស្រាយ​បញ្ហា​នេះ ប៉ុន្តែ​សាលា​រាជ​ធានី​មិន​ទាន់​បាន​ឆ្លើយ​តប​នៅ​ឡើយ​ទេ។

លោក ឡុង ឌីម៉ង់ អ្នក​នាំពាក្យ​សាលា​រាជ​ធានី​បាន​​មាន​ប្រសាសន៍​ថា បុគ្គលិក​ផ្នែក​ថែទាំ​ត្រូវ​បាន​បញ្ជូន​ទៅ​កន្លែង​ទុយោ​ដែល​បែក​នោះនៅមុខ​ប៉ុស្តិ៍​នគរ​បាល​សង្កាត់​ព្រៃ​ស ប៉ុន្តែ​មិន​អាច​បញ្ជាក់អំពី​ពេលវេលា​ជួសជុលឡើយ​។ លោក ឡុង ឌីម៉ង់ បាន​មាន​ប្រសាសន៍​ថា ” យើង​បាន​បញ្ជូន​មន្ត្រី​ទៅ​ពិនិត្យ​មើល​បញ្ហា​នោះ​​​ហើយ​​​ ប៉ុន្តែ​យើង​មិន​អាច​និយាយ​ថា តើ​​​នឹង​​​ជួស​​​ជុល​​​រួច​​​នៅ​​​ពេល​​​ណា​​​នោះ​​​ទេ​​​​។ យើង​មិន​បណ្ដោយ​ឲ្យ​យូរ​បាន​ឡើយ​ ពីព្រោះ​យើង​ដឹង​ថា​​វា​ប៉ះពាល់​​ដល់​អ្នក​ទោស​”។

កម្មករ​ជួសជុលផ្លូវ​​ទៅ​កាន់​ពន្ធនាគារ​ព្រៃ​ស​បាន​និយាយ​ថា ក្រុម​ហ៊ុន​ TSR បាន​ជួល​ពួក​គេ​ ហើយ​បានទទួល​ស្គាល់​ថា បាន​​​ធ្វើ​​​ឲ្យ​​​ទុយោទឹក​​បែក​ប្រហែល​១០​ថ្ងៃ​កន្លង​​​មក​ហើយ​។

កាលពី​ថ្ងៃ​អង្គារ សន្តិសុខ​ពន្ធនាគារម្នាក់​ដែល​ប្រាប់​ត្រឹម​តែ​ឈ្មោះ​ថា កុសល បាន​មក​ដល់​កន្លែង​ដែល​បែក​ទុយោ​នោះដើម្បី​បូមទឹក​ដាក់​រថយន្ត​ដឹកទឹក។ លោក​បាន​និយាយ​ថា ការ​ចែក​ទឹក​​កំពុង​​​បង្ក​​​ឲ្យ​​​មាន​​​បញ្ហា​នៅ​ពន្ធនាគារ​ ប៉ុន្តែ​លោក​បាន​បដិសេធ​មិន​និយាយ​លម្អិត​ទេ។

បន្ទាប់​ពី​លោក​បាន​​ចេញដំណើរ​​ទៅ លោក ទុំ ប៉ូឡែន នាយ​ប៉ុស្តិ៍​រង​បាន​មាន​ប្រសាសន៍​ថា “សន្តិ​សុខ​បាន​ប្រាប់​ខ្ញុំ​ថា អ្នក​ទោស​បាន​វ៉ៃ​គ្នា​ដោយសារ​មិន​មាន​ទឹក​គ្រប់​គ្រាន់​នៅ​ក្នុង​ពន្ធ​នាគារ​”៕ សារុន​​​​​​​​

 

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស