32.9 C
Phnom Penh

មន្ទីរ​កិច្ចការ​សង្គម​កិច្ច​បិទ​កម្មវិធី​មណ្ឌល​កុមារ​កំព្រា​ដែល​ប្រជែង​គ្នា

ដោយ ឌឹ ខេមបូឌា ដេលី

បទវិភាគ

មន្ត្រីអធិការ​កិច្ច​មួយ​រូប​បាន​និយាយ​ថា មន្ទីរ​កិច្ចការ​សង្គម​កិច្ច​ក្រុង​ភ្នំពេញ​បាន​បិទ​កម្មវិធី​ស្នាក់​អាស្រ័យ​នៅ​មណ្ឌល​កុមារ​កំព្រា​ពីរ​កន្លែង​ក្នុងខណ្ឌ​មាន​ជ័យ ដោយសារ​តែ​មិន​មាន​លក្ខណ​សម្បត្តិ​គ្រប់គ្រាន់។

លោក យូ សុភក្ត្រ មន្ត្រីអធិការ​កិច្ច​មួយ​រូបនៅ​មន្ទីរ​កិច្ចការ​សង្គម​កិច្ច​បាន​មាន​ប្រសាសន៍​ថា កុមារ​១២​នាក់​ត្រូវ​គេ​នាំ​យក​ចេញ​ពី​ការ​មើល​ថែ​របស់​មណ្ឌល​ទាំង​ពីរ គឺ​មណ្ឌល​កុមារ​កំព្រា​អង្គ​ការសុខាសា​ និងផ្ទះ​កុមា​រកម្ពុជា​ នៅ​សង្កាត់​បឹង​ទំពុន​កាលពី​ថ្ងៃ​ច័ន្ទ បន្ទាប់ពី​មាន​ពាក្យ​បណ្តឹង​ថា ក្មេងៗ​ទាំង​នោះ​មិន​ទទួល​បាន​អាហារ​គ្រប់គ្រាន់​។

លោក សុភក្ត្រ មាន​ប្រសាសន៍​ថា “យើង​បាន​បិទកម្មវិធី​ស្នាក់​នៅ ប៉ុន្តែ​មិន​បាន​បិទ​មណ្ឌល​កុមារ​កំព្រា​ទាំង​ពីរ​ទេ បន្ទាប់ពី​យើង​ទទួល​បាន​ពាក្យ​បណ្តឹង​​នោះ​”។​ លោក សុភក្ត្រ បាន​បន្ថែម​ថា ទោះជា​មាន​ភាព​ធ្ងន់ធ្ងរ​ក្នុង​បណ្តឹង​នោះ​ក៏​ដោយ ក៏ការ​ចោទ​ប្រកាន់ប្រហែល​កើត​ចេញ​ពីរ​ការប្រជែង​គ្នា​រវាង​មណ្ឌល​កុមារ​កំព្រា​ទាំង​ពីរ។ លោក​បាន​ពន្យល់​ថា “អង្គការ​ទាំង​ពីរ​មាន​ជម្លោះ​នឹង​គ្នា ហើយ​អតីត​បុគ្គលិក​ម្នាក់​មក​ពី​អង្គការ សុខាសា​ បាន​បើក​អង្គការ​ថ្មី​មួយ​ផ្សេង​ទៀត ផ្ទះ​កុមារ​កម្ពុជា​”​។

លោក សុភក្ត្រ មាន​ប្រសាសន៍​ថា ម្ចាស់​មណ្ឌល ផ្ទះ​កុមារ​កម្ពុជា​នៅ​ពេល​នោះ​បាន​ប្តឹង​អតីត​ប្រធាន​មណ្ឌល​សុ​ខា​សា​របស់​នាង។

ក្រុម​អធិការ​កិច្ច​សង្គម​កិច្ច​ត្រូវ​បាន​បញ្ជូន​ទៅ​មណ្ឌល​ទាំង​ពីរ ហើយ​បណ្តឹង​ដំបូង​អំពី​កង្វះ​អាហារូបត្ថម្ភ​ដែល​ទំនង​ជា​គ្មាន​មូលដ្ឋាន​បញ្ជាក់​ច្បាស់​លាស់​ទេ តែ​ក្រុម​អធិការ​បាន​រកឃើញគុណ​វិបត្តិ​នៅ​មណ្ឌល​ទាំងពីរទៅ​វិញ​។

លោក សុភក្ត្រ បាន​បន្ថែម​ថា “យើង​បាន​បិទ​កម្មវិធី​នេះ ពីព្រោះអង្គការ​ទាំង​នេះ​មិន​បាន​ថែទាំ​ក្មេងៗឲ្យ​បាន​ល្អ​នោះទេ​។ អង្គការ​ទាំង​ពីរ​ត្រូវ​មាន​បរិយាកាស​ល្អ ប៉ុន្តែ​មណ្ឌល​របស់​ពួកគេ​ជា​ផ្ទះ​ល្វែង ហើយ​មិន​មាន​ខ្យល់​ចេញ​ចូល​ល្អ​ឡើយ”។

លោក សុភក្ត្រ មាន​ប្រសាសន៍​ថា កុមារ​មាន​អាយុ​ពី​៨​ឆ្នាំ​ដល់​១៨​ឆ្នាំ កុមារ​៨​នាក់​ក្នុង​ចំណោម​ពួកគេ​មកពី​មណ្ឌល សុខាសា​ និង​៤​នាក់​មកពី ផ្ទះ​កុមារ​កម្ពុជា​ ត្រូវ​គេ​បញ្ជូន​ទៅ​អង្គការ​មិនមែន​រដ្ឋាភិបាល​មួយ​ផ្សេងទៀត គឺអង្គការ​ម្លប់​ឫស្សី ដែលផ្តោត​លើ​ការ​បញ្ចូល​​កុមារ​ក្រីក្រ​ឲ្យ​ទៅ​រស់​នៅ​ក្នុង​ផ្ទះ​របស់​ពួកគេ​វិញ។

លោក​ស្រី ឃិន ភក្តី នាយក​គម្រោង​នៅ​អង្គការម្លប់​ឫស្សី បាន​មាន​ប្រសាសន៍​ថា ក្មេង​៤​នាក់​ចំណោម​១២​នាក់​នោះ មិន​មែន​ជា​កុមារ​កំព្រា​ទេ​ ហើយ​ត្រូវ​បាន​បញ្ជូន​ទៅ​ឲ្យ​ជួបជុំ​ឪពុក​ម្តាយ​របស់​ពួកគេ​អស់​​ហើយ។ លោក​ស្រី​បាន​មាន​ប្រសាសន៍​ថា “យើង​បាន​បញ្ជូន​កុមារ​កំព្រាខ្លះ​ទៅ​ឲ្យ​ក្រុម​គ្រួសារ​របស់​ពួកគេ​វិញ​ តែ​នៅសល់​កុមារ​កំព្រា​៨​នាក់​ទៀត”។

លោក​ស្រី ម៉េង បុប្ផា ម្ចាស់​មណ្ឌល​ សុខាសា​ បាន​មាន​ប្រសាសន៍​ថា ការ​ចោទ​ប្រកាន់​ត្រូវ​បាន​ប្រឌិត​ឡើង​​ដោយ​អតីត​បុគ្គលិក​របស់​លោក​ស្រី ដើម្បី​​បង្ខូច​កេរ្តិ៍​ឈ្មោះ​មណ្ឌល​កុមារ​កំព្រា​របស់​លោក​ស្រី។ លោក​ស្រី បុប្ផា មាន​ប្រសាសន៍​អំពី​គូ​ប្រជែង​របស់​លោក​ស្រី​ថា “វា​ជា​ជម្លោះ​ផ្ទៃ​ក្នុង។ នាង​ចង់ធ្វើ​ឲ្យ​មណ្ឌល​របស់ខ្ញុំ​មាន​ការ​ក្តៅ​ក្រហាយ”។ “នាង​ដឹង​គ្រប់​យ៉ាង​អំពី​ប្រភព​អំណោយ​ក្នុង​អង្គការ​របស់​ខ្ញុំ ហើយ​នាង​បាន​អូសទាញ​ក្មេង​មួយ​ចំនួន​ពី​អង្គការ​របស់​ខ្ញុំ​ទៅ​អង្គការ​ថ្មី​របស់​នាង”៕មានិត

 

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស