40.5 C
Phnom Penh

ក្រសួង​នឹង​រឹត​បន្តឹង​ការ​ត្រួត​ពិនិត្យ​​លើ​ជន​បរទេស​ដែល​មក​ធ្វើ​ការ​នៅ​កម្ពុជា​

ដោយ ឌឹ ខេមបូឌា ដេលី

បទវិភាគ

កាលពី​ម្សិលមិញ ក្រសួង​ការ​ងារ​​ និង​ក្រសួង​មហាផ្ទៃ បានជួប​ប្រជុំគ្នា​ដើម្បី​បង្ហាញ​ពី​ផែន​ការ​របស់​រដ្ឋាភិបាល​ក្នុង​ការ​អនុវត្ត​វិធានការ​តឹងរ៉ឹង​ជាង​មុន​លើ​និយោជក​ដែល​មាន​ជន​​បរទេស​ធ្វើ​ការ​ ដើម្បី​ធានា​ថា បុគ្គលិក​របស់​ពួក​គេ​មាន​ឯកសារ​គ្រប់​គ្រាន់​។

លោក​ សេង សក្កដា អគ្គនាយក​នៃ​អគ្គនាយកដ្ឋាន​ការ​ងារ​នៃ​ក្រសួង​ការ​ងារ បាន​មាន​ប្រសាសន៍​ថា ការ​ខិត​ខំ​ប្រឹង​ប្រែង​ពី​​មុនៗ​គ្មាន​ប្រសិទ្ធភាព​ទេ​​នៅ​ក្នុង​ការ​ធានា​ថា ជន​បរទេស​ត្រូវ​បាន​ចុះ​បញ្ជី និង​ធ្វើការ​ដោយ​មាន​លិខិត​ស្នាម​ត្រឹម​ត្រូវ​។ លោក​បាន​បន្តថា “យើង​ចាំបាច់​ត្រូវ​ផ្ដោត​​​ការ​​​​យក​ចិត្ត​ទុក​ដាក់​លើ​ការ​ពិន័យ​ជន​បរទេស​​ទាំង​អស់​ដែល​មក​ធ្វើការ​នៅ​កម្ពុជា​ និង​ដែល​​គ្មាន​កាត​ការ​ងារ​”។ លោក​បាន​លើក​ឡើង​ទៀត​ថា ចំនួន​ជនបរទេស​ដែល​ចូល​មក​កម្ពុជា​នៅ​ឆ្នាំ​នេះ​​​ បាន​លើស​ចំនួន​៨.០០០​នាក់​កាលពី​ឆ្នាំ​មុន​រួច​ទៅ​ហើយ​។

សេចក្ដី​ថ្លែង​ការណ៍​រួម​មួយ​​ដែល​ត្រូវ​បាន​ចុះ​ហត្ថលេខា​​កាលពី​ថ្ងៃ​សៅរ៍ និង​​ត្រូវ​បាន​បង្ហាញ​នៅ​ក្នុង​កិច្ច​ប្រជុំ​កាលពី​ម្សិលមិញ​លើក​ឡើង​ថា ស្ថាប័ននានា​ដែល​ទទួល​ជន​បរទេស​ឲ្យ​ធ្វើការ​មាន​កាតព្វកិច្ច​អនុវត្ត​ច្បាប់​ពាក់​ព័ន្ធ​ ដោយធានា​ថា និយោជិត​មាន​ទិដ្ឋាការ​ពាក់​ព័ន្ធ​ លិខិត​ឆ្លង​ដែន និង​កាត​ការ​ងារ​ ដើម្បី​សម្រួល​ដល់​ការ​ងារ​របស់​ក្រុម​អធិការកិច្ច​។

លោក សុខ ផល អគ្គនាយក​នៃ​អគ្គនាយកដ្ឋាន​អន្តោប្រវេសន៍​នៃ​ក្រសួង​មហាផ្ទៃ​ បាន​មាន​ប្រសាសន៍​ថា ចាំបាច់​ត្រូវ​ចាត់វិធានការ​បន្ថែម​ទៀត​ដើម្បី​​ធានា​ថា អ្នកដែល​មក​ប្រទេស​កម្ពុជា​ដើម្បី​ធ្វើការ​បង់​ពន្ធ​។

​លោក​បាន​មាន​ប្រសាសន៍​កាលពីម្សិលមិញ​ថា “ការ​កើន​ឡើង​ចំនួន​ជនបរទេស​ដែល​មក​ធ្វើការ​ ធ្វើ​ជំនួញ​ និង​រក​ប្រាក់​នៅក្នុង​ប្រទេស​កម្ពុជា​មាន​​កាតព្វកិច្ច​បង់ពន្ធ​។ នៅ​តាម​បណ្ដោយ​ព្រំដែន​វៀតណាម និង​ថៃ ពួកគេ​មិន​ដែល​បង់ពន្ធ​ទេ ហើយ​បើ​យើង​មិន​ចាត់​វិធាន​ការ​ទេនោះ​ វា​នឹង​បន្ត​កើន​ឡើង​”។

លោក​បាន​មាន​ប្រសាសន៍​បន្ថែម​ទៀត​​នៅ​ក្នុង​កិច្ច​ប្រជុំ​​នោះ​ថា អ្នក​ធ្វើ​ការ​ដែល​គ្មាន​​​​ឯកសារ​ត្រឹម​ត្រូវ​ អាច​នឹង​ទទួល​ការ​ពិន័យ​ជា​ប្រាក់​៥០០.០០០​រៀល​ ឬ​ប្រហែល​១២៥​ដុល្លារ ឬ​ត្រូវ​បណ្ដេញ​ចេញ​ពី​ប្រទេស​តែ​ម្ដង​។ លោក​បាន​លើក​ឡើង​បន្ត​ថា “ប្រសិន​បើ​ពួកគេ​ជា​ជន​បរទេស​ដែល​ធ្វើការ​នៅ​កន្លែង​ណា​មួយ​ ពួកគេ​ត្រូវ​មាន​លិខិត​ឆ្លង​ដែន និង​ប័ណ្ណ​សម្គាល់​ខ្លួន​សម្រាប់​ធ្វើការ​។ ប្រសិន​បើពួកគេ​គ្មាន​ទេ យើង​នឹង​អនុវត្ត​ច្បាប់​អន្តោ​ប្រវេសន៍ ហើយអាច​ស្នើ​សុំ [លោក​ ស ខេង រដ្ឋមន្ត្រី​ក្រសួង​មហាផ្ទៃ​] បណ្ដេញពួក​គេ​ចេញ​តែ​ម្ដង​”៕ សុខុម​​​​​​​​​​​​​​​

 

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស