កាលពីម្ស្ិលមិញ លោកនាយករដ្ឋមន្ត្រី ហ៊ុន សែន បានប្រកាសផែនការបីដំណាក់កាលដើម្បីដំឡើងប្រាក់ខែដល់មន្ត្រីរាជការ ដែលធ្វើការក្រោមក្រសួងអប់រំ និងក្រសួងសុខាភិបាល ដោយការដំឡើងប្រាក់ខែជំហានដំបូងនឹងត្រូវធ្វើឡើងនៅខែកញ្ញា។
ថ្លែងទៅកាន់និស្សិតបញ្ចប់ការសិក្សានៅសាកលវិទ្យាល័យ ប៊ែលធី ក្នុងរាជធានីភ្នំពេញ លោក ហ៊ុន សែន បានលើកឡើងថា ប្រាក់ខែគោលសម្រាប់គ្រូបង្រៀននឹងត្រូវដំឡើងចាប់ពីប្រហែល១០៥ដុល្លារ រហូតដល់ប្រហែល១៣៨ដុល្លារត្រឹមខែមេសា ឆ្នាំក្រោយ។
លោក ហ៊ុន សែន បានមានប្រសាសន៍ថា “ដោយចាប់ផ្ដើមនៅក្នុងខែកញ្ញា [ ប្រាក់ខែរបស់គ្រូបង្រៀន] នឹងត្រូវដំឡើងដល់ ៥០៥.០០០រៀល [ ប្រហែល១២៦ដុល្លារ ] ហើយចន្លោះពីខែមករា ដល់ខែមីនា ប្រាក់ខែនឹងត្រូវដំឡើងដល់៥០៧.០០០រៀល ហើយនៅខែមេសានឹងត្រូវដំឡើងដល់៥៥២.៨០០រៀល [ ប្រហែល១៣៨ដុល្លារ ] នេះគឺសម្រាប់អ្នកដែលមានប្រាក់ខែទាបបំផុត”។
លោក ហ៊ុន សែន បានមានប្រសាសន៍បន្ថែមថា “ប្រាក់ខែខ្ពស់បំផុតគឺ១.៦៦៧.០០០រៀល [ ប្រហែល៤១០ដុល្លារ ] ប៉ុន្តែ សូមមេត្តាយោគយល់។ យើងមិនទាន់អាចដំឡើងបានទេ។ យើងចាំបាច់ត្រូវពិភាក្សាគ្នាបន្ថែមទៀត”។
នៅពេលប្រាក់ខែគ្រូបង្រៀននឹងត្រូវដំឡើងចាប់ពីខែក្រោយនោះ លោកនាយករដ្ឋមន្ត្រីបានលើកឡើងថា ពេលវេលា នឹងការដំឡើងប្រាក់ខែសម្រាប់មន្ត្រីរាជការបម្រើការក្នុងវិស័យសុខាភិបាលមិនទាន់បានកំណត់នៅឡើយទេ។
លោក ហ៊ុន សែន ក៏បានសូមអភ័យទោសចំពោះកងរាជអាវុធហត្ថ និងមន្ត្រីនគរបាលដែលលោកបាននិយាយថា ប្រាក់ខែរបស់ពួកគេមិនទាន់មានលទ្ធភាពដំឡើងបាននោះផងដែរ។
ប្រាក់ខែសម្រាប់មន្ត្រីរាជការ ដែលរួមមាន គ្រូបង្រៀនប្រមាណ ១១០.០០០នាក់ និងមន្ត្រីប្រមាណ២០.០០០នាក់ទៀត ដែលកំពុងធ្វើការក្រោមក្រសួងសុខាភិបាលនឹងត្រូវចែកជាបីកម្រិតមិនមែនបួនកម្រិតនោះទេ។
គ្រូបង្រៀនបានទាមទារដំឡើងប្រាក់ខែ បន្ទាប់ពីកម្មកររោងចក្រកាត់ដេរធ្វើកូដកម្មទ្រង់ទ្រាយធំទាមទារដំឡើងប្រាក់ខែកាលពីខែធ្នូ និងខែមករា ។ នៅពេលនោះសមាគមគ្រូបង្រៀនកម្ពុជាឯករាជ្យ (CITA) និងគណបក្សសង្គ្រោះជាតិបានបើកយុទ្ធនាការទាមទារឲ្យមានការដំឡើងប្រាក់ខែ២៥០ដុល្លារដល់គ្រូបង្រៀន ប៉ុន្តែ លោក ហង់ ជួន ណារ៉ុន រដ្ឋមន្ត្រីក្រសួងអប់រំបានមានប្រសាសន៍ថា វាមិនអាចទៅរួចទេ បើយោងតាមថវិកាសព្វថ្ងៃ។
លោក រ៉ុង ឈុន ប្រធានសមាគមគ្រូបង្រៀនកម្ពុជាឯករាជ្យដែលមានសមាជិកជាង១០.០០០នាក់បានស្វាគមន៍ចំពោះការប្រកាសរបស់លោកនាយករដ្ឋមន្ត្រីកាលពីម្សិលមិញ ប៉ុន្តែ លោកបានលើកឡើងថា ការដំឡើងនេះមិនទាន់គ្រាប់គ្រាន់ទេ។
លោក រ៉ុង ឈុន បានមានប្រសាសន៍ថា “ខ្ញុំសង្ឃឹមថា រដ្ឋាភិបាលនឹងដំឡើងដល់១លានរៀល [ ប្រហែល២៥០ដុល្លារ ]។ ប្រសិនបើលោក ហ៊ុន សែន គិតថា ការដំឡើងដល់១លានរៀលវាអាម៉ាស់សម្រាប់លោកដែលធ្វើតាមការស្នើសុំរបស់សមាគមគ្រូបង្រៀនកម្ពុជាឯករាជ្យ និងគណបក្សសង្គ្រោះជាតិនោះ អ៊ីចឹងលោកអាចដំឡើងដល់១,២លានរៀល”៕គឹមហឿន