27 C
Phnom Penh

ជនជាតិ​អាហ្វ្រិក​ដែល​ធ្វើ​លិខិត​ឆ្លងដែន​ក្លែងក្លាយ​នឹង​ត្រូវ​និរទេស

ដោយ ឌឹ ខេមបូឌា ដេលី

បទវិភាគ

យោងតាម​លោក អ៊ុក ហៃសិលា ប្រធាន​នាយកដ្ឋានស៊ើបអង្កេតនិងនីតិវិធីនៃអគ្គ​នាយក​ដ្ឋាន​អន្តោ​ប្រវេសន៍ ក្រសួង​មហាផ្ទៃ​បាន​ឲ្យ​ដឹង​ថា បុរស​ជនជាតិ​អាហ្វ្រិក​៩​នាក់​ដែល​នគរបាល​អន្តោប្រវេសន៍​ឃុំ​ខ្លួន​នៅ​ដើម​សប្តាហ៍​នេះ ព្រោះ​បាន​ធ្វើ​លិខិត​ឆ្លងដែន​និង​ទិដ្ឋាការ​ក្លែង​ក្លាយ​នោះ នឹង​ត្រូវ​និរទេស​ចេញ​ពី​ប្រទេស​កម្ពុជា។

លោក ហៃសិលា មាន​ប្រសាសន៍​ថា “យើង​នឹង​បណ្តេញ​ពួកគេ​ចេញ​ពី​ប្រទេស​កម្ពុជា ពីព្រោះ​ពួកគេ​បាន​រំលោភ​ច្បាប់​អន្តោ​ប្រវេសន៍​កម្ពុជា ព្រោះ​បាន​ធ្វើ​លិខិត​ឆ្លងដែន​ក្លែងក្លាយ​នៅ​ក្នុង​ប្រទេស​កម្ពុជា”។

បន្ទាប់ពី​បាន​ទទួល​ដំណឹងពី​អាជ្ញាធរ​មូលដ្ឋាន​នៅ​សង្កាត់ បឹងទំពុន ខណ្ឌ​មាន​ជ័យ នគរបាល​អន្តោប្រវេសន៍ បាន​ឃាត់​ខ្លួន​បុរស​ទាំង​៩​នាក់​នោះ ដែល​មកពី​ប្រទេសនីហ្សេរីយ៉ា ស៊ីរ៉ាលីអូន និង​ប្រទេសហ្គីណេ កាលពី​យប់​ថ្ងៃ​អង្គារ។

លោក ហៃសិលា មាន​ប្រសាសន៍​ថា “បន្ទាប់ពី​យើង​បាន​សាកសួរ​ជន​បរទេស​ទាំង​នេះ យើង​ក៏​បាន​រកឃើញ​ថា ទិដ្ឋាការ​របស់​ពួកគេ​ក៏​ហួស​សុពលភាព​ដែរ”។ លោក​បាន​បន្ថែម​ថា ក្រុម​នេះ​ក៏​បាន​លក់​ឯកសារ​ខុស​ច្បាប់​ឲ្យ​ជន​បរទេស​ផ្សេង​ទៀត​ដែរ។

លោក ហៃសិលា បាន​ឲ្យ​ដឹង​ទៀត​ថា គេ​រំពឹង​ថា បុរស​ទាំង​៩​នាក់​នេះ​នឹង​ចំណាយ​ថ្លៃ​ជិះ​យន្តហោះ​ដោយ​ខ្លួន​ឯង ហើយ​ប្រសិនបើ​ពួកគេ​មិន​អាច​ចំណាយ​បាន​ទេ​នោះ អាជ្ញាធរ​នឹង​ទាក់ទង​ស្ថានទូត​របស់​ពួកគេ​ឲ្យ​ជួយ៕មានិត

 

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស