29 C
Phnom Penh

គណៈ​​​ប្រតិភូ​​​ជប៉ុន​​​ផ្ដល់​​​ជំនួយសម្រាប់​ការ​ធ្វើ​កំណែ​​​ទម្រង់​​​ការ​​​បោះ​​​ឆ្នោត​​​

ដោយ ឌឹ ខេមបូឌា ដេលី

បទវិភាគ

កាល​​​ពី​​​ថ្ងៃ​​​សុក្រ ក្នុង​​​ជំនួប​​​ពិភាក្សា​​​ការងារ​​​ជាមួយ​​​លោក ហេង សំរិន ប្រធាន​​​រដ្ឋ​​​សភា​​​ និង​​​ក្រុម​​​មេ​​​ដឹក​​​នាំ​​​គណបក្ស​​​សង្គ្រោះ​​​ជាតិ មន្ត្រី​​​រដ្ឋាភិបាល​​​ជប៉ុន​​​ជាន់​​​ខ្ពស់​​​មួយ​​​រូប​​​បាន​​​ផ្ដល់​​​ជំនួយ​​​ក្នុង​​​ការ​​​ធ្វើ​​​កំណែ​​​ទម្រង់​​​ប្រព័ន្ធ​​​បោះ​​​ឆ្នោត​​​របស់​​​ប្រទេស​​​កម្ពុជា ដែល​​​សព្វ​​​ថ្ងៃ​​​គ្រប់​​​គ្រង​​​ដោយ​​​​​​គណបក្ស​​​ប្រជា​​​​​​ជន​​​កម្ពុជា​​​កំពុង​​​កាន់​​​អំណាច។

សមាជិក​​​សភា​​​ជប៉ុន​​​ពីរ​​​រូប​​​ផ្សេង​​​ទៀត​​​​បាន​​​អម​​​ដំណើរ​លោក អាស៊ូម៉ា កូស៊ីអីុស៊ី (Azuma Koshiishi) អនុ​​​ប្រធាន​​​ព្រឹទ្ធ​​​សភា​​​ជប៉ុន​​​ ​​ក្នុង​​​ពេល​​​មក​​​បំពេញ​​​ទស្សន​​​​​​កិច្ច​​​នេះ។ ទស្សនកិច្ច​នេះ​ធ្វើ​​​ឡើង​​​បន្ទាប់​​​ពី​​​គណៈប្រតិភូ​​​ជប៉ុន​​​មួយ​​​ក្រុម​​​មាន​​​សមាជិក​​​១០​​​រូប បាន​​​មក​​​​​កាល​​ពី​​​ខែ​ឧសភា ដើម្បី​​​សិក្សា​​​ចង់​​​ដឹង​​​ថា ខ្លួន​​​អាច​​​ជួយ​​​សម្រប​​​សម្រួល​​​កំណែ​​​ទម្រង់​​​បោះ​​​ឆ្នោត​​​ដោយ​​​របៀប​​​ណា​​ បន្ទាប់​​​ពី​​​ការ​​​បោះ​​​ឆ្នោត​​​ដ៏​​​ចម្រូង​​​ចម្រាស​​​កាល​​​ពី​​​ឆ្នាំ​​​មុន។

លោក សម រង្ស៊ី ប្រធាន​​​គណបក្ស​​​សង្គ្រោះ​​​ជាតិ បាន​​​មាន​​​ប្រសាសន៍​​​ថា  បើ​​​ទោះ​​​ជា​លោក​នាយក​​​រដ្ឋ​​​មន្ត្រី​​​ ហ៊ុន សែន បាន​​​ស្នើ​​​​​​សុំ​​​ជំនួយ​​​ជប៉ុន​​​មុន​​​គេ​​​ក្នុង​​​ដំណើរ​​​ការ​​កំណែ​​​ទម្រង់​​​ប្រព័ន្ធ​​​បោះ​​​ឆ្នោត​​​នេះ​​​ក៏​​​ដោយ ក៏​​​បក្ស​​​ប្រឆាំង​​​សប្បាយ​​​រីករាយ​​​ក្នុង​​​ការ​​​មាន​​​ជំនួយ​​​នេះ​​​ដែរ​​​។

ដោយ​​​បន្ថែម​​​ថា ប្រទេស​​​កម្ពុជា​​​អាច​​​រៀន​​​សូត្រ​​​បាន​​​ច្រើន​​​ពី​​​ប្រទេស​​​ជប៉ុន​​​តាម​​​រយៈ​​​ជំនាញ​​​បច្ចេក​​​ទេស​​​របស់​​​ជប៉ុន​​​ក្នុង​​​ការ​​​រៀប​​​ចំ​​​ចុះ​​​ឈ្មោះ​និង​​​ដំណើរ​​​ការ​​​បោះ​​​ឆ្នោតនោះ លោក​​​បាន​​​មាន​​​ប្រសាសន៍​​​ថា “យើង​​​បាន​​​ស្នើ​​​ឲ្យ​ប្រទេស​​​ជប៉ុន​​​ជួយ​​​ត្រួត​​​ពិនិត្យ​​​ដំណើរ​​​ការ​​​នៃ​​​ស្ថាន​​​ការណ៍​​​នយោ​​​បាយ​​​នៅ​​​ប្រទេស​​​កម្ពុជា​​​”។ លោក សម រង្ស៊ី មាន​​​ប្រសាសន៍​​​ថា “ជា​​​ពិសេស​​​ប្រព័ន្ធ​​​អេឡិចត្រូនិក​​ដែល​​​ត្រូវ​​​ការ​​​សម្រាប់​​​ការ​​​ចុះ​​​ឈ្មោះ និង​​​ការ​​​បោះ​​​ឆ្នោត​​​នេះ ប្រសិន​​​បើ​​​យើង​​​ប្រើ​​​ប្រព័ន្ធ​​​នោះ​​​នា​​​ពេល​​​ក្រោយ”។

លោក កឹម សុខា អនុ​​​ប្រធាន​​​គណបក្ស​​​សង្គ្រោះ​​​ជាតិ​​​បាន​​​មាន​​​ប្រសាសន៍​​​ថា គណៈ​​​ប្រតិភូ​​​ជប៉ុន​​​បាន​​​បង្ហាញ​​​​​​ការ​​​ចាប់​​​អារម្មណ៍​​​របស់​​​ខ្លួន​​​ក្នុង​​​ការ​​​ផ្ដល់​​​ជំនួយ ​​​នៅ​​​ពេល​​​ណា​​​គណបក្ស​​​សង្គ្រោះ​​​ជាតិ​​​ និង​​​គណបក្ស​​​ប្រជា​​​ជន​​​កម្ពុជា​​​បញ្ចប់​​​កំណែ​​​ទម្រង់ ក្នុង​​​នោះ​​​មាន​​​ទាំង​​​ការ​​កែ​​​ទម្រង់​​​គណៈកម្មាធិការ​​​ជាតិ​​​រៀបចំ​​​ការ​​​បោះ​​​ឆ្នោត​​​ទាំង​​​ស្រុង និង​​​ច្បាប់​​​បោះ​​​ឆ្នោត​​​ថ្មី​ ដែល​​​បាន​​​ព្រម​​​ព្រៀង​​​គ្នា​​​ក្នុង​​​កិច្ច​​​ព្រម​​​ព្រៀង​​​មួយ​កាល​​​ពី​​​ខែ​​​កក្កដា​​​រវាង​​​លោក​​​ ហ៊ុន សែន និង​​​លោក សម រង្ស៊ី ។

លោក កឹម សុខា បាន​​​មាន​​​ប្រសាសន៍​​​ថា “គេ​​​បាន​​​និយាយ​​​ថា ប្រសិនបើ​​​គណបក្ស​​​សង្គ្រោះ​​​ជាតិ​​​មាន​​​អំណាច​​​ច្រើន​​​ដូច​​​នេះ​​​ ក្នុង​សភា​​​ជាតិ យើង​​​អាច​​​មាន​​​តុល្យ​​​ភាព​​​ក្នុង​​​ស្ថាប័ន​​​រដ្ឋ​​​ ជា​​​ពិសេស​​​អំណាច​​​នីតិប្បញ្ញត្តិ នីតិ​​​ប្រតិបត្តិ និង​​​តុលាការ”។

លោក កែវ ពិសិដ្ឋ នាយក​​​ខុទ្ទកាល័យ​​​របស់​​​លោក ហេង សំរិន មាន​​​ប្រសាសន៍​​​ថា ទស្សន​កិច្ច​​​របស់​​​លោក​​​  កូស៊ីអីុស៊ី នឹង​​​ជួយ​​​ពង្រឹង​​​​​​កិច្ច​​​សហប្រតិបត្តិការ​​​រវាង​​​ប្រទេស​​​ទាំង​​​ពីរ​​​។

យោង​​​តាម​​​ លោក ពិសិដ្ឋ ឲ្យ​​​ដឹង​​​ថា លោក  កូស៊ីអីុស៊ី បាន​​​ប្រាប់​​​លោក​​​ ហេង សំរិន​​​ ថា “ខ្ញុំ​​​សូម​​​វាយ​​​​​​តម្លៃ​​​ខ្ពស់​​​ ដែល​​​ចាប់​​​តាំង​​​ពី​​​ការ​​​បោះ​​​ឆ្នោត​​​ឆ្នាំ​​​មុន​​​មក​ គណបក្ស​​​ប្រជា​​​ជន​​​កម្ពុជា និង​​​គណបក្ស​​​សង្គ្រោះ​​​ជាតិ​​​បាន​​​និង​​​កំពុង​​​សហ​​​ការ​​​គ្នា​​​​​​​​​​​​​​​​​​​​​ ដើម្បី​​​គោល​​​ដៅ​​​នយោបាយ​​​រួម​​​ ហើយ​​​ការ​​​​​​ធ្វើ​​​ការ​​​រួម​​​គ្នា​​​ក្នុង​​​សភា មាន​​​ន័យ​​​ថា ​​​​​​ជា​​​ជំហាន​​​ថ្មី​​​មួយ​​​សម្រាប់​​​លទ្ធិ​​​ប្រជា​​​ធិបតេយ្យ​​​នៅ​​​ប្រទេស​​​កម្ពុជា​​​”។

សមាជិក​​​សភា​​​គណបក្ស​​​ប្រជា​​​ជន​​​កម្ពុជា និង​​​គណបក្ស​​​សង្គ្រោះ​​​ជាតិ​​​មាន​​​គម្រោង​​​ជួប​​​ប្រជុំ​​​​​​នៅ​​​សភា​​​ជាតិ​​​នា​ថ្ងៃ​​​អង្គារ​​​ ដើម្បី​​​បោះ​​​ឆ្នោត​​​ជ្រើស​​​រើស​​​ថ្នាក​​​់ដឹក​​​នាំ​​​សភា​​​ថ្មី​​​ និង​​​ប្រធាន​​​​​​គណៈ​កម្មការ​​​សភា​​​ចំនួន​​​១០​​​ ដែល​​​នឹង​​​ត្រូវ​​​បែង​​​ចែក​​​រវាង​​​គណបក្ស​​​ជាប់​​​ឆ្នោត​​​ទាំង​​​ពីរ​​​៕មានិត​​

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស