26 C
Phnom Penh

អ្នក​ភូមិខេត្ត​កំពង់​ចាម​ដាក់​ញត្តិ​ប្រឆាំង​ការ​តែងតាំង​ប្រធាន​ភូមិ​ថ្មី

ដោយ ឌឹ ខេមបូឌា ដេលី

បទវិភាគ

អ្នក​ភូមិ​ប្រហែល​១០០គ្រួសារ​មកពី​ភូមិ​មួយ​ក្នុង​ស្រុក​ព្រៃ​ឈរ ខេត្តកំពង់ចាម បាន​ដាក់​ញត្តិ​ទៅ​មេឃុំ​របស់​ខ្លួន​កាលពី​សប្ដាហ៍មុន តវ៉ា​ចំពោះការ​តែង​តាំង​បុរស​ម្នាក់​ដែល​ត្រូវ​បាន​ចោទប្រកាន់ថា បាន​លួច​ត្រី​ឲ្យ​ធ្វើ​​ជា​ប្រធាន​ភូមិរបស់​ពួកគាត​់​។

លោក ហ៊ុយ វណ្ណថន អាយុ​៤៦​ឆ្នាំ ជា​តំណាង​អ្នក​ភូមិ​បាន​និយាយ​ថា ញត្តិ​ដែល​​មាន​ស្នាម​មេ​ដៃ​អ្នក​ភូមិ​១១៩​គ្រួសារ​ត្រូវ​បាន​ដាក់​ជូនទៅ​សាលា​ឃុំមៀន កាលពី​ថ្ងៃ​ព្រហស្បតិ៍ បន្ទាប់​ពី​ការ​តែង​តាំង​លោក ស៊ិន ហឿន ជា​ប្រធាន​ភូមិ​កេស។

លោក វណ្ណថន ដែលបាន​បន្ថែម​ថា ក្រុមអ្នកភូមិ​បាន​ប្រមូល​ផ្ដុំគ្នា​កាលពី​ម្សិលមិញ ដើម្បី​ពិភាក្សា​ពី​ការ​តែង​តាំង​លោក ហឿន នោះបាន​និយាយ​​ថា ​”ភូមិ​ចង់​ឲ្យ​ជ្រើស​រើស​ប្រធានភូមិ​ថ្មីឡើង​វ​ិញ ឃុំ​បានជំទាស់​មិនព្រម​ធ្វើ​តាម​សំណើរបស់​អ្នកភូមិ​ឡើយ​” ​។

លោក ធឹម ពឿ អាយុ​៤៣​ឆ្នាំ​ជា​អ្នក​ភូមិ​ម្នាក់​ទៀត​បាន​និយាយ​ថា លោក ហឿន ត្រូវ​គេ​ដឹង​ឮថា បាន​លួច​ត្រីជាច្រើន​​អំឡុង​ពេល​ដែល​លោក​ធ្វើ​ជា​អ្នក​​សម្រប​សម្រួល​សហគមន៍​នេសាទ​ក្នុង​មូលដ្ឋាន​។ លោក ពឿ បាន​និយាយ​ថា “ខ្ញុំ​ស្គាល់​លោក ហឿន ច្បាស់​នៅ​ពេល​ដែល​គាត់​ជា​អតីត​ប្រធាន​សហគមន៍​នេសាទ​ គាត់​បាន​លួចត្រី​ជាច្រើន​សម្រាប់​ក្រុម​គ្រួសារ​របស់​គាត់​”។

លោក​បាន​បន្ថែម​ថា “ខ្ញុំជឿ​ថា លោក ហឿន មិន​សម​ធ្វើ​ជា​ប្រធានភូមិ​ទេ​ ពីព្រោះ​នៅ​ពេល​គាត់​ជា​ប្រធាន​សហគមន៍​នេសាទ​ គាត់​បាន​លួច​ត្រី​ជាច្រើន​ ហើយគាត់​នឹង​​ធ្វើ​សកម្ម​ភាព​ធ្ងន់ធ្ងរ​ជាង​នេះ​ទៅ​ទៀត​​នៅ​ពេល​ដែល​គាត់​ក្លាយ​ជា​ប្រធានភូមិ​”។

លោក ពឿ បាន​និយាយ​ថា ក្រុម​អ្នកភូមិ​មិន​ទទួល​យក​លោក ហឿន ទេ ប្រសិនបើ​ការ​តែង​តាំង​រូប​គាត់​មិន​ត្រូវ​បាន​ផ្លាស់​ប្ដូរ​ទេ​នោះ ហើយ​បាន​អះអាង​ថា ប្រធាន​ថ្មី​នេះ​បាន​រំលោភ​តួនាទី​របស់​ខ្លួន​រួច​ទៅ​ហើយ។ លោក​បាន​និយាយ​ថា “លោក ហឿន បាន​គំរាម​កំហែង​អ្នក​ភូមិ​ថា គាត់​នឹង​មិន​ចុះ​ហត្ថ​លេខា​​ឲ្យ​អ្នក​ភូមិ​ណា​ដែល​មិន​គាំទ្រ​គាត់​ឲ្យធ្វើ​ជា​ប្រធានភូមិ​ឡើយ​។

លោក ហឿន បាន​មាន​ប្រសាសន៍​ថា លោក​មិន​ដែល​បាន​លួច​ត្រី​ខណៈ​ដែល​លោក​ធ្វើ​ជា​ប្រធាន​សហគមន៍​នេសាទ​ឡើយ ហើយ​បាន​មាន​ប្រសាសន៍​ថា ការ​ចោទ​ប្រកាន់​នេះ​គឺ​ជា​រឿង​ប្រឌិត​។ លោក​បាន​មាន​ប្រសាសន៍​ថា “ក្រុម​អ្នក​ភូមិ​ទាំង​នោះ​មិន​គាំទ្រ​ខ្ញុំ​ ពីព្រោះ​ពួក​គាត់​បាន​ធ្វើ​នេសាទ​ខុស​ច្បាប់ ហើយ​ខ្ញុំ​បាន​ចាប់​ខ្លួន​ពួកគាត់​ពីរ​បី​លើក ហើយ​ដក​ហូត​យក​ឧបករណ៍​នេសាទ​របស់​ពួកគាត់​”។ លោក​បាន​បន្ថែម​ថា “នេះ​គឺ​គ្រាន់​តែ​ជា​ការ​ចោទ​ប្រកាន់​ប៉ុណ្ណោះ។ ពួកគាត់​ច្រណែន​នឹង​ខ្ញុំ ពីព្រោះ​ខ្ញុំ​មាន​ការ​ងារ​ថ្មី​ជា​ប្រធាន​ភូមិ​”។

លោក អ៊ុន តារា មេឃុំ​មៀន​បាន​មាន​ប្រសាសន៍​ថា ប្រធាន​ភូមិ​ថ្មី​នេះ​ត្រូវ​បាន​តែង​តាំង​រួច​ហើយ​ ហើយ​​​មិន​អាច​​មា​ន​ការ​​ផ្លាស់​ប្ដូរ​បាន​​ទេ ពីព្រោះ​ក្រុម​ប្រឹក្សា​ឃុំ​ដែល​ត្រូវ​បានជ្រើស​រើស​រួច​បាន​​ជួប​ពិភាក្សា​​ និង​អនុម័ត​រួច​ហើយ។

លោក​បាន​មាន​ប្រសាសន៍​ថា “យើង​ដាក់​បេក្ខជន​បី​នាក់​សម្រាប់​ការ​ជ្រើស​រើស​ជា​ប្រធាន​ភូមិ​ រួម​​មាន​​អតីត​អនុប្រធានភូមិ​ សមាជិកភូមិ និង​ប្រធាន​សហគមន៍​នេសាទ​”។ លោក​ តារា បានពន្យល់​ថា លោក សន សឿន អតីត​មេភូមិ​បាន​ស្លាប់​ក្នុង​អាយុ​៦០​ឆ្នាំ​កាលពី​ថ្ងៃ​​ទី​១៤ ខែ​សីហា ហើយ​ច្បាប់​តម្រូវ​ឲ្យ​ជ្រើស​រើស​ប្រធាន​ភូមិ​ថ្មី​ក្នុង​រយៈពេល​មួយ​សប្ដាហ៍​។ លោក​បាន​មាន​ប្រសាសន៍​ថា ដោយអនុវត្ត​តាម​ច្បាប់នេះ ក្រុម​ប្រឹក្សា​ឃុំ​បាន​ជួប​ប្រជុំ​គ្នា និង​ជ្រើស​រើស​លោក​ ហឿន។

លោក​បាន​មាន​ប្រសាសន៍​ថា “សមាជិក​ប្រាំបួន​រូប​មក​ពី​គណបក្ស​ប្រជា​ជន​កម្ពុជា គណបក្ស​ សម រង្ស៊ី និង​គណបក្ស​ នរោត្តម រណឫទ្ធិ បាន​ចូល​រួម​កិច្ច​ប្រជុំ​នោះ ប៉ុន្តែ​មាន​តែ​សមាជិក​ប្រាំរូប​ប៉ុណ្ណោះ​មកពី​គណបក្ស​ប្រជា​ជន​កម្ពុជា​គាំទ្រ​លោក​ ហឿន។ យើង​មិន​អាច​​ផ្លាស់​ប្ដូរទេ ពីព្រោះ​យើង​បាន​សម្រេច​រួច​ហើយ”៕ សារុន​​​​​

 

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស