អ្នកស្រុកកំពង់ឆ្នាំងមួយក្រុមដែលតស៊ូដើម្បីដីធ្លីជាមួយភរិយារបស់លោក ស៊ុយ សែម រដ្ឋមន្ត្រីក្រសួងរ៉ែនិងថាមពល បានដាក់ញត្តិនៅក្រសួងយុត្តិធម៌ និងសភាជាតិកាលពីម្សិលមិញ។ នេះជាសហគមន៍មួយក្នុងចំណោមសហគមន៍៥នៅទូទាំងប្រទេសដែលថ្មីៗនេះបានធ្វើដំណើរមករាជធានីភ្នំពេញ ដើម្បីស្វែងរកជំនួយពីរាជរដ្ឋាភិបាលក្នុងការដោះស្រាយជម្លោះដីធ្លីរបស់ពួកគាត់ដែលកើតមានជាយូរមកហើយ។
អ្នកភូមិឡពាងប្រហែល៧០នាក់មានជម្លោះតាំងពីឆ្នាំ២០០៧ទាក់ទងនឹងដីស្រែជាង១៤៥ហិកតាជាមួយក្រុមហ៊ុន KDC របស់លោកស្រី ជា ខេង ជាភរិយារបស់លោក ស៊ុយ សែម។ ពួកគាត់អំពាវនាវសុំជំនួយពីរដ្ឋាភិបាលដើម្បីបានដីមកវិញ និងសុំឲ្យដោះលែងអ្នកភូមិ៥នាក់ ដែលជាប់ឃុំរង់ចាំការកាត់ក្តីចាប់តាំងពីមានការប៉ះទង្គិចគ្នាជាមួយកម្មករក្រុមហ៊ុន KDC កាលពីខែកក្កដា។
បើទោះជាអ្នកភូមិខេត្តកំពង់ឆ្នាំងបានប៉ះទង្គិចគ្នាជាមួយនគរបាលរាជធានីភ្នំពេញអំឡុងពេលថ្មីៗក្នុងការប៉ុនប៉ងដាក់ញត្តិក្តី ក៏ពួកគាត់បានដើរហែកាត់ក្រុងដោយគ្មានការរំខានទេកាលពីម្សិលមិញ។
ក្រុមអ្នកភូមិប្រហែល៦០នាក់ផ្សេងទៀតដែលមានទំនាស់ដីធ្លីក្នុងខេត្ត៤ផ្សេងទៀតមិនមានសំណាងបែបនេះទេ។
ក្រុមអ្នកភូមិ មកពីខេត្តបាត់ដំបង បន្ទាយមានជ័យ ក្រចេះ និងខេត្តប៉ៃលិន សង្ឃឹមថានឹងដើរហែដាក់ញត្តិទៅសភាជាតិ និងភូមិគ្រឹះនៅក្រុងភ្នំពេញរបស់លោក ហ៊ុន សែន។ ប៉ុន្តែនៅពេលក្រុមនេះប្រុងប្រៀបចាកចេញពីវត្តសាមគ្គីរង្សីក្នុងខណ្ឌមានជ័យ ជាកន្លែងដែលពួកគាត់ស្នាក់នៅ នគរបាលនិងសន្តិសុខខណ្ឌបានមកដល់នៅម៉ោងប្រហែល៨ព្រឹក ហើយរារាំងផ្លូវពួកគាត់មិនឲ្យចាកចេញ។
លោក ហៀង ចាន់លៀង អភិបាលរងខណ្ឌ បានប្រាប់អ្នកភូមិថា “សាលារាជធានីមិនអនុញ្ញាតឲ្យដើរហែទេ ពីព្រោះវានឹងធ្វើឲ្យស្ទះចរាចរណ៍។ ខ្ញុំមកតំណាងឲ្យសាលារាជធានីទទួលយកញត្តិរបស់បងប្អូន ដូច្នេះសូមបងប្អូន កុំឲ្យពិបាកដើរហែអី។ ញត្តិនេះនឹងទៅដល់គោលដៅរបស់វា”។
ដំបូង អ្នកភូមិមានភាពស្ទាក់ស្ទើរមិនចង់បញ្ឈប់ការដើរហែរបស់ខ្លួនទេ។ អ៊ំ សំអុល ជាអ្នកភូមិម្នាក់មកពីខេត្តប៉ៃលិន ដែលមានទំនាស់ដីធ្លីជាមួយក្រុមហ៊ុនឯកជនមួយតាំងពីឆ្នាំ២០១០ បាននិយាយថា “យើងធ្លាប់បានឃើញអាជ្ញាធរទទួលញត្តិរបស់យើងហើយមិនដែលឆ្លើយតបមកវិញទេ ដូច្នេះហើយយើងចង់ដើរហែនិងប្រគល់ញត្តិរបស់យើងដោយខ្លួនឯង”។
បន្ទាប់ពីការចរចាដោយមានការជួយជ្រោមជ្រែងពីសំណាក់ព្រះសង្ឃផង ក្រុមអ្នកភូមិបានយល់ព្រមមិនដើរហែ ហើយទុកញត្តិជាមួយលោក ចាន់លៀង។
អ្នកភូមិមួយចំនួនបាននិយាយថា ពួកគាត់មកភ្នំពេញបន្ទាប់ពីបានឮថា លោក ហ៊ុន សែន បានបង្កើតគណកម្មាធិការថ្មីមួយដើម្បីដោះស្រាយវិវាទដីធ្លី។
កាលពីសប្តាហ៍មុន លោកនាយករដ្ឋមន្ត្រីបានបង្កើតគណកម្មាធិការអន្តរក្រសួងថ្មីមួយដើម្បីស៊ើបអង្កេត ថាតើក្រុមហ៊ុនដែលទទួលបានដីសម្បទានសេដ្ឋកិច្ច ដែលត្រូវគេបន្ទោសចំពោះការបណ្តេញប្រជាពលរដ្ឋទាំងបង្ខំភាគច្រើន នៅប្រទេសកម្ពុជានោះ អនុវត្តតាមកិច្ចសន្យារបស់ខ្លួនជាមួយរដ្ឋាភិបាលឬទេ។
កាលពីថ្ងៃសុក្រ លោកនាយករដ្ឋមន្ត្រីក៏បានជួបជាមួយមន្ត្រីរដ្ឋាភិបាលជាន់ខ្ពស់និងអភិបាលខេត្តជាច្រើនរូបដែរ ដើម្បីពិភាក្សាអំពីញត្តិជាច្រើន ដែលខុទ្ទកាល័យរបស់លោកទទួលជាទៀងទាត់ពីសហគមន៍នានា ដែលធ្វើដំណើរមករាជធានីភ្នំពេញ។មានិត