យោងតាមប្រព័ន្ធផ្សព្វផ្សាយបានរាយការណ៍ថា នគរបាលអន្តរជាតិអាំងទែប៉ូល កំពុងតែស៊ើបអង្កេតលើករណីបុរសជនជាតិជប៉ុនម្នាក់ដែលត្រូវបានសង្ស័យថា ជាមេខ្លោងជួញដូរក្មេងៗ ដោយបានបើកការស៊ើបអង្កេតនៅក្នុងប្រទេសចំនួនបួន រួមមានប្រទេសកម្ពុជាផងដែរ។
កាលពីសប្ដាហ៍មុន នាយកដ្ឋាននគរបាលប្រឆាំងការជួញដូរមនុស្សរាជធានីភុ្នំពេញបានបញ្ជាក់ថា ខ្លួនកំពុងស៊ើបអង្កេតលើករណីរបស់លោក Mitsutoki Shigeta អាយុ២៤ឆ្នាំ ជនជាតិជប៉ុន ដែលធ្វើជាឪពុកលើក្មេងៗយ៉ាងតិចចំនួន១៦នាក់ ក្នុងនោះបួននាក់ត្រូវបានគេជឿជាក់ថា ស្ថិតនៅក្នុងប្រទេសកម្ពុជា ដោយឲ្យស្ត្រីនៅក្នុងប្រទេសថៃពពោះឲ្យ។
យោងតាមកាសែត Associated Press (AP)បានឲ្យដឹងថា ទោះបីជាលោក Shigeta ដែលគេមិនដឹងថា នៅកន្លែងណានោះមិនទាន់ត្រូវបានចោទប្រកាន់ក៏ដោយ តែនគរបាលថៃបានសង្ស័យជនជាតិជប៉ុនរូបនេះថា មានជាប់ពាក់ព័ន្ធនៅក្នុងការជួញដូរមនុស្សឬកេងយកផលចំណេញពីកុមារ។
ដោយដកស្រង់សម្ដីរបស់ប្រធាននគរបាលអន្តរជាតិអំាងទែប៉ូលនៅក្នុងប្រទេសថៃ កាសែត AP បានរាយការណ៍កាលពីចុងសប្ដាហ៍ថា មន្ត្រីនគរបាលអន្តរជាតិអាំងទែប៉ូលកំពុងតែចូលរួមនៅក្នុងការស៊ើបអង្កេតនៅក្នុងប្រទេសថៃ និងប្រទេសចំនួនបីផ្សេងទៀតដូចជាប្រទេសកម្ពុជា ប្រទេសចិន និងប្រទេសជប៉ុនជាដើម ដែលលោក Shigeta ត្រូវបានគេជឿជាក់ថា បានចុះបញ្ជីពាណិជ្ជកម្ម ឬចុះបញ្ជីលំនៅដ្ឋាន។
យោងតាមរបាយការណ៍របស់ក្រសួងពាណិជ្ជកម្ម លោក Shigeta បានចុះបញ្ជីពាណិជ្ជកម្មចំនួនប្រាំនៅក្នុងប្រទេសកម្ពុជាតែមួយគត់។ នាយកដ្ឋានលិខិតឆ្លងដែននៅក្រសួងមហាផ្ទៃក៏បានបញ្ជាក់ដែរថា លោក Shigeta មានសញ្ជាតិកម្ពុជា ដោយយោងតាមព្រះរាជក្រឹត្យឆ្នាំ២០១២។
លោក កែវ ធា នាយនគរបាលប្រឆាំងការជួញដូរមនុស្សរាជធានីភ្នំពេញ ដែលបានបញ្ជាក់ថា ប្រទេសកម្ពុជាកំពុងស៊ើបអង្កេតលើករណីនេះបានបដិសេធមិនរៀបរាប់ពីការស៊ើបអង្កេតដែលកំពុងតែមានដំណើរវិវឌ្ឍរបស់លោកឡើយ។ លោកបានមានប្រសាសន៍ថា “ខ្ញុំមិនអាចនិយាយបានទេក្នុងពេលឥឡូវនេះ នៅពេលដែលខ្ញុំអាចនិយាយប្រាប់បាន ខ្ញុំនឹងនិយាយប្រាប់”។
ទាំងការិយាល័យនគរបាលអន្តរជាតិអាំងទែប៉ូលរបស់ប្រទេសកម្ពុជា និងលោក សុខ ផល អគ្គនាយកនៃអគ្គនាយកដ្ឋានអន្តោប្រវេសន៍នៅក្រសួងមហាផ្ទៃ មិនអាចទាក់ទងសុំការអត្ថាធិប្បាយបានឡើយ។ លោក កែវ វណ្ណថន ដែលជាអគ្គនាយករងក្រោមបង្គាប់របស់លោក សុខ ផល និងដែលធ្លាប់គ្រប់គ្រងការិយាល័យនគរបាលអន្តរជាតិអាំងទែប៉ូលបានលើកឡើងថា លោកមិនដឹងអំពីករណីនេះឡើយ។
យោងតាមប្រព័ន្ធផ្សព្វផ្សាយនៅក្នុងប្រទេសថៃ និងប្រទេសអូស្ត្រាលី លោក Shigeta បានប្រើលិខិតឆ្លងដែនកម្ពុជា ដើម្បីចូលក្នុងប្រទេសកម្ពុជាពីប្រទេសថៃមកជាច្រើនលើកមកហើយនៅក្នុងឆ្នាំនេះ ដោយបីលើកមានក្មេងមកជាមួយផ្សេងៗគ្នា ដែលប្រើនាមត្រកូលរបស់លោក។ ក្រោយមក ប្រព័ន្ធផ្សព្វផ្សាយនៅក្នុងប្រទេសថៃបានរាយការណ៍ថា ក្មេងៗចំនួនបួននាក់ដែលគេសង្ស័យថា លោក Shigeta បានធ្វើជាឪពុកនោះ ឥឡូវនេះកំពុងស្ថិតក្នុងប្រទេសកម្ពុជា ហើយថា នគរបាលថៃមានគម្រោងធ្វើដំណើរមកប្រទេសកម្ពុជាក្នុងពេលឆាប់ៗ ដើម្បីមកមើលក្មេងៗទាំងនេះ៕ គឹមហឿន