បុរសជនជាតិចិន២នាក់និងស្ត្រីខ្មែរ២នាក់ ដែលជាប់ចោទពីបទប៉ុនប៉ងជួញដូរស្ត្រីខ្មែរទៅប្រទេសចិនដើម្បីលក់ផ្លូវភេទ បានបដិសេធការចោទប្រកាន់លើពួកគាត់អំឡុងសវនាការនៅសាលាដំបូងរាជធានីកាលពីម្សិលមិញ។
ជនជាតិចិន ស៊ូ ឈីសេង អាយុ៣៩ឆ្នាំ ឈ្មោះ ស៊ូ ជីងឡុង អាយុ៣៤ឆ្នាំ និងជនជាតិខ្មែរ ឈ្មោះ ឡាំ ណា អាយុ៤៥ឆ្នាំ និង សុខ បូរា អាយុ២៥ឆ្នាំ បានជាប់ឃុំរង់ចាំការកាត់ក្តីតាំងពីខែកុម្ភៈមក។ ពួកគេត្រូវជាប់ចោទពីបទជួញដូរមនុស្ស និងប្រឈមទោសជាប់ពន្ធនាគារពី៧ឆ្នាំដល់១៥ឆ្នាំ ក្រោមច្បាប់ប្រឆាំងការជួញដូរមនុស្ស។ ជនជាប់ចោទទាំងនេះក៏ប្រឈមបទធ្វើឯកសារក្លែងក្លាយដែរ។
ចៅក្រម កែវ មុនី បានប្រាប់ជនសង្ស័យក្នុងតុលាការថា “ក្នុងឯកសារប៉ូលីស អ្នកបានសារភាពគ្រប់យ៉ាង ប៉ុន្តែឥឡូវ អ្នកនិយាយថា អ្នកមិនដឹង។ ដោយសារតែដំណើររឿងស្មុគស្មាញ ហើយដោយសារតែអវត្តមានជនរងគ្រោះ ការជំនុំជម្រះក្តី នឹងត្រូវលើកពេល”។
ដំបូងឡើយ ចុងចោទបានសារភាពថា មានផែនការជួញដូរស្ត្រី២នាក់ ពីខេត្តតាកែវទៅប្រទេសចិន ក្រោមការព្រមព្រៀងក្លែងក្លាយឲ្យពួកគេរៀបការជាមួយបុរសចិនអ្នកមាន។ ផ្ទុយទៅវិញ ជនសង្ស័យបាននិយាយថា ពួកគេបានសម្រេចលក់ស្ត្រីទាំងនោះឲ្យផ្ទះបនទៅវិញ។
លោក ផាត ផល្លា អនុប្រធានការិយាល័យប្រឆាំងការជួញដូរមនុស្សនិងការពារអនីតិជនក្រុងភ្នំពេញ បានមានប្រសាសន៍ក្នុងតុលាការថា ជនរងគ្រោះម្នាក់ជាអនីតិជន ហើយថា ជនសង្ស័យបានកែប្រែឯកសារសម្គាល់ខ្លួនរបស់ជនរងគ្រោះជាអនីតិជននេះ ដើម្បីប្តូរទាំងឈ្មោះនិងអាយុរបស់នាង។
លោក ផល្លា មានប្រសាសន៍ថា “ក្មេងស្រីខ្មែរទាំងនោះមិនចង់ទៅប្រទេសចិនដើម្បីរៀបការទេ”។ លោក បានបន្ថែមថា ជនរងគ្រោះត្រូវបានគេសន្យាផ្តល់ប្រាក់១.៥០០ដុល្លារ។ កាលបរិច្ឆេទសម្រាប់សវនាការបន្តទៀតមិនទាន់ត្រូវបានកំណត់នៅឡើយទេ។
កាលពីដើមខែនេះ ជនជួញដូរមនុស្សមួយក្រុមមានគ្នា៥នាក់ដែលបានបញ្ជូនស្ត្រីខ្មែរយ៉ាងហោចណាស់៦នាក់ទៅប្រទេសចិន ដែលនៅទីនោះស្ត្រីទាំងនោះត្រូវបានប្តីរបស់ខ្លួនរំលោភ ឬលក់ឲ្យផ្ទះបននោះ ត្រូវបានកាត់ទោសក្រោមច្បាប់ប្រឆាំងការជួញដូរមនុស្ស។ ជនជាតិចិន៣នាក់ទទួលទោសជាប់ពន្ធនាគារ៧ឆ្នាំ រីឯស្ត្រីខ្មែរ២នាក់ ជាមេខ្យល់ មានទោសជាប់ពន្ធនាគារ២ឆ្នាំ៕មានិត