សកម្មជនមកពីសហគមន៍បឹងកក់ក្នុងរាជធានីភ្នំពេញ ដែលតែងតែមានគំនិតថ្មីៗបានយកពងមាន់ប្រើសម្រាប់ការតវ៉ាថ្មីបំផុតរបស់ពួកគាត់ប្រឆាំងការបណ្ដេញចេញដោយបង្ខំ កាលពីព្រឹកម្សិលមិញនេះ គប់ដាក់ស្ថានទូតសិង្ហបុរី និងរូបថតលោក កែប ជុតិមា អតីតអភិបាលរាជធានីភ្នំពេញ។
អ្នកតវ៉ាតំបន់បឹងកក់ប្រហែល៥០នាក់ បានផ្ដោតគោលដៅលើស្ថានទូតសិង្ហបុរីដែលស្ថិតនៅតាមមហាវិថីព្រះនរោត្តមជាលើកទី២ កាលពីម្សិលមិញ ដើម្បីឆ្លើយតបទៅនឹងផែនការទិញដីមួយក្បាលទំហំ១,៣៥ហិកតារបស់ក្រុមហ៊ុនមួយ ដែលមានមូលដ្ឋាននៅសិង្ហបុរីនេះ ពីក្រុមហ៊ុនស៊ូកាគូអុីន ដែលបានបណ្ដេញអ្នកភូមិប្រហែល៣.០០០គ្រួសារចេញពីដីទំហំប្រហែល១២០ហិកតា។
ស៊ា ណារ៉េត អ្នកតវ៉ាម្នាក់ក្នុងចំណោមអ្នកតវ៉ាទាំងនោះបាននិយាយថា “យើងសូមស្នើឲ្យស្ថានទូតនេះជួយធ្វើអន្តរាគមន៍ដើម្បីរារាំងក្រុមហ៊ុននេះកុំឲ្យទិញដីនៅតំបន់បឹងកក់ ពីព្រោះអ្នកភូមិជាច្រើនគ្រួសារបានរងផលប៉ះពាល់ដោយសារតែក្រុមហ៊ុនស៊ូកាគូ”។
ទោះជាយ៉ាងណា គ្មានតំណាងស្ថានទូតមកទទួលយកញត្តិរបស់អ្នកតវ៉ាឡើយ ហើយភ្លាមៗនោះសន្តិសុខខណ្ឌដូនពេញបានរុញច្រានក្រុមអ្នកតវ៉ាឲ្យចេញពីស្ថានទូត។ គេឃើញផ្នែកលឿងនៃពងមាន់ជាប់នៅខ្លោងទ្វារមុខរបស់ស្ថានទូតនេះ បន្ទាប់បីពួកគាត់បានចាកចេញ។
នៅពេលក្រុមអ្នកតវ៉ាបានផ្ដោតគោលដៅទៅលើអគារស្ថានទូតនេះលើកដំបូងកាលពីដើមខែនេះ ស្ថានទូតបានចេញសេចក្ដីថ្លែងការណ៍មួយអះអាងថា ខ្លួនគ្មានតួនាទីធ្វើអន្តរាគមន៍ ” នៅក្នុងវិវាទទាក់ទងការទិញលក់ដីដូចដែលបានរាយការណ៍នេះទេ”។ ក្រុមហ៊ុន HLH ដែលបុត្រសម្ព័ន្ធរបស់ខ្លួនគឺក្រុមហ៊ុន D’ Lotus Development ដែលកំពុងត្រៀមទិញដីនៅតំបន់បឹងកក់នោះ លើកឡើងថា កិច្ចព្រមព្រៀងនេះកំពុងរង់ចាំការពិនិត្យឲ្យបានពេញលេញតាមផ្លូវច្បាប់។
បន្ទាប់ពីចាកចេញពីស្ថានទូតកាលពីម្សិលមិញ ក្រុមអ្នកតវ៉ាបានហែក្បួនទៅកាន់រដ្ឋសភា ប៉ុន្តែត្រូវបានរារាំងមិនឲ្យចូលទៅដល់អគាររដ្ឋសភាឡើយ ដោយសារមានទ្វារដែក និងសន្តិសុខជាច្រើននាក់។ ដោយមិនរួញរា ក្រុមអ្នកតវ៉ាបានយកពងមាន់គប់រូបថតលោក កែប ជុតិមា អតីតអភិបាលរាជធានីភ្នំពេញក្នុងចម្ងាយដ៏កៀក។
លោក កែប ជុតិមា ដែលបានលាលែងពីតំណែងកាលពីឆ្នាំមុននោះ បានធ្វើជាអភិបាលរាជធានីអំឡុងឆ្នាំដែលក្រុមហ៊ុនស៊ូកាគូ និងសាលារាជធានីបានបណ្ដេញអ្នកភូមិតំបន់បឹងកក់ជាច្រើនគ្រួសារចេញ។
អ្នកតវ៉ាម្នាក់ទៀតឈ្មោះ ចាន់ សារិន បាននិយាយថា យើងបានគប់ពងមាន់ដាក់ផ្ទៃមុខលោក កែប ជុតិមា ពីព្រោះយើងគ្មានផ្ទះសំបែងដោយសារតែបុគ្គលនេះឯង”។
ដោយត្រូវបានរុញច្រានដោយសន្តិសុខជាថ្មីម្ដងទៀត បន្ទាប់មកក្រុមអ្នកតវ៉ាបានជួបជាមួយលោក អ៊ុំ សំអាត សមាជិកសភាគណបក្សសង្គ្រោះជាតិ ដែលបានសន្យាលើកឡើងនូវកង្វល់របស់ពួកគាត់អំឡុងសម័យប្រជុំសភាក្រោយៗ៕ សារុន