28 C
Phnom Penh

ពលករ​ចំណាក​ស្រុក​ជិត​២០០​នាក់​ត្រូវ​ក្រុមហ៊ុនបោក​២៦០​ដុល្លារ​ក្នុង​ម្នាក់ៗ

ដោយ ឌឹ ខេមបូឌា ដេលី

បទវិភាគ

កាលពី​ម្សិលមិញ ពលករ​ចំណាក​ស្រុក​៥០​នាក់​បាន​តវ៉ា​នៅ​ខាង​ក្រៅ​សាខា​របស់​ក្រុមហ៊ុន​ជ្រើសរើស​ពលករ​មួយ ក្នុង​ខណ្ឌ​សែន សុខ រាជធានី​ភ្នំពេញ ដែល​ពួកគាត់​បាន​និយាយ​ថា ក្រុមហ៊ុន​បាន​បោក​ពួកគាត់​ម្នាក់ៗ​អស់​ប្រាក់​២៦០​ដុល្លារ ដែល​បង់​សម្រាប់​ការ​ធានា​រក​ការងារ​ឲ្យ​ធ្វើ​នៅ​ប្រទេស​ថៃ។

ពលករ​៥០​នាក់ ក្នុង​ចំណោម​ពលករ​១៨៧​នាក់​ដែល​បាន​ធ្វើ​ដំណើរ​ទៅ​ប្រទេស​ថៃ​កាលពី​ថ្ងៃ​ទី​១៨​សីហា បាន​ទាមទារ​ឲ្យទីភ្នាក់ងារ APTSE & C (Cambodia) Resources សង​ប្រាក់​ពួកគាត់​វិញ​គ្រប់​ចំនួន ដោយសារតែ​ពួកគាត់ទទួល​បាន​​ឯកសារក្លែងក្លាយ​និង​ការ​សន្យា​មិន​ពិត។

នៅ​ពេល​ដែល​ក្រុមហ៊ុន APTSE & C ដឹក​ពលករ​ជិត​២០០​នាក់​ទៅ​ប្រទេស​ថៃ​កាលពី​ថ្ងៃ​ទី​១៨​ខែ​សីហា តម្រួត​យោធា​ថៃ​បាន​ចាប់​ពួកគាត់ និង​ប្រាប់​ពួកគាត់​ថា ឯកសារ​ធ្វើការ​របស់​ពួកគាត់​ក្លែងក្លាយ ហើយ​បាន​បញ្ជូន​ពួកគាត់​ត្រឡប់​មក​ប្រទេស​កម្ពុជា​វិញ​កាលពី​ថ្ងៃ​ច័ន្ទ។

ខេង ចាន់ អាយុ​៣០​ឆ្នាំ ជាពលករ​ចំណាក​ស្រុក​ម្នាក់ បាន​និយាយ​ថា “យើង​តវ៉ា​ទាមទារ​ឲ្យ​ក្រុមហ៊ុន​នេះប្រឈម​នឹង​ច្បាប់ ពីព្រោះ​ពួកគេ​បោក​យើង។ ពួកគេ​បាន​យក​លុយ​​របស់​យើង ប៉ុន្តែ​បាន​កុហក​យើង”។

ក្រុមហ៊ុន APTSE & C ដែល​មាន​ការិយាល័យ​ធំ​នៅ​ខណ្ឌ​មាន​ជ័យ ជា​ក្រុមហ៊ុន​មួយ​ក្នុង​ចំណោម​ក្រុមហ៊ុនជិត​៥០ ដែល​ទទួល​សិទ្ធិ​ពី​ក្រសួង​ការងារ ដើម្បី​ជួយ​ពលករ​ចំណាក​ស្រុក​ខុស​ច្បាប់ ដែល​បាន​ភៀស​ខ្លួន​ចេញ​ពីរដ្ឋាភិបាល​យោធា​ថៃកាលពិ​ខែ​មិថុនា ឲ្យបាន​ត្រឡប់​ទៅ​ធ្វើ​ការ​វិញ​ដោយ​មាន​ឯកសារ​ត្រឹមត្រូវ គឺ​ជា​នីតិ​វិធី​មួយ​ដែល​​ត្រូវ​ចំណាយ​តែ​៤៩ដុល្លារ​ប៉ុណ្ណោះ។

ប៉ុន្តែ​ក្រសួង​បាន​ទទួល​ស្គាល់​ថា ខ្លួន​មិន​បាន​ពិនិត្យ​ក្រុមហ៊ុន​ដែល​ទទួល​បាន​សិទ្ធិ​ទាំង​នេះ​ដិតដល់​ទេ ហើយ​ចាត់​វិធានការ​តែ​ពេល​ណា​មាន​ពាក្យ​បណ្តឹង​ប៉ុណ្ណោះ។ ក្នុង​ពេល​២​ខែ​កន្លង​មក ក្រុមហ៊ុន​ជា​ច្រើន​ត្រូវ​បាន​គេ​រក​ឃើញ​ថា យក​លើស​តម្លៃ​ពី​ពលករដែល​រក​ការ​ធ្វើ​នៅ​ប្រទេស​ថៃ និង​អនុញ្ញាត​ឲ្យ​អ្នក​ម៉ៅការ​បន្ត​ជ្រើសរើស​ពលករ​ដោយ​ប្រើ​ឈ្មោះ​ក្រុមហ៊ុន​របស់​ខ្លួន។

លោក សេង សិទ្ធិជ័យ ដែល​ត្រូវ​តែងតាំង​ជា​មន្ត្រី​ទំនាក់​ទំនង​របស់​ក្រុមហ៊ុន APTSE & C ដោយ​ក្រសួង​ការងារ​នោះ មិន​អាច​ទាក់ទង​សុំ​ការ​ពន្យល់​បាន​ទេ។

ប៉ុន្តែ លោក យឹម ឧត្តម ជា​បុគ្គលិក​ម្នាក់​នៅ​ការិយាល័យ​របស់​ក្រុមហ៊ុននេះ​ក្នុង​ខណ្ឌ​សែន សុខ បាន​និយាយ​ថា រហូតមក​ដល់​ពេល​នេះ ក្រុមហ៊ុន​បាន​សង​ប្រាក់​ពលករ​វិញ​៦០​ដុល្លារ​ក្នុង​ម្នាក់ៗ ហើយ​នឹង​សង​ថែម​ទៀត​នៅ​ពេល​ក្រោយ​ទៀត។

ពលករ​ខ្មែរ​ប្រហែល​២៥០.០០០នាក់​បាន​រត់​ចេញ​ពី​ប្រទេស​ថៃ​មក​ស្រុក​វិញ​កាលពី​ខែ​មិថុនា ព្រោះ​ខ្លាច​អំពើ​ហិង្សា​ពីសំណាក់​យោធា​ថៃ ដែល​បាន​បណ្តេញ​ពលករ​ចំណាក​ស្រុក​ខុស​ច្បាប់​និង​មិន​ចុះ​ឈ្មោះ ចេញពី​ប្រទេស​ថៃ។

ទោះជា​យ៉ាង​នេះ​ក្តី ពលករ​រាប់​ម៉ឺន​នាក់​បាន​ឆ្លងដែន​ទៅ​ធ្វើ​ការ ហើយ​កាលពី​សប្តាហ៍​មុន ក្រសួង​ការងារ​បាន​ប្រមាណ​ថា ពលរដ្ឋ​ខ្មែរ​ប្រហែល​៦៦០.០០០​នាក់ ពោល​គឺ​ប្រហែល​៥​ភាគរយ​នៃ​ចំនួន​ប្រជាជន​ក្នុង​ប្រទេស កំពុង​ធ្វើ​ការ​នៅ​ប្រទេស​ថៃ​សព្វថ្ងៃ​នេះ៕មានិត

 

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស