37 C
Phnom Penh

បន្ទាប់ពី​តវ៉ា​អស់រយៈ​ពេល​ជាយូរ​ អ្នក​ភូមិ​ទទួល​បាន​ដី​ត្រឡប់​មក​វិញ​

ដោយ ឌឹ ខេមបូឌា ដេលី

បទវិភាគ

កាលពី​ចុង​សប្ដាហ៍ លោក អុឹម ឈុន​លឹម រដ្ឋមន្ត្រី​ក្រសួង​រៀបចំ​ដែនដី នគរូបនីយកម្ម និង​សំណង់ បាន​អន្តរាគមន៍​នៅ​ក្នុង​វិវាទ​ដីធ្លី​ដ៏លេច​ធ្លោ​មួយ​រវាង​អ្នក​ភូមិ​មកពី​ស្រុក​ស្នូល ខេត្ត​ក្រចេះ និង​ក្រុម​ហ៊ុន​កសិឧស្សាហកម្ម​របស់​កូរ៉េ​ខាង​ត្បូង​ ដោយ​ប្រកាស​កាលពី​ថ្ងៃ​សៅរ៍​ថា ដីមាន​វិវាទ​ទំហំ​១.៥៦២ហិកតា​ នឹង​ត្រូវ​ដក​ហូត​ពីក្រុម​ហ៊ុន​​ ហើយ​​ប្រគល់​ឲ្យ​អ្នក​ភូមិ​វិញ។

ថ្លែង​ទៅ​កាន់​តំណាង​របស់​អ្នក​ភូមិ​នៅ​ក្នុង​វត្ត​សាមគ្គីរង្សី ​ក្នុង​រាជ​ធានី​ភ្នំពេញ ជា​ទី​ដែល​ពួកគាត់​បាន​ស្នាក់​នៅ​អស់​ច្រើន​សប្ដាហ៍​មក​ហើយ​នោះ លោក ឈុន​លឹម បាន​ប្រាប់​ក្រុម​អ្នក​ភូមិ​ឲ្យ​ត្រឡប់​ទៅ​ខេត្ត​ក្រចេះ​វិញ ដើម្បី​ទៅ​ទទួល​​ប័ណ្ណ​កម្មសិទ្ធិដីធ្លី​របស់​ពួកគាត់​។

លោក​បាន​មាន​ប្រសាសន៍​ថា ” សូម​គ្រួសារ​ទាំង​អស់​ដែល​ជាប់​ពាក់​ព័ន្ធ​នឹង​ដី​នេះ ទៅ​យក​​ប័ណ្ណ​កម្មសិទ្ធិ​ដីធ្លី​នៅ​សាលា​ខេត្ត​នៅ​ព្រឹក​ថ្ងៃពុធ”។

លោក ខាន់ ចំណាន អភិបាល​រង​ខេត្ត​ក្រចេះ ដែល​អម​ដំណើរ​លោក ឈុនលឹម ទៅ​វត្ត​នោះ​បាន​ឲ្យ​ដឹង​ថា ដីដែល​មានវិវាទ​ត្រូវ​បាន​ដក​ហូត​ពី​ក្រុម​ហ៊ុន​ HorizonAgriculturalDevelopment (HAD)ដែល​ត្រូវ​បាន​ផ្ដល់​ដី​សម្បទាន​សេដ្ឋកិច្ច​កាល​ពី​ឆ្នាំ​២០០៨​​សម្រាប់​ធ្វើ​ជា​ចម្ការ​ដំឡូង​មី និង​ចម្ការ​ម្រេច ព្រោះ​ក្រុម​ហ៊ុន​នេះ​មិន​បាន​អភិវឌ្ឍតំបន់​នោះ​ឲ្យ​បាន​ត្រឹម​ត្រូវ​ទេ​។

លោក ចំណាន បាន​លើក​ឡើង​តាម​រយៈ​ទូរស័ព្ទ​ថា “​ រដ្ឋាភិបាល​បាន​រឹប​អូស​ដី​នេះ​ពី​ក្រុម​ហ៊ុន​វិញ​ហើយ ព្រោះ​ពួកគេ​មិន​បានគោរព​តាម​កិច្ច​សន្យា​។ ក្រុម​ហ៊ុន​ទទួល​បាន​ដី​សម្បទាន​សេដ្ឋកិច្ច​ ប៉ុន្តែ​មិន​បាន​ប្រើ​ប្រាស់​ដីនោះ​សម្រាប់ការ​អភិវឌ្ឍឡើយ​”។

វិវាទ​ដីធ្លី​នេះ​បាន​ទាញ​ចំណាប់​អារម្មណ៍ពី​លោក​នាយក​រដ្ឋមន្ត្រី ហ៊ុន សែន និង​ស្ថាន​ទូត​កូរ៉េ ដែល​បាន​ដាក់​ពាក្យ​បណ្ដឹង​ជា​ផ្លូវ​ការ​មួយ​ទៅ​កាន់​ក្រសួង​រៀបចំដែនដី នគរូបនីយកម្ម និង​សំណង់ ដើម្បី​ការ​ពារ​ក្រុម​ហ៊ុន​កូរ៉េ​ខាង​ត្បូង​មួយ​នេះ​កាលពី​ខែ​មីនា ដោយ​ធ្វើ​ឲ្យ​មាន​កិច្ច​ប្រជុំ​មួយ​រវាង​លោក KimHan-soo​ ឯកអគ្គរដ្ឋទូត​កូរ៉េ​ខាង​ត្បូង និង​លោក ឈុនលឹម។

កាលពី​សប្ដាហ៍​មុន លោក ហ៊ុន សែន បាន​ប្រើ​ប្រាស់​វិវាទ​ដីធ្លី​នៅ​ក្នុង​ខេត្ត​ក្រចេះ​​ជា​ឧទាហរណ៍​មួយ​នៃ​ការ​បរាជ័យ​របស់​ក្រសួង​រៀបចំ​ដែនដី នគរូបនីយកម្ម និង​សំណង់ និង​អាជ្ញាធរ​មូលដ្ឋាន​​ក្នុង​ការ​ដោះ​ស្រាយ​វិវាទ​ដីធ្លី​ផ្សេង​ៗ​ ដោយធ្វើ​ឲ្យ​អ្នក​ភូមិ​​ដែល​អស់​សង្ឃឹម​នាំគ្នា​ធ្វើ​ដំណើរ​មក​ទីក្រុង​ភ្នំពេញ​ដើម្បី​រក​ដំណោះស្រាយ​។

នៅ​ក្នុង​សេចក្ដី​ថ្លែង​ការណ៍​មួយ​កាលពី​ថ្ងៃទី​១៨ ខែ​សីហា លោក​នាយក​រដ្ឋមន្ត្រី​បាន​ប្រាប់​អាជ្ញាធរ​ឲ្យ​ដោះ​ស្រាយ​វិវាទ​ដីធ្លី​នៅ​ក្នុង​ដែន​សមត្ថកិច្ច​របស់​ខ្លួន បើ​ពុំ​ដូច្នោះ​ទេ សូម​ចុះ​ចេញពី​តំណែងទៅ​។

លោក​បានមាន​ប្រសាសន៍​នៅ​ពេល​នោះ​ថា ” ឥឡូវ​នេះ ខ្ញុំ​នឹង​តាម​ដាន​អ្នក​ឯង​ ហើយ​ចាប់​កំហុស​អ្នកឯង​។ ប៉ុន្តែ​ប្រសិន​បើ​អ្នក​ឯង​និយាយ​ថា ខ្ញុំ​​មិន​អាច​បំពេញ​តួនាទី​នេះ​បាន​ទេ ព្រោះ​វា​ជា​បន្ទុក​មួយ​ដ៏ធំ​ អ្នក​ឯង​អាច​ចុះ​ចេញ​ពី​តំណែង​បាន​”។

ប៉ុន្តែ​គម្រោង​ផ្ដល់​ប័ណ្ណ​កម្មសិទ្ធិ​ដីធ្លី​​របស់​លោក​នាយក​រដ្ឋមន្ត្រី ហ៊ុន សែន ដែល​បាន​ចាប់​ផ្ដើម​កាលពី​ឆ្នាំ​២០១២ ក៏ស្ថិត​ក្រោម​ការ​ពិនិត្យ​ពិច័យ​យ៉ាង​យក​ចិត្តទុក​ដាក់​​ដែរ​ដោយ​សារ​វិវាទ​ដីធ្លី​នេះ​​នៅពេល​​​វាមាន​​ការ​លេច​ឮឡើង​ថា និស្សិត​ស្ម័គ្រ​ចិត្ត​របស់​លោក​នាយក​រដ្ឋមន្ត្រី ហ៊ុន សែន បាន​វាស់​វែង​ដីធ្លី​ដែល​ជា​កម្មសិទ្ធិ​របស់​ក្រុម​ហ៊ុន​HAD។

លោក ឆាយ រ៉ូ អ្នក​ភូមិ​ម្នាក់​ក្នុង​ចំណោម​អ្នកភូមិ​ដែលអះអាង​សិទ្ធិ​​កាន់​កាប់​ដីធ្លី​នៅ​ក្នុង​ស្រុក​ស្នួល និង​ដែល​បាន​មក​តវ៉ា​នៅ​ក្នុង​រាជ​ធានី​ភ្នំពេញ​ដែរ​នោះ បាន​និយាយ​ថា គាត់​មាន​អារម្មណ៍​ធូរស្រាល​​ ដោយ​សារ​ការ​សម្រេច​​របស់​រដ្ឋាភិបាល​​ដែល​លុប​ចោល​កិច្ច​សន្យា​របស់​ខ្លួន​ជាមួយ​ក្រុម​ហ៊ុន​របស់​កូរ៉េ​ខាង​ត្បូង ហើយ​ប្រគល់​ដី​ដែល​មាន​វិវាទ​នេះ​ឲ្យ​អ្នក​ភូមិ​វិញ​។

លោក រ៉ូ បាន​និយាយ​ថា ” ខ្ញុំ​មាន​​ដីទំហំ​៦ហិកតា ហើយ​ខ្ញុំ​សង្ឃឹម​ថា រដ្ឋាភិបាល​នឹង​ប្រគល់​ដី​ទាំង​អស់​នេះ​មក​ឲ្យ​ខ្ញុំ​វិញ ព្រោះ​លោក ឈុនលឹម បាន​ប្រាប់​អ្នក​ភូមិ​នៅ​វត្ត​ថា រដ្ឋា​ភិបាល​នឹង​ប្រគល់​​ឲ្យ​យើង​វិញ​នូវ​អ្វី​ដែល​យើង​មាន​ពី​មុន​មក”។

លោក LimJo-heon នាយក​ក្រុម​ហ៊ុនHAD បាន​លើក​ឡើង​ថា លោក​មិន​ទាន់​ត្រូវ​បាន​គេ​ប្រាប់​ឲ្យ​ដឹង​ជា​ផ្លូវ​ការ​នៅ​ឡើយទេ ចំពោះ​ការ​សម្រេច​របស់​រដ្ឋាភិបាល​ ដែល​នឹង​ដក​ហូត​​យក​ដី​សម្បទាន​សេដ្ឋកិច្ច​ក្រុម​ហ៊ុន​របស់​លោក​ទៅវិញ​នោះ។

លោក​បាន​លើក​ឡើង​តាម​រយៈ​អុីម៉េល​ថា ” ទោះ​ជាយ៉ាង​ណា ប្រសិន​បើ​ការ​សម្រេច​នេះ​ជា​ការ​ពិត​ យើង​ [ក្រុម​ហ៊ុន​] មិន​អាច​ទទួល​យក​ការ​សម្រេច​ណាមួយ​ ដែល​ធ្វើ​ឲ្យ​យើង​បាត់​បង់​តំបន់​អភិវឌ្ឍ​នោះ​ឡើយ​”។

លោក ឈុនលឹម បាន​លើក​ឡើង​បន្ត​ថា ក្រុម​ហ៊ុន​បាន​ពន្យល់​នៅ​ក្នុង​កិច្ច​ប្រជុំ​មួយ​ជាមួយ​​គណៈកម្មការ​សុរិយោដី​កាលពី​ថ្ងៃ​ទី​២៦ ខែ​សីហា​ថា ក្រុម​ហ៊ុន​បាន​ឆ្ការ​រាន​​ដី​សម្បទាន​​ភាគ​ច្រើន​របស់​ខ្លួន​ដែល​មាន​ទំហំ៣.៧៣៤ហិកតា​រួច​ហើយ ហើយ​បាន​ចាប់​ផ្ដើម​ដាំ​ដើម​កៅស៊ូ។

លោក ឈុនលឹម បាន​មាន​ប្រសាសន៍​ថា តំបន់​អភិវឌ្ឍន៍​​គឺ​ជា​តំបន់​ដែល​គ្មាន​វិវាទ​ ហើយ​នឹង​មាន​ការ​ចាត់វិធានការ​បន្ថែម​បន្ទាប់​ពី​កិច្ច​ប្រជុំ​រួច​”។

លោកស្រី ParkMin-seo​ លេខាទី២ នៅ​ស្ថានទូត​កូរ៉េ​ខាង​ត្បូង​ក៏​បានលើកឡើង​ដែរ​ថា ការ​សម្រេច​នេះ​គឺ​អយុត្តិធម៌ ប៉ុន្តែ​វា​ទំនង​ជា​ត្រូវ​បាន​ជំរុញ​ដោយ​ការ​លើក​ឡើង​ក្នុង​ពេល​ថ្មីៗ​របស់​លោក ហ៊ុន សែន ដែល​សម្ដែង​ពី​ក្ដី​អាណិត​អាសូរ​ចំពោះ​ទុក្ខលំបាក​របស់​អ្នក​ភូមិ​។

លោក​ស្រី​បាន​មាន​ប្រសាសន៍​ថា ” តាម​គំនិត​ផ្ទាល់​ខ្លួន​របស់​ខ្ញុំ ខ្ញុំ​គិត​ថា ​ប្រតិកម្ម​បែប​នេះ​​គឺ​កើត​ចេញ​ពីក្រសួង​រៀបចំ​ដែន​ដី នគរូបនីយកម្ម និង​សំណង់ ព្រោះ​លោក​នាយក​រដ្ឋមន្ត្រី​ ហ៊ុន សែន បាន​គាំទ្រ​អ្នកភូមិ​អំឡុង​ការ​ថ្លែង​សុន្ទរកថា”។

លោកស្រី​បាន​បន្ត​ថា ” ការ​ពិត​ហើយ ខ្ញុំ​គិត​ថា​ វា​អយុត្តិធម៌ ព្រោះ​បើ​យោង​តាម​កិច្ច​សន្យា​រវាង​ក្រុម​ហ៊ុន HAD និង​ក្រសួង​កសិកម្ម​កាលពី​ឆ្នាំ​២០០៨ វា​គឺ​ជា​សិទ្ធិ​ទាំង​ស្រុង​របស់​ក្រុម​ហ៊ុន​ក្នុង​ការ​​​កាន់​កាប់​ដីនោះ ហើយ​ពួកគេ​បាន​ឆ្ការ​រាន​ដី​នោះ​ដោយ​ចំណាយ​អស់​ប្រាក់​រាប់​លាន​ដុល្លារ”។

លោកស្រី​​បាន​លើក​ឡើង​ទៀត​ថា ​ស្ថានទូត​មាន​សង្ឃឹម​តិច​តួច​ក្នុង​ការ​​ច្រាន​ចោល​សេចក្ដី​សម្រេច​ ប៉ុន្តែ​លោកស្រី​ជឿជាក់​ថា ក្រុម​ហ៊ុន​ HAD នឹង​ត្រូវ​បាន​សង​ជំងឺចិត្ត​ចំពោះ​ការ​បាត់​បង់​របស់​ខ្លួន​។

លោកស្រី​បាន​មាន​ប្រសាសន៍​​បន្ថែម​ទៀត​ថា ” ឥឡូវ​នេះ ខ្ញុំ​ជឿ​ថា យើង​មិន​អាច​ធ្វើ​អ្វី​បាន​​ទេ ប៉ុន្តែ​ខ្ញុំ​ជឿជាក់​ថា ក្រសួង​រៀបចំ​ដែនដី នគរូបនីយកម្ម និង​សំណង់ នឹងធ្វើ​អ្វី​ៗ​សម្រាប់​ក្រុម​ហ៊ុន​HAD ឧទាហរណ៍​ដូច​ជា​ផ្ដល់​ [ដីសម្បទាន​សេដ្ឋកិច្ច​] ផ្សេង​សម្រាប់​ពួកគេ​ ប៉ុន្តែ​យើង​ត្រូវ​រង់ចាំ​មើល​សិន​”។

ទោះ​ជាយ៉ាង​ណា លោក កែវ ម៉ាលីឡែន ប្រធាន​មន្ទីរ​​រៀបចំ​ដែន​ដី​ខេត្ត​​បាន​លើក​ឡើង​ថា ការ​សម្រេច​របស់​ក្រសួង​ឆ្លុះ​បញ្ចាំង​ឲ្យឃើញ​ពីការ​ពិត​ថា អ្នកភូមិ​បាន​ធ្វើ​ស្រែចម្ការ​លើ​ដីនោះ​តាំង​ពី​យូរ​មក​ហើយ​ ពោល​គឺ​មុន​ក្រុម​ហ៊ុន​HAD មក​ដល់​។

លោក​បាន​មាន​ប្រសាសន៍​ថា ” ខ្ញុំ​យល់​ឃើញ​ថា រដ្ឋាភិបាល​ប្រគល់​ដី​នេះ​ទៅ​ឲ្យ​អ្នក​ភូមិ​វិញ​​ គឺ​ត្រឹម​ត្រូវ​ហើយ ព្រោះ​ក្រុម​ហ៊ុន​មក​កាន់​កាប់​ដី​នេះ​កាលពី​ឆ្នាំ​២០០៨ ប៉ុន្តែ​អ្នក​ភូមិ​បាន​បង្កើត​ភូមិ​នេះមុន​ពេល​នោះទៅ​ទៀត គឺ​ជាយូរ​មក​ហើយ​” ៕គឹមហឿន​​​​​​​​​​​​

 

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស