អ្នកភូមិប្រហែល៧០គ្រួសារដែលរស់នៅក្នុងស្រុកពញាឮ ខេត្តកណ្តាលបានធ្វើការតវ៉ានៅខាងក្រៅសាលាឃុំរបស់ខ្លួនកាលពីថ្ងៃសុក្រ ដោយចោទប្រកាន់ស្ត្រីជាពាណិជ្ជករម្នាក់ថា បានប៉ុនប៉ងសូកប៉ាន់ពួកគាត់ឲ្យឈប់ធ្វើការតវ៉ាជុំវិញដីដែលពួកគាត់លើកឡើងថា ស្ត្រីរូបនោះបានប្លន់ពីពួកគាត់។
ក្រុមអ្នកភូមិដែលជាប់ពាក់ព័ន្ធនៅក្នុងវិវាទដីធ្លីជាមួយអ្នកស្រី លឹម គា ដែលអះអាងថា បានទិញដីដែលមានវិវាទនេះទំហំ១៥៥ហិកតានៅក្នុងឆ្នាំ១៩៩៧នោះនិយាយថា ស្ត្រីជាពាណិជ្ជកររូបនេះបានបង្ហាញមុខនៅកន្លែងដែលពួកគាត់បានធ្វើការតវ៉ានៅក្នុងរាជធានីភ្នំពេញកាលពីថ្ងៃទី២៣ ខែសីហាដោយមានទាំងអំណោយផង និងសុំឲ្យមានការសហការ។
លោក វ៉ាន វ៉ាស្នាក់ អ្នកសម្របសម្រួលនៅអង្គការសិទ្ធិមនុស្សអាដហុកប្រចាំខេត្តកណ្តាលបានមានប្រសាសន៍ថា អ្នកស្រី គា បានមកដល់ជាមួយកញ្ចប់អំណោយសម្រាប់អ្នកតវ៉ាម្នាក់ៗដែលរួមមានអង្ករ១៥គីឡូក្រាម មី ត្រីខកំប៉ុង នំប៉័ង ទឹកបរិសុទ្ធ និងទឹកប្រាក់ប្រហែល៥០ដុល្លារ។
លោក វ៉ាស្នាក់ បានមានប្រសាសន៍ថា វាច្បាស់ណាស់ថា អំណោយនេះគឺដើម្បីជំរុញឲ្យអ្នកភូមិឈប់ធ្វើការតវ៉ានៅក្នុងរាជធានី។
លោកបានមានប្រសាសន៍ថា “ប្រសិនបើអ្នកស្រី គា មានចិត្តសប្បុរសធម៌មែននោះ អ្នកស្រីប្រហែលជាផ្តល់អំណោយនេះតាំងពីឆ្នាំ២០០៨មកម៉្លេះ មិនមែនទើបតែនៅពេលអ្នកភូមិដាក់ញត្តិរបស់ខ្លួនទៅលោកនាយករដ្ឋមន្ត្រី ដើម្បីសុំអន្តរាគមន៍នៅក្នុងវិវាទដីធ្លីរបស់ខ្លួនដូច្នេះឡើយ”។
លោក វ៉ាស្នាក់ បានមានប្រសាសន៍ថា ក្នុងចំណោមអ្នកភូមិ១៣៤នាក់ គឺ៦៣នាក់បានទទួលយកអំណោយនោះតាងនាមគ្រួសាររបស់ពួកគាត់ចំណែកអ្នកភូមិ៧១នាក់ទៀតបានបដិសេធ។
អ្នកស្រី កុយ ចាន់ថន ដែលមិនបានទទួលយកអំណោយហើយស្ថិតក្នុងចំណោមអ្នកដែលបានធ្វើការតវ៉ានៅសាលាឃុំជ្វាំងកាលពីថ្ងៃសុក្រ បាននិយាយថា ជាគោលការណ៍អ្នកស្រីមិនទទួលយកស្បៀងអាហារនិងលុយកាក់នោះទេ។
អ្នកស្រី ចាន់ថន បាននិយាយថា ” អ្នកភូមិ៧១គ្រួសាររបស់យើងមិនទទួលអំណោយទាំងនេះឡើយ ដែលយើងគិតថា ជាអំណោយដើម្បីទិញទឹកចិត្តក្រុមអ្នកភូមិ។ យើងជឿថា ប្រសិនបើយើងទទួលអំណោយនោះ វាមានន័យថា យើងគាំទ្រអ្នកដែលព្យាយាមចាប់យកដីរបស់យើង”។
អ្នកស្រី គា បាននិយាយកាលពីម្សិលមិញថា អ្នកស្រីមិនបានព្យាយាមសូកប៉ាន់អ្នកភូមិដែលបានជំទាស់ការអះអាងសិទ្ធិកាន់កាប់របស់អ្នកស្រីលើដីដែលមានទំនាស់នេះទេ ប៉ុន្តែគ្រាន់តែជាការផ្ដល់ជំនួយដល់អ្នកភូមិដែលគាំទ្រអ្នកស្រីរួចហើយតែប៉ុណ្ណោះ។
អ្នកស្រីបាននិយាយថា ” វាជាអំណោយសម្រាប់អ្នកដែលគាំទ្រខ្ញុំ។ ប្រសិនបើអ្នកមិនគាំទ្រខ្ញុំ មិនចាំបាច់ផ្ដល់អ្វីដល់ពួកគាត់ឡើយ”៕ សារុន