30 C
Phnom Penh

ការដ្ឋាន​សាង​សង់​ចំនួនបី​​នៅ​តាម​បណ្ដោយ​ឆ្នេរ​អូរត្រេះ​ត្រូវ​​រុះ​រើ​ចេញ

ដោយ ឌឹ ខេមបូឌា ដេលី

បទវិភាគ

ក្រុម​មន្ត្រី​បាន​ឲ្យ​ដឹង​កាល​ពី​ម្សិលមិញ​ថា លោក ឈិត សុខុន អភិបាល​ខេត្ត​ព្រះ​​សីហនុ បាន​​ចេញ​បទ​បញ្ជា​ឲ្យ​​ម្ចាស់​ការដ្ឋាន​សាង​សង់​ចំនួន​បី​ក្បែរ​ឆ្នេរ​អូរត្រេះ​ រុះ​រើ​អគារ​របស់​ខ្លួន​ចេញ​នៅ​ថ្ងៃ​សុក្រ​ បន្ទាប់ពី​ម្ចាស់​អគារ​បាន​សាង​សង់​លើស​អ្វី​ដែល​គេ​បាន​កំណត់​។

លោក សុខុន បាន​ចេញ​បទ​បញ្ជា​ឲ្យ​ម្ចាស់​​ការដ្ឋាន​សាង​សង់​ចំនួន​បី​នៅ​តាម​បណ្ដោយ​ព្រែក​អូរត្រេះ ជា​ព្រែក​ដែល​មាន​ប្រវែង​ប្រហែល​២គីឡូម៉ែត្រ​ពី​ឆ្នេរ​ទៅ​កាន់​វត្ត​អូរត្រេះ​​ បញ្ឈប់​ការ​សាង​សង់​របស់​ខ្លួន​នៅ​ក្នុង​ដី​ចំណីព្រែក​ ដែល​ទុក​ឲ្យ​នៅ​ទំនេរ​២៥​ម៉ែត្រ​។ លោក សុខុន បាន​លើក​ឡើង​នៅ​ក្នុង​បទ​បញ្ជា​ដែល​ចេញ​ទៅ​ឲ្យ​ម្ចាស់​​ការដ្ឋាន​សាង​សង់​ទាំង​នោះ​កាលពី​ថ្ងៃ​សុក្រ​ថា ” ម្ចាស់​ការដ្ឋាន​សាងសង់​ត្រូវ​តែ​ធ្វើ​តាម​បទ​បញ្ជា​របស់​ខេត្ត​ ហើយ​រុះរើ​អគារ​ខុស​ច្បាប់​របស់​ខ្លួន​ចេញ​​”។

បទ​បញ្ជា​នោះ​មាន​ខ្លឹមសារ​បន្ត​ថា ” ម្ចាស់​ការដ្ឋាន​សាងសង់​ត្រូវ​តែ​រុះរើ​អគារ​ដោយ​ខ្លួន​ឯង​ក្នុង​​រយៈ​ពេល​៣០​ថ្ងៃ គិត​ចាប់ពី​ថ្ងៃ​​ជូន​ដំណឹង​នេះ​ទៅ​។ ម្ចាស់អគារ​ណាមួយ​ដែល​មិន​ព្រម​រុះរើ​អគារ​របស់​ខ្លួន​ទេ យើង​នឹង​បញ្ជូន​អាជ្ញាធរ​មាន​សមត្ថកិច្ច និង​ក្រុម​ការ​ងារ​រួម​ទៅ​រុះរើ​អគារ​នោះ ដោយ​មិន​ទទួល​ខុស​ត្រូវ​រាល់​ការ​ខូច​ខាត​ណាមួយ​ឡើយ​”។

កាលពី​សប្ដាហ៍​មុន អាជ្ញាធរ​ខេត្ត​បាន​ប្រើ​គ្រឿង​ចក្រ​ទៅ​កម្ទេច​ផ្នែក​ខ្លះ​នៃ​អគារ​ដែល​បាន​សាង​សង់​រួច បន្ទាប់ពី​ម្ចាស់​អគារ​មិន​ព្រមធ្វើ​តាម​បទ​បញ្ជា​ស្រដៀងគ្នា​នេះ​។

លោក ខាត់ ប៊ុណ្ណា អនុប្រធាន​មន្ទីរ​រៀបចំ​ដែន​ដី​ខេត្ត​ គឺ​ជា​ម្ចាស់​នៃ​ការដ្ឋាន​សាង​សង់​មួយ​ក្នុង​ចំណោម​ការដ្ឋាន​សាងសង់​ទាំង​នេះ ដែល​ត្រូវ​បាន​ចេញ​បទ​បញ្ជា​ឲ្យ​​រុះ​រើ​អគារ​​របស់​ខ្លួន។ លោក ប៊ុណ្ណា បាន​លើក​ឡើង​ថា លោក​គ្រោង​សាងសង់​រមណីយដ្ឋាន​មួយ​ដែល​មាន​២៤​បន្ទប់​នៅ​លើ​ឆ្នេរ​ខ្សាច់​ទំហំ​៤.០០០​ម៉ែត្រក្រឡា​​តាម​បណ្ដោយ​ព្រែក ហើយ​ថា លោក​ទើប​តែ​សាងសង់​បាន​មួយ​បន្ទប់​ប៉ុណ្ណោះ ដែល​​ប៉ះពាល់​ដល់​បទ​បញ្ជា​របស់​លោក សុខុន។

លោក​បាន​មាន​ប្រសាសន៍​កាលពី​ម្សិលមិញ​ថា ” ខ្ញុំ​បាន​ទទួល​សេចក្ដី​ជូន​ដំណឹង​ឲ្យ​រុះរើ​​បន្ទប់​ដែល​ត្រូវ​បាន​សាងសង់រួច​នោះ​រួច​ហើយ ហើយ​កម្មករ​របស់​ខ្ញុំ​កំពុង​តែ​ធ្វើ​ការ​រុះរើ​នៅ​ថ្ងៃ​នេះ​”។

លោក សុខុន បាន​លើក​ឡើង​ថា គម្រោង​របស់​លោក ប៊ុណ្ណា លើស​ពី​ការ​កំណត់​​​នៅ​តាម​បណ្ដោយ​ព្រែក​ប្រវែង​​៨៨ម៉ែត្រ​។ គម្រោង​ទី២​លើស​ការ​កំណត់​នៅ​តាម​បណ្ដោយ​ព្រែក​ប្រវែង​៦៤ម៉ែត្រ និង​គម្រោង​ទី៣​​លើស​ការ​កំណត់​នៅ​តាម​បណ្ដោយ​ព្រែក​ប្រវែង​៧៥​ម៉ែត្រ។

លោក ស្រ៊ុន ស្រ៊ន់ អភិបាល​រង​ខេត្ត​បាន​ឲ្យ​ដឹង​ថា ម្ចាស់​ការដ្ឋាន​សាង​សង់​ទាំង​បី​នោះ​ទើប​តែ​ចាប់​ផ្ដើម​សាងសង់​អគារ​ប៉ុណ្ណោះ ហេតុដូច្នេះ​បទ​បញ្ជា​នេះ​មិន​បង្ក​ឲ្យ​មាន​ការ​ខាត​បង់ធ្ងន់ធ្ងរ​ទេ​។ លោក​បាន​មាន​ប្រសាសន៍​ថា ” ប៉ុន្តែ​យើង​នឹង​ចាត់វិធានការ​លើ​អគារ​ខុស​ច្បាប់​ទាំង​នេះ ប្រសិន​បើ​ផុត​​កំណត់​រយៈ​ពេល​៣០​ថ្ងៃ​​”។

លោក​ ស្រ៊ន់ បាន​បន្ថែម​ថា ” យើង​នឹង​មិន​អនុញ្ញាត​ឲ្យនរណា​ម្នាក់​សាងសង់​អគារ​តាម​បណ្ដោយព្រែក​នោះ​ទេ ព្រោះវា​អាច​ធ្វើ​ឲ្យ​ប៉ះពាល់​ដល់​បរិស្ថាន​”៕ គឹមហឿន​​​​​​​​​

 

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស